പ്രിന്സിപ്പാളിന് ഉറങ്ങാന് പെണ്കുട്ടികളുടെ തലയിണ
ബാംഗ്ലൂര്: ഒരു അധ്യാപകന് എങ്ങനെയാകരുതെന്നതിന്റെ ഉദാഹരണവുമായി ബാംഗ്ലൂരില് നിന്നൊരു വാര്ത്ത. രാത്രി കിടന്നുറങ്ങാന് സ്കൂളിലെ വിദ്യാര്ത്ഥിനികളുടെ തലയിണ കടം വാങ്ങുന്ന സ്കൂള് പ്രിന്സിപ്പാളാണ് പിടിയിലായിരിക്കുന്നത്.
കിട്ടൂര് റാണി ചെന്നമ്മ റെസിഡന്ഷ്യല് സ്കൂളിലെ പിന്സിപ്പാള് മല്ലികാര്ജ്ജുന് സ്വാമിയാണ് പിടിയിലായത്. പെണ്കുട്ടികളുടെ ഹോസ്റ്റല് ഇടനാഴിയില് മദ്യപിച്ച് നൃത്തം വച്ചതിനാണ് ഇയാളെ ഇപ്പോള് അറസ്റ്റ് ചെയ്തത്.
കന്നട ടിവി ചാനലായ ടിവി 9 ഇതിന്റെ ദൃശ്യങ്ങള് പുറത്തുവിട്ടതോടെയാണ് അറസ്റ്റ്. അപ്പോഴാണ് അധ്യാപകന്റെ തലയിണ പ്രേമം സംബന്ധിച്ച വിവരങ്ങളും പുറത്തായത്. പ്രിന്സിപ്പാളും സഹായി കാര്ത്തിയും ആണ് ഹോസ്റ്റലില് മദ്യപിച്ച് നൃത്തം വച്ചത്.
കഴിഞ്ഞ മെയ് മാസത്തില് മാത്രമാണ് മല്ലികാര്ജ്ജുന് സ്വാമി സ്കൂളില് പ്രിന്സിപ്പാളായി ജോലിയില് പ്രവേശിച്ചത്. അന്ന് മുതല് രാത്രിയില് പെണ്കുട്ടികളുടെ തലയിണ കടം വാങ്ങുന്നത് ഇയാള് പതിവാക്കിയിരുന്നത്രെ. തലയിണ മാത്രമല്ല, പലപ്പോഴും കിടക്കവിരികളും കിടക്കയും എല്ലാം ഇയാള് കടംവാങ്ങുമായിരുന്നത്രെ. കുട്ടികള് ഇക്കാര്യം രക്ഷിതാക്കളെ അറിയിക്കുകയും ചെയ്തിരുന്നു.
ബാംഗ്ലൂര് റൂറല് എസ്പി രമേഷ് നാഥിന്റെ നേതൃത്വത്തിലാണ് അധ്യാപകനേയും സഹായിയേയും അറസ്റ്റ് ചെയ്തത്. ഇയാളുടെ ഫോണില് നിന്ന് നിരവധി പെണ്കുട്ടികളുടെ ചിത്രങ്ങളും കണ്ടെടുത്തിട്ടുണ്ട്.