യുവതിയുടെ വയറ്റില്‍ ഒന്നര കിലോ ആഭരണങ്ങള്‍, പിന്നെ 90 നാണയങ്ങള്‍!!! ഡോക്ടര്‍മാര്‍ അമ്പരന്നു

രാംപുറാത്ത്(പശ്ചിമ ബംഗാള്‍): അബദ്ധത്തില്‍ നാണയങ്ങള്‍ വിഴുങ്ങുന്ന സംഭവങ്ങള്‍ ഒരുപാട് ഉണ്ടാകാറുണ്ട്. പലപ്പോഴും അത് പുറത്തെടുക്കാന്‍ ശസ്ത്രക്രിയ ഒന്നും വേണ്ടിയും വരാറില്ല. എന്നാല്‍ ഒരാളുടെ വയറ്റില്‍ 90 നാണയങ്ങള്‍ എത്തിയാല്‍ എങ്ങനെയിരിക്കും. അതുകൂടാതെ കുറേ ആഭരണങ്ങളും കൂടി ആയാലോ!

കേള്‍ക്കുമ്പോള്‍ കെട്ടുകഥയെന്ന് തോന്നിപ്പിക്കുമെങ്കിലും ഇത് അങ്ങനെയല്ല. പശ്ചിമ ബംഗാളില്‍ നിന്നാണ് ഈ അമ്പരപ്പിക്കുന്ന വാര്‍ത്ത. 26 വയസ്സുള്ള യുവതിയുടെ വയറ്റില്‍ നിന്നാണ് ഇത്രയും അധികം സാധനങ്ങള്‍ പുറത്തെടുത്തത്.

കള്ളക്കടത്തിനോ മറ്റോ വേണ്ടി ചെയ്തതാണെന്ന് തെറ്റിദ്ധരിക്കണ്ട. മാനസിക പ്രശ്‌നങ്ങള്‍ ഉളള യുവതിയ്ക്ക് മറ്റ് ലക്ഷ്യങ്ങളൊന്നും ഉണ്ടായിരുന്നില്ല. സ്വന്തം വീട്ടിലെ സാധനങ്ങള്‍ തന്നെ ആയിരുന്നു ഇവര്‍ ഇടക്കിടെ അകത്താക്കിയിരുന്നത്. മാലകള്‍, വളകള്‍, കമ്മലുകള്‍, മൂക്കുത്തി, പാദസരം, എന്തിനേറെ വാച്ച് വരെ ഇവരുടെ വയറ്റില്‍ ഉണ്ടായിരുന്നു.

വീട്ടില്‍ നിന്ന് ആഭരണങ്ങള്‍ കാണാതാകുന്നത് ഒരു പതിവ് സംഭവം ആയിരുന്നത്രെ. പലതവണ മകളോട് ഇതേ പറ്റി ചോദിച്ചെങ്കിലും കരച്ചിലായിരുന്നു മറുപടി എന്നാണ് യുവതിയുടെ അമ്മ പറയുന്നത്.

കഴിഞ്ഞ രണ്ട് മാസമായി യുവതിയുടെ ആരോഗ്യനില തീരെ തൃപ്തികരമായിരുന്നില്ല. ഒരുപാട് ആശുപത്രികളില്‍ കയറിയിറങ്ങിയതിന് ശേഷം ആണ് ബീര്‍ഭം ജില്ലയിലെ രാംപുറാത്ത് സര്‍ക്കാര്‍ മെഡിക്കല്‍ കോളേജില്‍ എത്തിച്ചത്. ഒരാഴ്ച നീണ്ട പരിശോധനയിലാണ് വയറിനകത്തുള്ള ആഭരണങ്ങളാണ് പ്രശ്‌നക്കാര്‍ എന്ന് ഡോക്ടര്‍മാര്‍ക്ക് മനസ്സിലായത്. ഒടുവില്‍ ആഭരണങ്ങളും നായണയങ്ങളും എല്ലാം ശസ്ത്രക്രിയ ചെയ്ത് പുറത്തെടുത്തു.

അഞ്ച് രൂപയുടേയും പത്ത് രൂപയുടേയും ആയി 90 നാണയങ്ങള്‍ ആയിരുന്നു ഇവരുടെ വയറ്റില്‍ ഉണ്ടായിരുന്നത്. ആഭരണങ്ങളില്‍ ഏറേയും ചെമ്പിന്റേയും പിച്ചളയുടേതും ആയിരുന്നു. അപൂര്‍വ്വം ചില സ്വര്‍ണാഭരണങ്ങളും ഉണ്ടായിരുന്നു എന്നാണ് ഡോക്ടര്‍മാര്‍ പറയുന്നത്.

English summary

Doctors recovered 1.5 KG ornaments and 90 coins from woman's stomach by surgery