ഓപ്പറേഷനിടെ ഡോക്ടര്‍മാര്‍ ഗര്‍ഭാശയത്തില്‍ തുണിവെച്ചു മറന്നു?

ഗുണ: പ്രസവ ശസ്ത്രക്രിയക്കിടെ ഡോക്ടര്‍മാര്‍ യുവതിയുടെ ഗര്‍ഭാശയത്തില്‍ തുണിവെച്ചു മറന്നതായി ആരോപണം. മധ്യപ്രദേശിലെ ഗുണയിലാണ് അപൂര്‍വ സംഭവം അരങ്ങേറിയത്. രാധ എന്ന സ്ത്രീയാണ് ഇതേക്കുറിച്ചുള്ള ആരോപണം ഉന്നയിച്ചിട്ടുള്ളത്. കഴിഞ്ഞമാസം സാറ കോളനിയിലെ ഒരു പ്രൈമറി ഹെല്‍ത്ത് സെന്ററില്‍ വെച്ചായിരുന്നു ഇവരുടെ പ്രസവം.

തുടര്‍ന്ന് 14ന് ആശുപത്രിയില്‍ നിന്നും ഡിസ്ചാര്‍ജ് ആവുകയും ചെയ്തു. എന്നാല്‍, പിന്നീടുള്ള ദിവസങ്ങളില്‍ ശക്തിയായ വയറുവേദന അനുഭവപ്പെട്ടതിനെ തുടര്‍ന്ന് യുവതിയെ പ്രൈവറ്റ് ആശുപത്രിയില്‍വെച്ച് സ്‌കാനിങ്ങിന് വിധേയമാക്കിയപ്പോഴാണ് ഗര്‍ഭപാത്രത്തില്‍ എന്തോ വസ്തു കിടക്കുന്നതായി ശ്രദ്ധയില്‍പ്പെട്ടത്. ഇതേ തുടര്‍ന്ന് നടത്തിയ ഓപ്പറേഷനില്‍ ചെറിയ തുണിക്കഷ്ണം പുറത്തെടുക്കുകയും ചെയ്തു.

ഓപ്പറേഷനുശേഷം യുവതിയുടെ വയറുവേദന സുഖംപ്രാപിക്കുകയും ചെയ്തു. സംഭവത്തില്‍ രാധയുടെ ഭര്‍ത്താവ് മഹേന്ദ്ര സിങ് പ്രൈമറി ഹെല്‍ത്ത് സെന്ററിനെതിരെ പരാതി നല്‍കി. എന്നാല്‍, പരാതിയില്‍ അന്വേഷണം നടത്തിയെന്നും ആശുപത്രിയുടെ ഭാഗത്തുനിന്നും തെറ്റൊന്നുമില്ലെന്നുമാണ് ബ്ലോക്ക് മെഡിക്കല്‍ ഓഫീസര്‍ വ്യക്തമാക്കുന്നത്.

അതേസമയം യുവതിയെ രണ്ടാംതവണ ഓപ്പറേഷന് വിധേയയാക്കിയ ഡോ. നിഷ തുണിക്കഷ്ണം കണ്ടെടുത്തെന്ന കാര്യം ഉറപ്പിക്കുന്നുണ്ട്. തുണിക്കഷ്ണം കുടുങ്ങിയതിനാല്‍ ഭാവിയില്‍ യുവതി അമ്മയാകാനുളള സാധ്യതയും വിരളമായിരിക്കുകയാണെന്ന് മഹേന്ദ്ര സിങ് പറഞ്ഞു. ആശുപത്രി അധികൃതര്‍ക്കെതിരെ നിയമ നടപടിക്കൊരുങ്ങുകയാണ് ഇയാള്‍.

English summary

Doctors leave cloth inside woman’s uterus during delivery in Guna