ഡൽഹി മദ്യനയ അഴിമതിക്കേസ്: കെസിആറിന്റെ മകൾ കെ കവിത അറസ്റ്റിൽ

Updated: Friday, March 15, 2024, 19:42 [IST]

ബെംഗളൂരു: ഡൽഹി മദ്യ നയ അഴിമതി കേസിൽ ബി ആർ എസ് ( ഭാരത രാഷ്ട്ര സമിതി ) നേതാവും മുൻ തെലങ്കാന മുഖ്യമന്ത്രി കെ സി എറിന്റെ മകളുമായ കെ കവിത അറസ്റ്റിൽ. ഇഡിയും ഐ ടി യും കവിതയുടെ വീട്ടിൽ നടത്തിയ റെയ്ഡിന് പിന്നാലെയാണ് അറസ്റ്റ്. നാല് മണിക്കൂറിലേറെ കവിതയെ ചോദ്യം ചെയ്തതായാണ് വിവരം.

ഉച്ചയോട് തന്നെ കവിതയെ കസ്റ്റഡിയിൽ എടുത്തിരുന്നു. എന്നാൽ അറസ്റ്റ് രേഖപ്പെടുത്തിയത് കുറച്ച് മുമ്പായിരുന്നു. ഹൈദരാബാദിലെ ജൂബിലി ഹിൽലസിലുള്ള കവിതയുടെ വീട്ടിൽ ഇ ഡിയും ആദായ നികുതി വകുപ്പും റെയ്ഡ് നടത്തിയിരുന്നു.

ബി ആർ എസ് വർക്കിംഗ് പ്രസിഡന്റ് കെ ടി രാമറാവു മുൻമന്ത്രി ഹരീഷ് റാവൂ എന്നിവർ ഉൾപ്പെടെ നിരവധി പാർട്ടി പ്രവർത്തകർ കവിതയുടെ വസതിയിൽ തടിച്ച് കൂടി. കവിതയെ ഇന്ന് രാത്രി ഡൽഹിയിലേക്ക് കൊണ്ടുപോകുമെന്ന് ഇ ഡി ഉദ്യോഗസ്ഥരെ ഉദ്ധരിച്ച് മുതിർന്ന ബി ആർ എസ് നേതാവും മുൻ മന്ത്രിയുമായ പ്രശാന്ത് റെഡ്ഡി പറഞ്ഞു.

" നിങ്ങളെ ( കവിത) രാത്രി ഡൽഹിയിലേക്ക് കൊണ്ടുപോകും എന്നാണ് അവർ വീട്ടിൽ അറിയിച്ചത്. ഇവിടെ വരുന്നതിന് മുമ്പ് തന്നെ അവർ കവിതയെ കസ്റ്റഡിയിൽ എടുക്കാൻ തീരുമാനിച്ചിരുന്നുവെന്നും കവിതയ്ക്ക് വിമാന ടിക്കറ്റ് പോലും ബുക്ക് ചെയ്തിരുന്നതായി തോന്നുന്നുവെന്നും " റെഡ്ഡി പറഞ്ഞു

സൗത്ത് ഗ്രൂപ്പ് ലോബിയുമായി കെ കവിതയ്ക്ക് ബന്ധമുണ്ടെന്ന് ഇ ഡി ആരോപിക്കുന്നു. എന്നാൽ റെയ്ഡുകൾ രാഷ്ട്രീയ പ്രേരിതമാണെന്നും കെ ചന്ദ്ര ശേഖര റാവുവിന്റെ നേതൃത്വത്തിലുള്ള പാർട്ടിയിലെ നേതാക്കളെ പീഡിപ്പിക്കാൻ ബി ജെ പിയും കോൺഗ്രസും കൈകോർത്തിരിക്കുകയാണെന്നും റെയ്ഡിനോട് പ്രതികരിക്കവേ ബി ആർ സി വക്താവ് ശ്രാവൺ ദാസോജു ആരോപിച്ചു

പ്രധാനമന്ത്രി നരേന്ദ്ര മോദി എവിടെ പോയാലും മുന്നോടിയായോ പിന്നാലെയായോ ഇ ഡിയും ഐ ടിയും പോകും. അതാണ് തെലങ്കാനയിൽ നടക്കുന്നത്. ബി ആർ എസിൽ ഒരു പരിഭ്രാന്തി സൃഷ്ടിക്കാൻ അവർ സൃഷ്ടിക്കാൻ അവർ ആഗ്രഹിക്കുന്നു. അധികൃതമായി ഇത്രയധികം സ്വത്ത് സാമ്പാദിച്ച തെലങ്കാനയിലെ കോൺഗ്രസ് നേതാക്കളെ കുറിച്ച് ബി ജെ പിയുടെ നിർദ്ദേശ പ്രകാരം പ്രവർത്തിക്കുന്ന ഇ ഡിയും ഐടിയും വേവലാതിപ്പെടുന്നില്ല, ബി ആർ എസ് നേതാവ് പറഞ്ഞു.