മദ്യപിച്ച് ലക്കുകെട്ട് റോഡിലെ കുഴിയില്‍ വീണയാളെ പുറത്തെടുക്കാതെ ടാര്‍ ചെയ്തു

ഭോപ്പാല്‍: മദ്ധ്യപ്രദേശിലെ കട്‌നി ജില്ലയില്‍ മദ്യലഹരിയില്‍ റോഡില്‍ വീണയാളെ പുറത്തെടുക്കാതെ റോഡ് ടാര്‍ ചെയ്തു. ടാറിംഗ് ജോലികള്‍ നടത്തിയ കരാറുകാരന്റെ അവഗണനയാണ് 45കാരനായ ലട്ടോരി ബാര്‍മാന്റെ മരണത്തിന് ഇടയാക്കിയത് . ഇയാള്‍ കുഴിയില്‍ വീണതായി തൊഴിലാളികള്‍ സംശയം പ്രകടിപ്പിച്ചെങ്കിലും അത് കാര്യമാക്കാതെ ടാറിംഗ് പൂര്‍ത്തിയാക്കാന്‍ കരാറുകാരന്‍ പറയുകയായിരുന്നു.

ലട്ടോരി ബാര്‍മാന്‍ റോഡിലെ കുഴിയില്‍ വീഴുന്നത് തൊഴിലാളികള്‍ കണ്ടിരുന്നില്ല . പക്ഷേ ടാറിംഗ് നടത്തുന്നതിനിടെ ആരോ കുഴയില്‍ അകപ്പെട്ടതായി ഇവര്‍ കരാറുകാരനോട് സംശയം പ്രകടിപ്പിച്ചിരുന്നു . എന്നാല്‍ കുഴിയ്ക്ക് മീതെ ടാറിംഗ് നടത്താന്‍ ഇയാള്‍ പറയുകയായിരുന്നു .

പക്ഷേ ടാറിംഗിനായി നിരത്തിയ കല്ലുകള്‍ക്ക് മുകളിലൂടെ ഇയാളുടെ കൈ പുറത്ത് കണ്ടതിനെത്തുടര്‍ന്നാണ് സംഭവം പൊതുമരാമത്ത് വകുപ്പ് ഉദ്യോഗസ്ഥരുടെ ശ്രദ്ധയില്‍ പെടുന്നത് . തുടര്‍ന്ന് കുഴിമാന്തി പുറത്തെടുത്തപ്പോഴേയ്ക്കും ലട്ടോരി മരിച്ചു.

ശ്ലീമാനാബാദില്‍ ഭാര്യ വീട്ടില്‍ ഒരു ചടങ്ങിനെത്തിയതായിരുന്നു ലട്ടോരി . ഭാര്യയെ സ്വന്തം വീട്ടിലാക്കി നാട്ടിലേയ്ക്ക് മടങ്ങുകയായിരുന്നു ഇയാള്‍. ഇതിനിടയില്‍ മദ്യപിച്ച് ലക്കുകെട്ടാണ് ലട്ടോരി കുഴിയില്‍ വീണതും മരിച്ചതും.

English summary

Drunk man falls in ditch, contractor builds road over him