ജോലിക്ക് പോകാതെ തന്നെ മാസം 9,250 രൂപ അക്കൗണ്ടിലെത്തും! കിടിലൻ പദ്ധതി

സമ്പാദ്യം സുരക്ഷിതമായിരിക്കാനും ഒപ്പം ഓരോ മാസവും നിശ്ചിത തുക വരുമാനമായി ലഭിക്കാനും ആഗ്രഹിക്കുന്നവർക്ക് ഏറ്റവും മികച്ച നിക്ഷേപ മാർഗമാണ് പോസ്റ്റ് ഓഫീസ് മന്ത്‌ലി ഇൻകം സ്കീം (POMIS). കേന്ദ്ര സർക്കാർ ഗ്യാരണ്ടി നൽകുന്ന ഈ പദ്ധതിയിൽ നിലവിൽ 7.4 ശതമാനമാണ് പലിശ നിരക്ക്.

എങ്ങനെ മാസം 9,250 രൂപ ലഭിക്കും?
ഈ പദ്ധതിയിൽ ഒരാൾക്ക് വ്യക്തിഗതമായോ ജോയിന്റ് അക്കൗണ്ടായോ നിക്ഷേപം നടത്താം. ജോയിന്റ് അക്കൗണ്ടിൽ പരമാവധി 15 ലക്ഷം രൂപ വരെ നിക്ഷേപിക്കാം. 15 ലക്ഷം രൂപ 7.4% പലിശ നിരക്കിൽ നിക്ഷേപിച്ചാൽ പ്രതിവർഷം 1,11,000 രൂപ പലിശയായി ലഭിക്കും. ഇത് 12 മാസത്തേക്ക് വീതിക്കുമ്പോൾ ഓരോ മാസവും 9,250 രൂപ കൃത്യമായി നിങ്ങളുടെ അക്കൗണ്ടിലെത്തും. സിംഗിൾ അക്കൗണ്ടിൽ ഒരാൾക്ക് പരമാവധി 9 ലക്ഷം രൂപ വരെ നിക്ഷേപിക്കാം. ഇതിലൂടെ പ്രതിമാസം 5,550 രൂപ വരുമാനം ലഭിക്കും.

പദ്ധതിയുടെ പ്രധാന പ്രത്യേകതകൾ
കുറഞ്ഞത് 1,000 രൂപ മുതൽ നിക്ഷേപം തുടങ്ങാം. വ്യക്തിഗത അക്കൗണ്ടിൽ 9 ലക്ഷവും ജോയിന്റ് അക്കൗണ്ടിൽ (പരമാവധി 3 പേർ) 15 ലക്ഷവുമാണ് പരിധി. 5 വർഷമാണ് ഈ പദ്ധതിയുടെ കാലാവധി. കാലാവധിക്ക് ശേഷം തുക പിൻവലിക്കുകയോ വീണ്ടും നിക്ഷേപിക്കുകയോ ചെയ്യാം. കേന്ദ്ര സർക്കാർ നേരിട്ട് നടത്തുന്ന പദ്ധതിയായതിനാൽ നിക്ഷേപത്തിന് പൂർണ്ണ സുരക്ഷയുണ്ട്. വിപണിയിലെ മാറ്റങ്ങൾ പലിശയെ ബാധിക്കില്ല. എന്നാൽ 1-3 വർഷത്തിനുള്ളിൽ പിൻവലിക്കുകയാണെങ്കിൽ നിക്ഷേപത്തിന്റെ 2 ശതമാനവും, 3-5 വർഷത്തിനുള്ളിലാണെങ്കിൽ 1 ശതമാനവും പിഴയായി ഈടാക്കും.

ആർക്കൊക്കെ അക്കൗണ്ട് തുടങ്ങാം?
ഇന്ത്യൻ പൗരത്വമുള്ള ഏതൊരാൾക്കും പോസ്റ്റ് ഓഫീസ് വഴി ഈ അക്കൗണ്ട് തുടങ്ങാം. പ്രായപൂർത്തിയാകാത്തവരുടെ പേരിൽ രക്ഷിതാക്കൾക്കും അക്കൗണ്ട് തുടങ്ങാൻ സാധിക്കും. 10 വയസ്സിന് മുകളിലുള്ള കുട്ടികൾക്ക് സ്വന്തം പേരിൽ അക്കൗണ്ട് കൈകാര്യം ചെയ്യാനും അവസരമുണ്ട്. സ്ഥിരവരുമാനം ആഗ്രഹിക്കുന്ന മുതിർന്ന പൗരന്മാർക്കും വീട്ടമ്മമാർക്കും തങ്ങളുടെ സമ്പാദ്യം സുരക്ഷിതമായി വളർത്താൻ ഈ പോസ്റ്റ് ഓഫീസ് പദ്ധതി വലിയ സഹായമാകും.