ദില്ലി പോലീസുകാരന് കാമുകിയെ വെടിവെച്ചുകൊന്നശേഷം ആത്മഹത്യ ചെയ്തു
ദില്ലി: ദില്ലി ദ്വാരകയില് പോലീസുകാരനാല് വെടിയേറ്റു മരിച്ച സ്ത്രീ ഇയാളുടെ കാമുകിയായിരുന്നെന്ന് അന്വേഷണ സംഘം. ഇരുപത്തിയെട്ടുകാരിയായ നികിതയാണ് ഞായറാഴ്ച രാവിലെ പോലീസ് എസ്ഐ വിജേന്ദ്ര ബിഷ്ണോയിയുടെ വെടിയേറ്റു മരിച്ചത്. നികിതയെ വെടിവെച്ചശേഷം സ്വയം വെടിവെച്ച വിജേന്ദ്ര പിന്നീട് ആശുപത്രിയില് ചികിത്സയിലിരിക്കെ മരിച്ചു.
രാജസ്ഥാന് സ്വദേശിയാണ് വിജേന്ദ്രയെന്ന് പോലീസ് പറഞ്ഞു. വിവാഹിതനായ ഇയാളുടെ ഭാര്യ രാജസ്ഥാനിലാണ്. ഭാര്യ ഇയാള്ക്കെതിരെ ഗാര്ഹിക പീഡനക്കേസ് നല്കിയിരുന്നു. ജോലി ആവശ്യാര്ഥം ദില്ലിയില് താമസിക്കുന്ന വിജേന്ദ്ര ഏറെക്കാലമായി ന്യൂസ് റിപ്പോര്ട്ടറായ നികിതയുമായി പ്രണയത്തിലായിരുന്നെന്നാണ് റിപ്പോര്ട്ട്.
ദ്വാരകയിലെ പാര്ക്കിലെ ഒരു ബെഞ്ചില് ഇരുവരും ഒരുമിച്ചിരുന്ന് സംസാരിക്കുമ്പോള് പോലീസുകാരന് പൊടുന്നതെ തോക്കെടുത്ത് വെടിവെക്കുകയായിരുന്നെന്ന് ദൃക്സാക്ഷികള് പറഞ്ഞു. നെഞ്ചിനും വയറിനുമാണ് യുവതിക്ക് വെടിയേറ്റത്. ഉടന് ആശുപത്രിയില് എത്തിച്ചെങ്കിലും ഇവര് അപ്പോഴേക്കും മരിച്ചിരുന്നു. വയറ്റില് സ്വയം വെടിവെച്ച വിജേന്ദ്ര അത്യന്തം ഗുരുതരാവസ്ഥയില് എയിംസ് ട്രോമാ സെന്ററില് ചികിത്സയിലിരിക്കവെയാണ് മരിച്ചത്.
2008ലാണ് വിജേന്ദ്ര പോലീസ് ഉദ്യോഗസ്ഥനായി സര്വീസില് കയറുന്നത്. നിലവില് ഐഎസ് പോസ്റ്റില് ജോലിചെയ്തുവരികയായിരുന്നു. മൂന്നുവര്ഷത്തോളമായി നികിതയുമായി ഇയാള് അടുപ്പത്തിലാണെന്ന് പോലീസ് പറഞ്ഞു. ഇരുവരുടെയും ബന്ധുക്കളെ പോലീസ് വിവിരം അറിയിച്ചിട്ടുണ്ട്.