ഡല്‍ഹി ഫലം: ഇന്നത്തെ വിജയം ചരിത്രപരമാണ്. ഇതൊരു സാധാരണ വിജയമല്ല, നന്ദി പറഞ്ഞ് മോദി

ന്യൂഡല്‍ഹി: ഡല്‍ഹി നിയമസഭാ തിരഞ്ഞെടുപ്പില്‍ വന്‍ വിജയവുമായി ബിജെപി. ആകെയുള്ള 70 സീറ്റില്‍ 48 ലും വിജയമുറപ്പിച്ച ബിജെപി 27 വര്‍ഷത്തിന് ശേഷം ഡല്‍ഹിയില്‍ അധികാരത്തിലെത്തുകയാണ്. 2015 മുതല്‍ അധികാരത്തിലുള്ള ആം ആദ്മി പാര്‍ട്ടിക്ക് 22 സീറ്റില്‍ മാത്രമെ ജയിക്കാനായുള്ളൂ. കോണ്‍ഗ്രസിന് ഇത്തവണയും അക്കൗണ്ട് തുറക്കാനായിട്ടില്ല. ആം ആദ്മി പാര്‍ട്ടിയുടെ അരവിന്ദ് കെജ്രിവാളും മനീഷ് സിസോദിയയും അടക്കമുള്ള പ്രമുഖര്‍ തോറ്റു.

തിരിച്ചടി നേരിട്ടെങ്കിലും കല്‍ക്കാജി മണ്ഡലത്തില്‍ നിന്ന് മുഖ്യമന്ത്രി അതിഷി മര്‍ലേന വിജയിച്ചു. 19 കേന്ദ്രങ്ങളിലായിട്ടായിരുന്നു വോട്ടെണ്ണല്‍. അരവിന്ദ് കെജ്രിവാളിന്റെ നേതൃത്വത്തിലുള്ള ആം ആദ്മി പാര്‍ട്ടി തുടര്‍ച്ചയായ മൂന്നാം വിജയം നേടുമോ എന്നായിരുന്നു എല്ലാവരും ഉറ്റുനോക്കിയിരുന്നത്. എന്നാല്‍ ഡല്‍ഹിയില്‍ ബി ജെ പി അധികാരത്തില്‍ തിരിച്ചെത്തുമെന്നാണ് എക്‌സിറ്റ് പോളുകളുടെ പ്രവചനം.

ഇത് ശരിവെക്കും വിധത്തിലുള്ള ഫലമാണ് പുറത്ത് വന്നിരിക്കുന്നത്. കഴിഞ്ഞ രണ്ട് നിയമസഭാ തെരഞ്ഞെടുപ്പുകളിലും പരാജയം ഏറ്റുവാങ്ങിയ കോണ്‍ഗ്രസിനെ സംബന്ധിച്ചിടത്തോളം വോട്ടുവിഹിതം വര്‍ധിപ്പിക്കാനായത് മാത്രമാണ് ആശ്വാസം. വോട്ടെണ്ണലിന് വലിയ സുരക്ഷയാണ് രാജ്യതലസ്ഥാനത്ത് ഒരുക്കിയത്. 19 വോട്ടെണ്ണല്‍ കേന്ദ്രങ്ങള്‍ക്കായി ഓരോ കേന്ദ്രത്തിലും രണ്ട് അര്‍ദ്ധസൈനിക വിഭാഗങ്ങള്‍ ഉള്‍പ്പെടെ 10,000 പൊലീസുകാരെ വിന്യസിച്ചിട്ടുണ്ട്.

ഫെബ്രുവരി 5 ന് നടന്നതിരഞ്ഞെടുപ്പില്‍, ഡല്‍ഹിയില്‍ 60.54 ശതമാനം പോളിംഗാണ് രേഖപ്പെടുത്തിയത്. 2020 ലെ തിരഞ്ഞെടുപ്പിനെ അപേക്ഷിച്ച് ഏകദേശം 2.5 ശതമാനം പോയിന്റിന്റെ ഇടിവാണ് പോളിംഗില്‍ ഉണ്ടായത്. 70 അംഗ ഡല്‍ഹി നിയമസഭയിലേക്ക് പ്രതിനിധികളെ തിരഞ്ഞെടുക്കുന്നതിന് 50,42,988 പുരുഷ വോട്ടര്‍മാരും 44,08,606 സ്ത്രീ വോട്ടര്‍മാരും വോട്ട് രേഖപ്പെടുത്തി.