E10 പെട്രോള് തിരിച്ചെത്തും..! പക്ഷെ വില ലിറ്ററിന് 8 രൂപയോളം കൂടും; പ്രീമിയം ഇന്ധനമാക്കാന് നീക്കം
പഴയ വാഹനങ്ങളുടെ ഉടമകള്ക്ക് പ്രത്യേക ഇന്ധന അടിസ്ഥാന സൗകര്യങ്ങള് ഒരുക്കാതെ തന്നെ E10 ഇന്ധനം ലഭ്യമാക്കുന്നതിനുള്ള വഴികള് സര്ക്കാര് തേടുന്നു. ഇതിന്റെ ഭാഗമായി, ഇന്ത്യന് ഓയിലിന്റെ XP95, ഭാരത് പെട്രോളിയത്തിന്റെ SPEED, ഹിന്ദുസ്ഥാന് പെട്രോളിയത്തിന്റെ Power95 തുടങ്ങിയ പ്രീമിയം പെട്രോള് ബ്രാന്ഡുകള് 10% എഥനോള് മിശ്രിതത്തോടെ വില്ക്കാന് കഴിയുമോ എന്ന് സര്ക്കാര് പരിശോധിച്ചുവരികയാണെന്ന് ലൈവ്മിന്റ് റിപ്പോര്ട്ട് ചെയ്യുന്നു.
പെട്രോളിയം മന്ത്രാലയം ഇക്കാര്യം പൊതുമേഖലാ എണ്ണ വിപണന കമ്പനികളായ ഇന്ത്യന് ഓയില് കോര്പ്പറേഷന്, ഭാരത് പെട്രോളിയം കോര്പ്പറേഷന്, ഹിന്ദുസ്ഥാന് പെട്രോളിയം കോര്പ്പറേഷന് എന്നിവരുമായി ചര്ച്ച ചെയ്യുന്നുണ്ടെന്ന് വിഷയവുമായി ബന്ധപ്പെട്ട വൃത്തങ്ങള് മിന്റിനോട് പറഞ്ഞു. ചര്ച്ചകള് പ്രാഥമിക ഘട്ടത്തിലാണെന്നും അന്തിമ തീരുമാനമൊന്നും എടുത്തിട്ടില്ലെന്നും റിപ്പോര്ട്ടില് പറയുന്നു.
പഴയ വാഹനങ്ങളില് E20 പെട്രോള് ചെലുത്തുന്ന സ്വാധീനത്തെക്കുറിച്ചും ഇന്ധനക്ഷമതയെക്കുറിച്ചും വാഹന ഉടമകള്ക്കിടയില് നിലനില്ക്കുന്ന ആശങ്കകള്ക്കിടയിലാണ് ഈ നിര്ദ്ദേശം വരുന്നത്. 20% എഥനോള് അടങ്ങിയ E20 ആണ് നിലവില് ഇന്ത്യയിലുടനീളമുള്ള ഇന്ധന സ്റ്റേഷനുകളില് ലഭ്യമായ സാധാരണ പെട്രോള് മിശ്രിതം. പരിഗണനയിലുള്ള നിര്ദ്ദേശപ്രകാരം, പ്രീമിയം 95-ഒക്ടൈയ്ന് പെട്രോള് E10 ആയി ലഭ്യമാക്കാന് സാധിക്കും.
ഇതിലൂടെ, പ്രീമിയം പെട്രോളിനായി നിലവിലുള്ള അടിസ്ഥാന സൗകര്യങ്ങള് ഉപയോഗപ്പെടുത്തിക്കൊണ്ടുതന്നെ പഴയ വാഹനങ്ങളുടെ ഉടമകള്ക്ക് കുറഞ്ഞ അളവില് എഥനോള് അടങ്ങിയ ഇന്ധനം ഉപയോഗിക്കാന് അവസരം ലഭിക്കും. ഉയര്ന്ന വിലയില് വില്ക്കുന്ന 95-ഒക്ടൈയ്ന് പെട്രോള് ആണ് നിലവിലെ പ്രതിസന്ധിക്ക് പരിഗണനയിലുള്ള പരിഹാരങ്ങളില് ഒന്നെന്ന് സര്ക്കാര് വൃത്തങ്ങള് കൂട്ടിച്ചേര്ത്തു.
ഉപഭോക്താക്കള്ക്ക് പ്രീമിയം E10 ഇന്ധനമാണോ അതോ വില കുറഞ്ഞ സാധാരണ E10 ഇന്ധനമാണോ കൂടുതല് താല്പ്പര്യമെന്ന് സര്ക്കാര് പരിശോധിച്ചുവരികയാണ്. E20 ഇന്ധനത്തെക്കുറിച്ച്, പ്രത്യേകിച്ച് പഴയ വാഹനങ്ങളുടെ ഉടമകള്ക്കിടയില് വര്ധിച്ചുവരുന്ന ആശങ്കകളെത്തുടര്ന്നാണ് ഇത്തരം ചര്ച്ചകള് നടക്കുന്നത്. E20 ഇന്ധനം വാഹനങ്ങള്ക്ക് വ്യാപകമായ കേടുപാടുകള് വരുത്തുന്നില്ലെന്ന് കേന്ദ്രസര്ക്കാര് ആവര്ത്തിച്ച് വ്യക്തമാക്കിയിട്ടുണ്ട്.
എഥനോള് മിശ്രണം മൂലം എന്ജിന് തകരാറുകളോ വാഹനങ്ങള് പ്രവര്ത്തനരഹിതമാകുന്നതോ വ്യാപകമായി സംഭവിക്കുന്നതിന് തെളിവുകളില്ലെന്ന് വ്യക്തമാക്കിയ സര്ക്കാര്, E20 ഉപയോഗിക്കുമ്പോള് E10ന് അനുയോജ്യമായ വാഹനങ്ങളുടെ ഇന്ധനക്ഷമതയില് 3-5 ശതമാനം വരെ നേരിയ കുറവുണ്ടാകാമെന്ന് സമ്മതിച്ചിരുന്നു. എന്നിരുന്നാലും, വാഹനങ്ങളുടെ മൈലേജ്, അനുയോജ്യത എന്നിവയെക്കുറിച്ചുള്ള ആശങ്കകള് വാഹന ഉടമകളും ഉപഭോക്തൃ സംഘടനകളും ഉന്നയിച്ചുകൊണ്ടേയിരിക്കുകയാണ്.
2023 ഏപ്രിലിന് മുന്പ് വിറ്റഴിച്ച വാഹനങ്ങള് പൊതുവെ E10ന് അനുയോജ്യമായവയാണെന്ന് സാക്ഷ്യപ്പെടുത്തിയിരുന്നെങ്കിലും, പഴയ വാഹനങ്ങളുടെ ഉടമകള്ക്കിടയിലാണ് ആശങ്കകള് കൂടുതലായി കാണപ്പെടുന്നത്. പെട്രോളിനെ അപേക്ഷിച്ച് എഥനോളിന് ഊര്ജ്ജ സാന്ദ്രത കുറവാണ്. അതിനാല്, പെട്രോളില് എഥനോളിന്റെ അളവ് കൂടുമ്പോള് ഇന്ധനക്ഷമത കുറയാന് സാധ്യതയുണ്ട്.
E10നെ അപേക്ഷിച്ച് E20 ഉപയോഗിക്കുമ്പോള് മൈലേജ് കുറയാനുള്ള സാധ്യത കൂടുതലാണെന്ന് വിവിധ പഠനങ്ങളും വ്യവസായ വിലയിരുത്തലുകളും സൂചിപ്പിക്കുന്നു എങ്കിലും, വാഹനത്തിന്റെ തരവും ഡ്രൈവിംഗ് സാഹചര്യങ്ങളും അനുസരിച്ച് ഇതില് വ്യത്യാസം വരാം. പഴയ വാഹനങ്ങളുടെ ഉടമകള്ക്കുള്ള ആശങ്കകള് പരിഹരിക്കുന്നതിനായി E20നൊപ്പം കുറഞ്ഞ അളവില് എഥനോള് അടങ്ങിയ പെട്രോള് കൂടി ലഭ്യമാക്കണമെന്ന് മുഖ്യ സാമ്പത്തിക ഉപദേഷ്ടാവ് വി. അനന്ത നാഗേശ്വരന് അടുത്തിടെ അഭിപ്രായപ്പെട്ടിരുന്നു.
ഇതോടെയാണ് ഈ വിഷയം സംബന്ധിച്ച ചര്ച്ചകള് സജീവമായത്. ഇന്ധന സ്റ്റേഷനുകളില് ഒരു അധിക ഓപ്ഷനായി E10 ലഭ്യമാക്കണമെന്നും അദ്ദേഹം വാദിച്ചു. രാജ്യവ്യാപകമായി E10 പെട്രോള് ഒരു പ്രത്യേക വിഭാഗമായി വീണ്ടും അവതരിപ്പിക്കുന്നതിലെ ഏറ്റവും വലിയ പ്രായോഗിക തടസം ഒഴിവാക്കാന് ഈ നിര്ദ്ദേശത്തിലൂടെ സാധിക്കുമെന്ന് 'മിന്റ്' റിപ്പോര്ട്ട് ചെയ്യുന്നു.
XP95, SPEED, Power95 എന്നിവ നിലവില് പ്രീമിയം 95-ഒക്ടൈയ്ന് ഇന്ധനങ്ങളായി വിപണിയിലുണ്ട്. ഇവയില് നിലവില് E20 അടങ്ങിയിട്ടുണ്ടെങ്കിലും, ജ്വലനശേഷി മെച്ചപ്പെടുത്തുന്നതിനും എന്ജിന് ഭാഗങ്ങള് വൃത്തിയാക്കുന്നതിനും തുരുമ്പെടുക്കലില് നിന്ന് സംരക്ഷിക്കുന്നതിനുമുള്ള പ്രത്യേക ഘടകങ്ങളും ഇവയില് ചേര്ത്തിട്ടുണ്ട്. E20നെക്കുറിച്ച് ആശങ്കയുള്ള വാഹന ഉടമകള് ഉയര്ന്ന ഒക്ടൈയ്ന് ശേഷിയുള്ള ഇന്ധനങ്ങളിലേക്ക് മാറുന്നതോടെ, എണ്ണ വിപണന കമ്പനികളുടെ ആകെ പെട്രോള് വില്പ്പനയില് ഈ പ്രീമിയം ഇന്ധനങ്ങളുടെ വിഹിതം 4 ശതമാനത്തില് നിന്ന് ഏകദേശം 15 ശതമാനമായി ഉയര്ന്നിരുന്നു.
പൊതുമേഖലാ പെട്രോള് പമ്പുകളില് ഇവ ലഭ്യമാണ്. എന്നാല് സാധാരണ പെട്രോളിന് ഏകദേശം 102 രൂപ വിലയുള്ളപ്പോള് ഡല്ഹിയില് ഇവയ്ക്ക് ലിറ്ററിന് 110-115 രൂപയാണ് വില. നിലവിലുള്ള പ്രീമിയം പെട്രോള് വിതരണ സംവിധാനം ഉപയോഗിക്കുന്നത് E10 പെട്രോള് അവതരിപ്പിക്കുന്നത് താരതമ്യേന എളുപ്പമാക്കുമെന്ന് ഇന്ധന ഡീലര്മാര് അഭിപ്രായപ്പെട്ടു.
Click it and Unblock the Notifications
Sign in with Google