' കെജ്രിവാളിന്റെ രാജി തീരുമാനം രാഷ്ട്രീയ നാടകം': ഡൽഹി കോൺഗ്രസ് അധ്യക്ഷൻ ദേവേന്ദർ യാദവ്

Published: Monday, September 16, 2024, 1:07 [IST]

ഡൽഹി: ഡൽഹി മുഖ്യമന്ത്രി അരവിന്ദ് കെജ്രിവാളിന്റെ രാജി തീരുമാനം രാഷ്ട്രീയ നാടകമാണെന്ന് ഡൽഹി കോൺഗ്രസ് അധ്യക്ഷൻ ദേവേന്ദർ യാദവ്. "സുപ്രീം കോടതി തനിക്കെതിരെ നിയന്ത്രണങ്ങൾ ഏർപ്പെടുത്തിയതിനാൽ ഇതൊരു രാഷ്ട്രീയ നാടകമാണെന്ന് തോന്നുന്നു. ഡൽഹിയിലെ ജനങ്ങൾക്ക് അറിയാം, ആം ആദ്മി പാർട്ടിയുടെ ദുർഭരണത്തിന് നിയമസഭാ തിരഞ്ഞെടുപ്പിൽ മറുപടി നൽകുമെന്ന്" യാദവ് പറഞ്ഞു.

ജയിൽ മോചിതനായ കെജ്രിവാൾ എന്തുകൊണ്ടാണ് രാജിവെക്കാത്തതെന്നും യാദവ് ചോദിച്ചു. "സുപ്രീംകോടതി ഒരുപാട് നിയന്ത്രണങ്ങൾ ഏർപ്പെടുത്തിയ ശേഷം മുഖ്യമന്ത്രി പദം മുറുകെ പിടിക്കുന്നതിൽ അർത്ഥമില്ല, ജയിലിൽ നിന്ന് പുറത്തുവന്ന ഉടൻ തന്നെ കെജ്രിവാൾ രാജിവെക്കണമായിരുന്നു. എന്തിനാണ് അദ്ദേഹം രണ്ട് ദിവസം കാത്തിരിക്കുന്നത്?" യാദവ് ചോദിച്ചു.

സി ബി ഐ സമർപ്പിച്ച അഴിമതി കേസിൽ സുപ്രീം കോടതി ജാമ്യം നൽകിയതിനെ തുടർന്ന് വെള്ളിയാഴ്ചയാണ് അരവിന്ദ് കെജ്രിവാൾ തിഹാർ ജയിലിൽ നിന്ന് പുറത്തിറങ്ങിയത്. സെക്രട്ടേറിയറ്റിലെ ഓഫീസ് സന്ദർശിക്കാനോ ഔദ്യോഗിക ഫയലുകളിൽ ഒപ്പിടാനോ പാടില്ലെന്നതുൾപ്പെടെ ജാമ്യത്തിന് കോടതി ഉപാധികൾ വെച്ചു.

രണ്ട് ദിവസത്തിന് ശേഷം രാജി വെയ്ക്കുമെന്നാണ് കെജ്രിവാൾ പറഞ്ഞത്. പാർട്ടി പ്രവർത്തകരെ അഭിസംബോധന ചെയ്ത് സംസാരിക്കവെയാണ് കെജ്രിവാൾ രാജി സന്നദ്ധത അറിയിച്ചത്. 2 ദിവസത്തിന് ശേഷം ഞാൻ രാജിവെക്കാൻ പോകുന്നു; ഞാൻ സത്യസന്ധനാണോ എന്ന് ജനങ്ങളോട് ചോദിക്കൂ; അവർ പ്രതികരിക്കുന്നതുവരെ മുഖ്യമന്ത്രി കസേരയിൽ ഇരിക്കില്ല, ആളുകൾ എനിക്ക് സത്യസന്ധതയുടെ സർട്ടിഫിക്കറ്റ് നൽകിയതിന് ശേഷം മാത്രമേ ഞാൻ മുഖ്യമന്ത്രി കസേരയിൽ ഇരിക്കൂ; എന്നും കെജ്രിവാൾ പറഞ്ഞിരുന്നു.

" കെജ്രിവാൾ സത്യസന്ധനാണെന്ന് തോന്നുവെങ്കിൽ എനിക്ക് വോട്ട് ചെയ്യു. തിരഞ്ഞെടുപ്പിന് ശേഷം ഞാൻ മുഖ്യമന്ത്രിയാവാം. ഞാൻ സത്യസന്ധനല്ലെങ്കിൽ വോട്ട് ചെയ്യേണ്ട. എന്റെ സത്യസന്ധതയ്ക്ക് നിങ്ങൾ തരുന്ന സർട്ടിഫിക്കറ്റാണ് ഓരോ വോട്ടും, അദ്ദേഹം പറഞ്ഞു.

ഈ സാഹചര്യം രാഷ്ട്രീയ വൃത്തങ്ങളിൽ നിന്നും ജനങ്ങളിൽ നിന്നും വിവിധ പ്രതികരണങ്ങൾക്ക് കാരണമായിട്ടുണ്ട്. രാജി പ്രഖ്യാപനത്തിന് പിന്നിലെ കെജ്‌രിവാളിൻ്റെ ഉദ്ദേശ്യങ്ങളെക്കുറിച്ചും രണ്ട് ദിവസത്തെ സമയത്തെക്കുറിച്ചും പലരും ചോദ്യം ഉയർത്തി.

കെജ്‌രിവാളിൻ്റെ ഭരണത്തെയും സത്യസന്ധതയെയും കുറിച്ചുള്ള ഈ സമീപകാല സംഭവങ്ങളും പൊതുജനാഭിപ്രായവും വരാനിരിക്കുന്ന നിയമസഭാ തിരഞ്ഞെടുപ്പുകളെ കാര്യമായി സ്വാധീനിക്കുമെന്ന് പ്രതീക്ഷിക്കുന്നു. ആറ് മാസത്തെ ജയിൽ വാസത്തിന് ശേഷം ആണ് കെജ്രിവാളിന് ജാമ്യം ലഭിച്ചത്. മദ്യ നയക്കേസിൽ ആണ് അദ്ദേഹം അറസ്റ്റിലായിരുന്നത്.

അതേ സമയം കെജ്രിവാൾ രാജി വെച്ചാൽ ആരായിരിക്കും മുഖ്യമന്ത്രി സ്ഥാനത്തേക്ക് എത്തുക എന്ന ചോദ്യവും ഉണ്ട്.

Published On September 16, 2024