ബെംഗളൂരുവില്‍ ഇ-സിഗരറ്റ് നിരോധിച്ചു

ബെംഗളൂരു: പുകയില ഉത്പനങ്ങള്‍ നിരോധിക്കുന്നതിന്റെ ഭാഗമായി ബെംഗളൂരു സിറ്റിയില്‍ ഇ-സിഗരറ്റ് പൂര്‍ണമായും നിരോധിക്കാന്‍ കര്‍ണാടക സര്‍ക്കാര്‍ ഉത്തരവ്. സാധാരണ സിഗരറ്റുകളേക്കാള്‍ ഇ-സിഗരറ്റുകള്‍ക്കാണ് ഇപ്പോള്‍ സിറ്റികളില്‍ പ്രിയമേറുന്നത്. പുകയില ഉത്പനങ്ങളുടെ അതേ ശാരീര പ്രശ്‌നങ്ങള്‍ തന്നെയാണ് ഇ-സിഗരറ്റും വരുത്തുന്നത് എന്നാണ് പഠനങ്ങള്‍ പറയുന്നത്.

ഹെല്‍ത്ത് ആന്‍ഡ് ഫാമിലി വെല്‍ഫെയര്‍ വകുപ്പുമായി നടത്തിയ ചര്‍ച്ചയിലാണ് ഇ-സിഗരറ്റ് നിരോധിക്കുന്നതിന് തീരമാനമായത്. വില്‍പനയും ഉപയോഗവും നഗരത്തില്‍ നിന്നും തുടച്ചു നീക്കാനാണ് പദ്ധതിയിടുന്നത്. നഗരത്തിലെ ഒട്ടുമിക്ക യുവാക്കളും ഇ-സിഗരറ്റിന് അടിമകളാണെന്ന് പഠനങ്ങള്‍ പറയുന്നു. ഇത് നിരോധിക്കുന്നത് സംബന്ധിച്ച് ഒരാഴ്ചയ്ക്കുള്ളില്‍ ഉത്തരവ് ഇറക്കുമെന്ന് മന്ത്രി പറഞ്ഞു.

ചെറുപ്പക്കാരെ ലഹരിയില്‍ നിന്നും പരിപൂര്‍ണമായി അകറ്റി നിര്‍ത്തുകയാണ് ആരോഗ്യ വകുപ്പിന്റെ ലക്ഷ്യമെന്ന് മന്ത്രി പറഞ്ഞു. മാസങ്ങള്‍ നീണ്ട പഠനങ്ങള്‍ക്ക് ശേഷമാണ് ഇ-സിഗരറ്റ് ആരോഗ്യത്തിന് എത്രമാത്രം ഹാനികരമാണെന്ന് കണ്ടെത്തിയത്. സ്ഥിരമായുള്ള ഇതിന്റെ ഉപയോഗം നിക്കോട്ടിനിന് അടിമകളാക്കുകയാണ് ചെയ്യുന്നതെന്നും മന്ത്രി പറഞ്ഞു.

പഞ്ചാബ്, മഹാരാഷ്ട്ര, ചണ്ഡീഗഡ് എന്നിവിടങ്ങളില്‍ ഇ-സിഗരറ്റ് പൂര്‍ണമായും നിരോധിച്ചു കഴിഞ്ഞു. പല സംസ്ഥാനങ്ങളിലും ഗുഡ്ക, പാന്‍മസാല പോലുള്ള ലഹരി ഉത്പനങ്ങളും നിരോധിച്ചിട്ടുണ്ട്. ഇ-സിഗരറ്റുകള്‍ മരുന്നുവില്‍പ്പനശാലകളില്‍ പോലും വില്‍ക്കപ്പെടുന്ന എന്നതാണ് ശ്രദ്ധേയം. ആരോഗ്യത്തിന് ഹാനികരമായ വസ്തു മെഡിക്കല്‍ ഷോപ്പുകളില്‍ വില്‍ക്കുന്നതിനെതിരെ ആക്ഷേപങ്ങള്‍ ഉയരുന്നുണ്ട്.

English summary

Campaigns warning people of the health hazards of smoking seldom address the dangers posed by e-cigarettes, which are equally harmful. However, the Karnataka government, acting on the advice of the high power committee on tobacco control, is all set to implement a ban on the product.