പ്ലാറ്റ്‌ഫോം മാറ്റ അനൗൺ‌സ്മെന്റാണോ തിക്കിനും തിരക്കിനും കാരണമായത്? പോലീസ് പറയുന്നത് എന്താണ്?

ഡൽഹി: ശനിയാഴ്ച രാത്രി ന്യൂഡൽഹി റയിൽ വേ സ്റ്റേഷനിൽ തിക്കിലും തിരക്കിലും പെട്ട് 18 പേർ മരിച്ചതായാണ് റിപ്പോർട്ട്. പ്രയാ​ഗ് രാജിലേക്കുള്ള സ്പെഷ്യൽ ട്രെയിൻ അവസാന നിമഷം പ്ലാറ്റ്ഫോം മാറ്റാനുള്ള അറിയിപ്പാണ് തിക്കിനും തിരക്കിനും കാരണമെന്ന് ദൃക്സാക്ഷികൾ പറയുമ്പോൾ അത്തരമൊരു മാറ്റം നിഷേധിക്കുകയാണ് റെയിൽവേ.

ഇക്കാര്യത്തിൽ വിശദീകരണവുമായി എത്തിയിരിക്കുകയാണ് ഡൽഹി പോലീസ്. പോലീസ് പറയുന്നതനുസരിച്ച് പ്രയാ​ഗ് രാജിലേക്ക് മറ്റൊരു പ്രത്യേക ട്രെയിൻ പ്രയാ​ഗ് രാജ് സ്പെഷ്യൽ - പ്ലാറ്റ് ഫോം നമ്പർ 16 ൽ വന്നത് പ്ലാറ്റ്ഫോം നമ്പർ 14 ൽ സ്പെഷ്യൽ ട്രെയിനിനായി കാത്തിരിക്കുന്ന യാത്രക്കാരെ ആശയക്കുഴപ്പത്തിലാക്കി.

" പ്ലാറ്റ്ഫോം 16 ൽ പ്രയാ​ഗ് രാജ് സ്പെഷ്യൽ എത്തുമെന്ന അറിയിപ്പ് ആശയക്കുഴപ്പത്തിന് കാരണമായി. കാരണം. പ്രയാ​ഗ് രാജ് എക്സ്പ്രസ് ഇതിനകം പ്ലാറ്റ് ഫോം 14 ൽ ഉണ്ടായിരുന്നു. പ്ലാറ്റ് ഫോം 14 ൽ ട്രെയിനിലെത്താൻ കഴിയാത്ത ആളുകൾ തങ്ങളുടെ ട്രെയിൻ പ്ലാറ്റ്ഫോം 16 ൽ എത്തിയെന്ന് കരുതി തിക്കിലും തിരക്കിലും പെട്ടു. കൂടാതെ മൂന്ന് ട്രെയിനുകൾ വൈകുകയും ചെയ്തു, പോലീസ് പറഞ്ഞു.

സമീപത്തെ കോണിപ്പടിയിൽ നിന്ന് ഒരു യാത്രക്കാരൻ തെന്നിവീണതാണ് സംഭവത്തിന് കാരണമായതെന്ന് റെയിൽവേ ഉന്നത ഉദ്യോ​ഗസ്ഥൻ പറഞ്ഞു. ട്രെയിനുകൾ റദ്ദാക്കിയിട്ടില്ല, പ്ലാറ്റ്ഫോം മാറ്റിയിട്ടില്ല. എല്ലാ ട്രെയിനുകളും അതിന്റെ ഷെഡ്യൂൾ അനുസരിച്ചാണ് ഓടിയത്, നോർത്തേൺ റെയിൽ വേ സി പി ആർ ഒ ഹിമാൻഷു ശേഖർ ഉപാധ്യ പറഞ്ഞു.

സംഭവത്തെക്കുറിച്ച് അന്വേഷിക്കാൻ റെയിൽവേ രണ്ടം​ഗ ഉന്നതതല സമതിക്ക് രൂപം നൽകിയിട്ടുണ്ട്. നോർ‌ത്തേൺ റെയിൽവേയുടെ പ്രിൻസിപ്പൽ ചീഫ് കൊമേഴ്സ്യൽ മാനേജർ നർസിങ് ദിയോസ നോർത്തേൺ റെയിൽവേയുടെ പ്രിൻസിപ്പൽ ചീഫ് സെക്യൂരിറ്റി കമ്മീഷണർ പങ്കജ് ​ഗാം​ഗ്വാർ എന്നിവർ സമിതിയുടെ ഭാ​ഗമാണെ് അറിയിച്ചു.

അന്വേഷണം ആരംഭിച്ച സമിതി ന്യൂഡൽ​ഹി റെയിൽവേ സ്റ്റേഷന്റെ എല്ലാ വീഡിയോ ദൃശ്യങ്ങളും സുരക്ഷിതമാക്കാൻ ഉത്തരവിട്ടു. സംഭവത്തിൽ മരണപ്പെട്ട 18 പേരിൽ 11 പേർ സ്ത്രീകളും 4 പേർ കുട്ടികളുമാണ്. പത്തോളം പേർക്ക് പരിക്കേറ്റു. പരിക്കേറ്റ ആളുകളെ ചികിത്സക്കായി അടുത്തുള്ള ആശുപത്രികളിൽ പ്രവേശിപ്പിച്ചു. പരിക്കേറ്റവരിൽ ഭൂരിഭാ​ഗം പേർക്കും കൈകാലുകൾക്ക് പരിക്കേറ്റതായാണ് റിപ്പോർട്ട്.