ഓംലെറ്റില് ഉള്ളിയിടാത്തതിന് വെടി
ലഖ്നൗ: ഓംലെറ്റില് ഉള്ളി ചേര്ക്കാത്തതിന് തട്ടുകടക്കാരനെ വെടിവച്ച് കൊല്ലാന് ശ്രമം. ലഖ്നൗവിനടുത്ത് അലിഗഞ്ച് മാര്ക്കറ്റില് ആണ് സംഭവം നടന്നത്. തട്ടുകട നടത്തിപ്പുകാരനായ ദീപു കശ്യപിനാണ് വെടിയേറ്റത്.
2013 സെപ്റ്റംബര് 22 ന് വൈകുന്നേരം 7.30 ഓടെയാണ് പ്രശ്നങ്ങള് തുടങ്ങിയത്. യോഗേഷ് എന്ന് വിളിക്കപ്പെടുന്ന ഖുറാനയും, നാല് സുഹൃത്തുക്കളും കടയിലെത്തി കശ്യപിനോട് ഓംലെറ്റ് ആവശ്യപ്പെട്ടു. കശ്യപ് ഓംലെറ്റ് ഉണ്ടാക്കിക്കൊടുക്കുകയും ചെയ്തു.
ഒരു കഷ്ണം വായില് വച്ചപ്പോള് തന്നെ ഖുറാനക്ക് കാര്യം മനസ്സിലായി. ഓംലെറ്റില് ഉള്ളി ചേര്ത്തിട്ടില്ല. ഉള്ളിക്ക് എത്ര വിലകൂടിയാലും ഓംലെറ്റില് അതില്ലെങ്കില് ശരിയാകില്ലെന്ന പക്ഷക്കാരനായിരുന്നു ഖുറാന. ഉടന് തന്നെ തര്ക്കവും തുടങ്ങി.
ഖുറാനക്കൊപ്പം സുഹൃത്തുക്കളും കൂടി ചെര്ന്നതോടെ കശ്യപിന്റെ കാര്യം കഷ്ടത്തിലായി. അപ്പോഴേക്കും തൊട്ടടുത്തുള്ള കട ഉടമകളെല്ലാം കശ്യപിനെ രക്ഷിക്കാന് ഓടിക്കൂടി. അതോടെ കാര്യങ്ങള് എല്ലാം തിരിഞ്ഞുമറിഞ്ഞു. ഖുറാനക്കും കൂട്ടര്ക്കും രക്ഷയില്ല എന്ന അവസ്ഥയായി.
കാര്യങ്ങള് കൈവിട്ട് പോകുന്ന സാഹചര്യമെത്തിയപ്പോഴാണ് ഖുറാന കയ്യിലിരുന്ന നാടന് തോക്കെടുത്ത് വെടിയുതിര്ത്തത്. കശ്യപിന്റെ തലക്ക് തന്നെയാണ് ഖുറാന വെടിവച്ചത്. ഭാഗ്യത്തിന് തലയിലുരുമ്മിയാണ് വെടിയുണ്ട കടന്നുപോയത്. ചെറുതായി പരിക്കേറ്റ കശ്യപിനെ അടുത്തുള്ള ആശുപത്രിയില് പ്രവേശിപ്പിച്ചു. വെടിവപ്പുണ്ടായ ഉടന് തന്നെ ഖുറാനയും സംഘവും സ്ഥലത്ത് നിന്ന് മുങ്ങി.
സംഭവത്തില് ഖുറാക്കും സുഹൃത്തുക്കള്ക്കും എതിരെ പോലീസ് കേസെടുത്തു. പ്രതികള്ക്കായുള്ള തിരച്ചില് തുടരുകയാണെന്ന് പോലീസ് അറിയിച്ചു.