തിരഞ്ഞെടുപ്പ് പ്രചരണത്തിന് പരിധിയില്‍ കവിഞ്ഞ പണം; സണ്ണി ഡിയോളിന് സീറ്റ് നഷ്ടപ്പെട്ടേക്കും

അമൃത്സര്‍: തിരഞ്ഞെടുപ്പ് പ്രചരണത്തിന് പരിധിയില്‍ കവിഞ്ഞ് പണമൊഴുക്കിയെന്ന് ചൂണ്ടിക്കാട്ടി ഗുരുദാസ്പൂര്‍ മണ്ഡലത്തിലെ ബിജെപി എംപിയും നടനുമായ സണ്ണി ഡിയോളിനെതിരെ തിരഞ്ഞെടുപ്പ് കമ്മീഷന്‍. വിഷയത്തില്‍ സണ്ണി ഡിയോളിനെതിരെ കമ്മീഷന്‍ നോട്ടീസ് അയക്കും.

പ്രചരണത്തിന് 70 ലക്ഷമായിരുന്നു പരിധി. എന്നാല്‍ സണ്ണി ഡിയോള്‍ 86 ലക്ഷം രൂപ പ്രചരണത്തിനായി ചെലവഴിച്ചെന്നാണ് തിരഞ്ഞെടുപ്പ് കമ്മീഷന്‍ കണ്ടെത്തിയിരിക്കുന്നത്. പരിധിയില്‍ കവിഞ്ഞ തുക സണ്ണി ഡിയോള്‍ ഉപയോഗിച്ചെന്ന് കാണിച്ച് നിരവധി പരാതികള്‍ തിരഞ്ഞെടുപ്പ് കമ്മീഷന് ലഭിച്ചിരുന്നു. വീഴ്ച വരുത്തിയെന്ന് കണ്ടെത്തിയാല്‍ സണ്ണിയ്ക്കെതിരെ നടപടിയുണ്ടായേക്കും. സ്ഥാനാര്‍ത്ഥികളെ നീക്കം ചെയ്ത് മണ്ഡലത്തില്‍ രണ്ടാമത് വന്ന സ്ഥാനാര്‍ത്ഥിയെ വിജയിയായി പ്രഖ്യാപിക്കാനുള്ള അധികാരം കമ്മീഷനുണ്ട്.

ലോക്സഭ തിരഞ്ഞെടുപ്പ് അടുക്കവെ അപ്രതീക്ഷമായിട്ടായിരുന്നു ഗുരുദാസ്പൂരില്‍ സണ്ണി ഡിയോളിനെ ബിജെപി സ്ഥാനാര്‍ത്ഥിയായി പ്രഖ്യാപിച്ചത്. പഞ്ചാബ് കോണ്‍ഗ്രസ് അധ്യക്ഷന്‍ സുനില്‍ ദഗാറുമായിട്ടായിരുന്നു സണ്ണി ഏറ്റുമുട്ടിയത്. 80,000 വോട്ടുകള്‍ക്കായിരുന്നു സണ്ണിയുടെ വിജയം. ബോളിവുഡ് താരം വിനോദ് ഖന്നയായിരുന്നു 2014 ല്‍ ബിജെപി ടിക്കറ്റില്‍ ഇവിടെ നിന്ന് മത്സരിച്ച് ജയിച്ചത്.

ചൊവ്വാഴ്ചയായിരുന്നു സണ്ണി ഡിയോളിന്റെ സത്യപ്രതിജ്ഞ. വെള്ള ഷര്‍ട്ടും ജീന്‍സു കോട്ടും ധരിച്ചായിരുന്നു അദ്ദേഹം സത്യപ്രതിജ്ഞ ചടങ്ങിന് എത്തിയിരുന്നത്. ഭാരത് മാതാ കി ജയ് വിളിച്ചായിരുന്നു സത്യപ്രതിജ്ഞയ്ക്ക് എത്തിയ സണ്ണി ഡിയോളിനെ ബിജെപി പ്രവര്‍ത്തകര്‍ വരവേറ്റത്.

English summary

EC to send notice to Sunny Deol for over spending in election campaign