ഭരണഘടനയില്‍ പറയാത്ത കാര്യം എങ്ങനെ സുപ്രീംകോടതി ഉത്തരവിടും: 14 ചോദ്യങ്ങളുമായി രാഷ്ട്രപതി

സംസ്ഥാന നിയമസഭകളിൽ പാസാകുന്ന ബില്ലുകൾ സംബന്ധിച്ച് ഗവർണർമാർക്കും രാഷ്ട്രപതിക്കും തീരുമാനമെടുക്കാൻ സുപ്രീം കോടതി സമയപരിധി നിശ്ചയിച്ചത് ചോദ്യം ചെയ്ത് രാഷ്ട്രപതി ദ്രൗപദി മുർമു. ഭരണഘടനയിൽ ഇത്തരമൊരു വ്യവസ്ഥയില്ലാത്ത സാഹചര്യത്തിൽ സുപ്രീം കോടതി ഇങ്ങനെയൊരു വിധി എങ്ങനെ പുറപ്പെടുവിക്കാനാകുമെന്നും രാഷ്ട്രപതി ചോദിക്കുന്നു.

സംസ്ഥാന നിയമസഭകൾ പാസാക്കുന്ന ബില്ലുകളിൽ തീരുമാനം എടുക്കുന്നതിന് രാഷ്ട്രപതിക്കും ഗവർണർമാർക്കും സമയപരിധി നിശ്ചിയിച്ചുകൊണ്ടുള്ള ഉത്തരവിന്റെ പശ്ചാത്തലത്തില്‍ ഭരണഘടനയുടെ 143(1) വകുപ്പ് പ്രകാരമാണ് സുപ്രീം കോടതിയോട് രാഷ്ട്രപതി ചോദ്യം ഉന്നയിച്ചിരിക്കുന്നത്.

രാഷ്ട്രപതി ഉന്നയിച്ച 14 ചോദ്യങ്ങള്‍ താഴെപ്പറയുന്നവയാണ്

1. 200-ാം അനുച്ഛേദം പ്രകാരം ഒരു ബില്‍ ലഭിച്ചാല്‍ ഗവര്‍ണര്‍ക്ക് ലഭ്യമായ ഭരണഘടനാപരമായ ഓപ്ഷനുകള്‍ എന്തൊക്കെയാണ്?

2. 200-ാം അനുച്ഛേദം പ്രകാരം ബില്‍ പരിഗണിക്കുമ്പോള്‍ ഗവര്‍ണര്‍ മന്ത്രിസഭയുടെ ഉപദേശം പാലിക്കാന്‍ ബാധ്യസ്ഥനാണോ?

3. 200-ാം അനുച്ഛേദം പ്രകാരം ഗവര്‍ണര്‍ എടുക്കുന്ന തീരുമാനങ്ങള്‍, ബില്‍ നിയമമാകുന്നതിന് മുമ്പ്, നീതിന്യായ പരിശോധനയ്ക്ക് വിധേയമാകുമോ?

4. 361-ാം അനുച്ഛേദം, 200-ാം അനുച്ഛേദം പ്രകാരമുള്ള ഗവര്‍ണര്‍മാരുടെ തീരുമാനങ്ങളെ പൂര്‍ണമായും കോടതി പരിശോധനയില്‍ നിന്ന് സംരക്ഷിക്കുന്നുണ്ടോ?

5. ഭരണഘടനയില്‍ വ്യക്തമായ സമയപരിധി വ്യവസ്ഥ ചെയ്യാത്ത സാഹചര്യത്തില്‍, 200-ാം അനുച്ഛേദം പ്രകാരം ഗവര്‍ണര്‍ക്ക് ബില്ലുകളില്‍ തീരുമാനമെടുക്കാന്‍ കോടതി ഉത്തരവുകളിലൂടെ സമയപരിധി നിശ്ചയിക്കാമോ, അവയുടെ നടപടിക്രമം നിര്‍ദേശിക്കാമോ?

6. 201-ാം അനുച്ഛേദം പ്രകാരം രാഷ്ട്രപതി എടുക്കുന്ന വിവേചനാധികാര തീരുമാനങ്ങള്‍ നീതിന്യായ പരിശോധനയ്ക്ക് വിധേയമാകുമോ?

7. ഭരണഘടനയില്‍ സമയപരിധി വ്യവസ്ഥ ചെയ്യാത്ത സാഹചര്യത്തില്‍, 201-ാം അനുച്ഛേദം പ്രകാരം രാഷ്ട്രപതിയുടെ വിവേചനാധികാര പ്രവര്‍ത്തനങ്ങള്‍ക്ക് കോടതി ഉത്തരവുകളിലൂടെ സമയപരിധി നിശ്ചയിക്കാമോ, അവയുടെ നടപടിക്രമം നിര്‍ദേശിക്കാമോ?

8. ഗവര്‍ണര്‍ ഒരു ബില്‍ രാഷ്ട്രപതിയുടെ പരിഗണനയ്ക്ക് അയക്കുമ്പോള്‍, രാഷ്ട്രപതി 143-ാം അനുച്ഛേദം പ്രകാരം സുപ്രീം കോടതിയുടെ ഉപദേശം തേടേണ്ടതുണ്ടോ, കോടതിയുടെ അഭിപ്രായം സ്വീകരിക്കേണ്ടതുണ്ടോ?

9. "പൂര്‍ണ നീതി" ഉറപ്പാക്കാന്‍ സുപ്രീം കോടതിക്ക് 142-ാം അനുച്ഛേദം ഉപയോഗിച്ച്, ഭരണഘടനയിലോ നിയമത്തിലോ ഉള്ള വ്യവസ്ഥകള്‍ക്ക് വിരുദ്ധമായ ഉത്തരവുകള്‍ പുറപ്പെടുവിക്കാന്‍ കഴിയുമോ?

10. ഗവര്‍ണര്‍ക്കോ രാഷ്ട്രപതിക്കോ ബില്ലുകള്‍ക്ക് "ഡീംഡ് അസന്റ്" (സ്വയമേ അംഗീകരിക്കപ്പെട്ടതായി കണക്കാക്കല്‍) നല്‍കാന്‍ ഭരണഘടന അനുവദിക്കുന്നുണ്ടോ?

11. ഒരു ബില്‍ നിയമമാകുന്നതിന് മുമ്പ്, അതിന്റെ ഉള്ളടക്കം കോടതികള്‍ക്ക് പരിശോധിക്കാമോ?

12. ഫെഡറല്‍ വിഷയങ്ങളില്‍ സംസ്ഥാനങ്ങള്‍ 131-ാം അനുച്ഛേദത്തിന് പകരം 32-ാം അനുച്ഛേദം ഉപയോഗിച്ച് ഹര്‍ജി നല്‍കുന്നത് ഭരണഘടനാപരമായി ശരിയാണോ?

13. 201-ാം അനുച്ഛേദം പ്രകാരം രാഷ്ട്രപതിയുടെ വിവേചനാധികാരം, ഭരണഘടനയുടെ മറ്റ് വ്യവസ്ഥകളുമായി എങ്ങനെ ബന്ധപ്പെട്ടിരിക്കുന്നു?

14. ഭരണഘടനയില്‍ വ്യക്തമായ സമയപരിധി ഇല്ലാത്തപ്പോള്‍, നിയമനിര്‍മാണ പ്രക്രിയയില്‍ കോടതികള്‍ക്ക് എത്രമാത്രം ഇടപെടാന്‍ കഴിയും?