ഡൽഹി–മുംബൈ എക്സ്പ്രസ് വേ അവസാനഘട്ടത്തിലേക്ക്; കോട്ട തുരങ്കം പൂർത്തിയായി, യാത്ര സമയം 12 മണിക്കൂറായി കുറയും
ഡൽഹി–മുംബൈ എക്സ്പ്രസ് വേ അവസാനഘട്ടത്തിലേക്ക്. രാജസ്ഥാനിലെ കോട്ടയ്ക്ക് സമീപം നിർണായകമായ 4.9 കിലോമീറ്റർ നീളമുള്ള തുരങ്കത്തിന്റെ നിർമ്മാണം പൂർത്തിയായതോടെ പദ്ധതിയുടെ പ്രധാന തടസ്സം നീങ്ങിയതായി അധികൃതർ അറിയിച്ചു. ജൂൺ 20-ന് ശേഷം എക്സ്പ്രസ് വേ ഗതാഗതത്തിനായി തുറക്കാൻ സാധ്യതയുണ്ടെന്നാണ് റിപ്പോർട്ട്.
ഡൽഹി മുതൽ ഗുജറാത്ത് വരെയുള്ള വലിയൊരു ഭാഗം ഇതിനകം തന്നെ പ്രവർത്തനക്ഷമമാക്കിയിട്ടുണ്ട്. എന്നാൽ ഭൂമി ഏറ്റെടുക്കൽ പ്രശ്നങ്ങളും മലയോര പ്രദേശങ്ങളിലെ സാങ്കേതിക ബുദ്ധിമുട്ടുകളും കാരണം ചില ഭാഗങ്ങളുടെ നിർമാണം വൈകുകയായിരുന്നു. ഇപ്പോൾ കോട്ട തുരങ്കം കൂടി പൂർത്തിയായതോടെ ആ തടസ്സങ്ങൾ ഏറെക്കുറെ അവസാനിച്ചിരിക്കുകയാണ്.
മുകുന്ദ്ര ഹിൽസ് ടൈഗർ റിസർവിന് കീഴിലൂടെ കടന്നുപോകുന്ന എട്ട് വരി തുരങ്കമാണ് ഇപ്പോൾ നിർമ്മിച്ചിരിക്കുന്നത്. പരിസ്ഥിതി സംരക്ഷണവും വന്യജീവി സുരക്ഷയും മുൻനിർത്തിയാണ് ഈ ഭാഗം ഭൂഗർഭമായി നിർമ്മിച്ചത്. വനമേഖലയെ ബാധിക്കാതെ അതിവേഗ ഗതാഗതം സാധ്യമാക്കുന്ന രീതിയിലുള്ള ഈ നിർമ്മാണം ഇന്ത്യയിലെ ഹൈവേ എഞ്ചിനീയറിംഗിലെ ശ്രദ്ധേയമായ നേട്ടങ്ങളിലൊന്നായി വിലയിരുത്തപ്പെടുന്നു.
വന്യജീവികളുടെ സ്വാഭാവിക സഞ്ചാരത്തെ തടസപ്പെടുത്താതെ റോഡ് ഗതാഗതം ഉറപ്പാക്കാൻ കഴിയുന്ന പ്രകൃതി സൗഹൃദ രൂപകൽപ്പനയാണ് ഈ തുരങ്കത്തിന്റെ പ്രത്യേകത. കുന്നുകളും കാടുകളും നിറഞ്ഞ പ്രദേശത്ത് മുകളിലൂടെ റോഡ് കടത്തുന്നതിനുപകരം ഭൂഗർഭ മാർഗം സ്വീകരിച്ചതിലൂടെ പരിസ്ഥിതി ആഘാതം കുറയ്ക്കാൻ സാധിച്ചു.
തുരങ്കം പൂർത്തിയായതോടെ എക്സ്പ്രസ് വേയുടെ മുഴുവൻ ഭാഗങ്ങളും തമ്മിൽ ബന്ധിപ്പിക്കപ്പെട്ടിരിക്കുകയാണ്. ഇനി ശേഷിക്കുന്നത് സുരക്ഷാ പരിശോധനകളും അന്തിമ അനുമതി നടപടികളും മാത്രമാണ്. ഇവ പൂർത്തിയായാൽ ജൂൺ 20-ന് ശേഷം ഏതെങ്കിലും സമയത്ത് പാത തുറക്കാനാകും എന്നാണ് പ്രതീക്ഷ.
പൂർണ്ണമായി പ്രവർത്തനക്ഷമമായാൽ ഡൽഹിയിൽ നിന്ന് മുംബൈയിലേക്കുള്ള യാത്രാസമയം നിലവിലെ 24 മണിക്കൂറിൽ നിന്ന് ഏകദേശം 12 മണിക്കൂറായി കുറയും. ദീർഘദൂര യാത്രകളും ചരക്ക് ഗതാഗതവും കൂടുതൽ വേഗത്തിലും കാര്യക്ഷമമായും മാറും.
ചരക്കുനീക്കം വേഗത്തിലാകുന്നതോടെ ലോജിസ്റ്റിക്സ് ചെലവ് കുറയുകയും വ്യവസായ മേഖലയ്ക്ക് വലിയ ഉണർവ് ലഭിക്കുകയും ചെയ്യുമെന്നാണ് വിലയിരുത്തൽ. ഡൽഹി, ഹരിയാന, രാജസ്ഥാൻ, മധ്യപ്രദേശ്, ഗുജറാത്ത്, മഹാരാഷ്ട്ര എന്നീ സംസ്ഥാനങ്ങളിലൂടെ കടന്നുപോകുന്ന ഈ പാത ആഭ്യന്തര വ്യാപാരവും വ്യവസായ ബന്ധങ്ങളും കൂടുതൽ ശക്തിപ്പെടുത്തുമെന്നാണ് പ്രതീക്ഷ.
ഏകദേശം ഒരു ലക്ഷം കോടി രൂപ ചെലവിൽ നിർമ്മിക്കുന്ന ഈ പദ്ധതി രാജ്യത്തെ ഏറ്റവും വലിയ ഹൈവേ വികസന പദ്ധതികളിലൊന്നാണ്. യാത്രാ സൗകര്യം വർധിപ്പിക്കുന്നതിനൊപ്പം വിശ്രമകേന്ദ്രങ്ങൾ, ടോൾ സംവിധാനങ്ങൾ, പെട്രോൾ പമ്പുകൾ, സുരക്ഷാ സംവിധാനങ്ങൾ എന്നിവയും ഈ കോറിഡോറിൽ ഒരുക്കിയിട്ടുണ്ട്.
Click it and Unblock the Notifications
Sign in with Google