തോക്കിന്റെ ആകൃതിയിലുള്ള ലൈറ്റര് ചൂണ്ടി പോലീസെന്ന് തെറ്റിധരിപ്പിച്ച് 17 കാരിയെ പീഡിപ്പിച്ചു
ബെംഗളൂരു: പോലീസ് ആണെന്ന് തെറ്റിധരിപ്പിച്ച് തോക്കിന് സമാനമായ ലൈറ്റര് ചൂണ്ടി ഭീഷണിപ്പെടുത്തി 17കാരിയെ പീഡിപ്പിച്ചു. മൊബൈല് കട ഉടമയായ ശ്രീനാഥ് (32) ആണ് പെണ്കുട്ടിയെ പീഡിപ്പിച്ചത്.പെണ്കുട്ടിയുടെ വീട്ടുകാരുടെ പരാതിയില് ശ്രീനാഥിനെ പോലീസ് അറസ്റ്റ് ചെയ്തു. സംഭവം ഇങ്ങനെ
ജുലൈ രണ്ടാം വാരം പാര്ക്കില് ആണ്സുഹൃത്തിനൊപ്പം പെണ്കുട്ടി സംസാരിക്കുമ്പോള് പോലീസ് ആണെന്ന് തെറ്റിധരിപ്പിച്ച് ശ്രീനാഥ് ഇരുവരേയും പാര്ക്കില് വെച്ച് ചോദ്യം ചെയ്തു. ഇരുവരേയും കുറിച്ച് പരാതി ലഭിച്ചതിന്റെ അടിസ്ഥാനത്തിലാണ് ചോദ്യം ചെയ്യുന്നതെന്ന് ശ്രീനാഥ് കുട്ടികളെ ധരിപ്പിച്ചു. ഇത്തരത്തില് ഇനി ആണ്സുഹൃത്തിനൊപ്പം ഇരിക്കുന്നത് ശ്രദ്ധയില് പെട്ടാല് പെണ്കുട്ടിക്കെതിരെ കേസ് രജിസ്റ്റര് ചെയ്യുമെന്നും ഇയാള് ഭീഷണിപ്പെടുത്തി.
തുടര്ന്ന് ജുലൈ 23 ന് വീട്ടിലേക്ക് നടന്നു പോകുകയായിരുന്ന പെണ്കുട്ടിയെ കാറിലെത്തിയ ശ്രീനാഥ് വഴിയില് തടഞ്ഞു നിര്ത്തി. കാറില് കയറാന് ആവശ്യപ്പെട്ടു. ഭയന്ന കുട്ടി കാറില് കയറി. എന്നാല് എന്തോ പന്തികേട് തോന്നിയതോടെ കുട്ടി കരഞ്ഞു വിളിച്ചു. അതോടെ തോക്കിന്റെ രൂപത്തിലുള്ള സിഗരറ്റ് ലൈറ്റര് കാണിച്ച് ഇയാള് പെണ്കുട്ടിയെ കൊല്ലുമെന്ന് ഭീഷണിപ്പെടുത്തി. തുടര്ന്ന് തന്റെ മുറിയില് എത്തിച്ച് പീഡിപ്പിക്കുകയായിരുന്നു.
പെണ്കുട്ടി കാര്യം തുറന്ന് പറഞ്ഞുപ്പോഴാണ് വീട്ടുകാര് സംഭവം അറിഞ്ഞത്. ഉടന് തന്നെ വീട്ടുകാര് പോലീസില് പരാതി നല്കി. പരാതിയില് പോസ്കോ നിയമപ്രകാരം ശ്രീനാഥിനെതിരെ കേസെടുത്ത് അറസ്റ്റ് ചെയ്തു.