ഇന്ത്യാ സഖ്യത്തിന് ഒന്നും ചെയ്യാനാകില്ല: ഡല്‍ഹി മൂന്നാമത് ബിജെപി തൂത്തുവാരിയേക്കും

Updated: Saturday, June 1, 2024, 20:42 [IST]

രാജ്യം ഉറ്റുനോക്കുന്ന ഡല്‍ഹിയിലെ ലോക്സഭ തിരഞ്ഞെടുപ്പില്‍ ഇത്തവണയും അത്ഭുതമൊന്നും ഉണ്ടായേക്കില്ലെന്ന് എക്സിറ്റ് പോള്‍ പ്രവചനങ്ങള്‍. രാജ്യതലസ്ഥാനത്തെ ഏഴ് സീറ്റിലും ബി ജെ പി വലിയ മുന്നേറ്റം ഉണ്ടാക്കുമെന്നാണ് ഇന്ന് പുറത്തുവന്ന ബഹുഭൂരിപക്ഷം എക്സിറ്റ് പോളുകളും അവകാശപ്പെടുന്നത്. പിഎംആർക്യു, ടിവി9 ഭാരത് വർഷ, ജന്‍കി ബാത് എക്‌സിറ്റ് പോളുകള്‍ പ്രവചിക്കുന്നത് ഏഴില്‍ ഏഴ സീറ്റും ബി ജെ പി തന്നെ വീണ്ടും വിജയിക്കുമെന്നാണ്. ഇവരുടെ സർവ്വേ പ്രകാരം എ എ പി യും കോണ്‍ഗ്രസും അടങ്ങുന്ന ഇന്ത്യാ സഖ്യത്തിന് ഒരു ചലനവും ഡല്‍ഹിയില്‍ സൃഷ്ടിക്കാന്‍ സാധിച്ചേക്കില്ല.

ഇന്ത്യ ടിവി-സിഎന്‍എക്സ് എക്സിറ്റ്, ഇന്ത്യാ ടുഡെ-ആക്സിസ് മൈ ഇന്ത്യ എക്സിറ്റ് പോളുകള്‍ പറയുന്നത് ബി ജെ പിക്ക് ആറ് മുതല്‍ ഏഴ് വരെ സീറ്റുകള്‍ ലഭിച്ചേക്കാമെന്നാണ്. ഇന്ത്യാ സഖ്യത്തിന് ഒരു സീറ്റോ അല്ലെങ്കില്‍ ഒന്നും കിട്ടാതെയോ വരാം. റിപ്പബ്ലിക്ക് ഭാരത്-മാട്രിസ് സർവ്വെ മാത്രാണ് രാജ്യ തലസ്ഥാനത്ത് ഇന്ത്യ സഖ്യത്തിന് രണ്ട് സീറ്റില്‍ വരെ സാധ്യത കാണുന്നത്. ചിലപ്പോള്‍ ഒന്നും ലഭിക്കാതെയും വരാം. ബി ജെ ക്ക് അഞ്ച് മുതല്‍ ഏഴ് വരെ സീറ്റുകള്‍ ലഭിക്കാമെന്നും ഇവർ പറയുന്നു.

കഴിഞ്ഞ രണ്ട് ലോക്‌സഭാ തെരഞ്ഞെടുപ്പുകളിലും ഡല്‍ഹിയിലെ ഏഴ് സീറ്റുകളും ബി ജെ പിയായിരുന്നു നേടിയത്. ഭൂരിഭാഗം സീറ്റുകളിലും കോൺഗ്രസ് മൂന്നാം സ്ഥാനത്തേക്ക് പിന്തള്ളപ്പെട്ടു. 2019ലെ തിരഞ്ഞെടുപ്പിൽ ബി ജെ പിക്ക് 56.86% വോട്ട് ലഭിച്ചപ്പോൾ കോൺഗ്രസ് 22.51% വോട്ടും എ എ പി 18.11% വോട്ടും നേടി. ഇത്തവണ ഇന്ത്യാ സഖ്യത്തിന്റെ ഭാഗമായി എ എ പി നാല് സീറ്റിലും കോണ്‍ഗ്രസ് മൂന്ന് സീറ്റിലുമാണ് ഡല്‍ഹിയില്‍ മത്സരിച്ചത്.

ലോക്‌സഭാ തിരഞ്ഞെടുപ്പിൻ്റെ ആറാം ഘട്ടത്തിൽ മെയ് 25 നായിരുന്നു ഡൽഹിയിലെ ഏഴ് ലോക്‌സഭാ മണ്ഡലങ്ങളിലേക്കുള്ള വോട്ടെടുപ്പ് നടന്നത്. തിരഞ്ഞെടുപ്പ് കമ്മീഷൻ കണക്കുകൾ പ്രകാരം 58.69% പോളിങ് ആണ് ദേശീയ തലസ്ഥാനത്ത് രേഖപ്പെടുത്തിയത്. ഏഴ് ലോക്സഭ മണ്ഡലങ്ങളിൽ ഏറ്റവും കൂടുതൽ പോളിങ് രേഖപ്പെടുത്തിയത് നോർത്ത് ഈസ്റ്റ് ഡൽഹിയിലാണ് (62.89%), ന്യൂ ഡൽഹിയിലാണ് ഏറ്റവും കുറവ് 55.43%.