മുസ്ലീങ്ങളെ തുരത്തണമെന്ന് തൊഗാഡിയ

രാജ്‌കോട്ട്: ഹിന്ദുക്കളുടെ സ്ഥലങ്ങളില്‍ നിന്ന് മുസ്ലീങ്ങളെ തുരത്തണമെന്ന് വിശ്വ ഹിന്ദു പരിഷത്ത് പ്രസിഡന്റ് പ്രവീണ്‍ തൊഗാഡിയ. ഭാവ്‌നഗറില്‍ വച്ചായിരുന്നു തൊഗാഡിയുടെ പ്രസംഗം.

ഹിന്ദുക്കള്‍ ഭൂരിപക്ഷമുള്ള സ്ഥലങ്ങളില്‍ മുസ്ലീങ്ങള്‍ ഭൂമി വാങ്ങിക്കുന്നതിനെതിരെയായിരുനനു തൊഗാഡിയയുടെ ആക്രോശം. ഭാവ്‌നഗറില്‍ ഒരു മുസ്ലീം വീടുവാങ്ങിയതിനെതിരെ വിശ്വഹിന്ദു പരിഷത്തും ബജ്‌റംഗ് ദളും ചേര്‍ന്ന് നടത്തിയ പ്രകടത്തിലും തൊഗാഡിയ പങ്കെടുത്തു.

മുസ്ലീം മതവിശ്വാസിയായ ആള്‍ പണം കൊടുത്തുവാങ്ങിയ വീട് പിടിച്ചെടുക്കാനാണ് തൊഗാഡിയ ആവശ്യപ്പെട്ടത്. വീട് പിടിച്ചെടുത്ത് ബജ്‌റംഗ് ദളിന്റെ ബോര്‍ഡ് സ്ഥാപിക്കാനും തൊഗാഡിയ ആവശ്യപ്പെട്ടു.

മുസ്ലീങ്ങള്‍ ഹിന്ദുക്കളുടെ സ്ഥലം വാങ്ങുന്നത് തടയാന്‍ രണ്ട് വഴികളുണ്ടെന്നാണ് അനുയായികളോട് തൊഗാഡിയ പറഞ്ഞത്. ഭാവ്‌നഗറില്‍ ഡിസ്റ്റര്‍ബ്ഡ് ഏറിയ ആക്ട് നടപ്പാക്കാന്‍ സംസ്ഥാന സര്‍ക്കാരില്‍ സമ്മര്‍ദ്ദം ചെലുത്തുകയാണ് ഒന്ന്. അങ്ങനെയെങ്കില്‍ വ്യത്യസ്ത മതവിഭാഗങ്ങള്‍ക്കിടയിലുള്ള ഭൂമി കൈമാറ്റം നടത്താനാവില്ല.

രണ്ടാമത് പറഞ്ഞതാണ് ഞെട്ടിപ്പിക്കുന്ന ഉപായം. മുസ്ലീങ്ങള്‍ വാങ്ങുന്ന വീടുകള്‍ കയ്യേറണം എന്നാണ് തൊഗാഡിയ പറഞ്ഞത്. അതിന്റെ പേരില്‍ കേസെടുത്താലും, ആ കേസില്‍ അന്തിമ തീരുമാനം വരാന്‍ വര്‍ഷങ്ങളെടുക്കുമെന്നതാണ് ഇതില്‍ കാണുന്ന ഗുണം.

വീടുവാങ്ങിയ മുസ്ലീമിന് തൊഗാഡിയ 48 മണിക്കൂറാണ് ഒഴിഞ്ഞുപോകാന്‍ സമയം അനുവദിച്ചിരിക്കുന്നത്. അല്ലാത്ത പക്ഷം കല്ലും ആയുധങ്ങളുമായി വീട് കയ്യേറും. അതില്‍ ഒരു തെറ്റുമില്ല. രാജീവ് ഗാന്ധിയെ വധിച്ചവരെ പോലും തൂക്കി കൊല്ലാത്ത നാടാണിത്. ഒന്നും പേടിക്കേണ്ട- അനുയായികളോട് തൊഗാഡിയ പറഞ്ഞു.

English summary

Evict Muslims from Hindu areas: Pravin Togadia.