വ്യാജനെപ്പേടിച്ച് ഇറക്കിയ 2000 രൂപയ്ക്കും വ്യാജന്‍, മോദി ഇഫക്ട് പാഴായോ?

എപിഎംസി മാര്‍ക്കറ്റിലാണ് 2000ന്റെ വ്യാജന്‍ കണ്ടെത്തിയത്. രണ്ടായിരം രൂപയുടെ അതേ നിറത്തിലും വലിപ്പത്തിലുമുള്ള കളര്‍ ഫോട്ടോസ്റ്റാറ്റുകളാണ് ഇവിടെ കണ്ടെത്തിയിരിക്കുന്നത്.

ബെംഗലൂരു : രാജ്യത്ത് 1000, 500 രൂപ നോട്ടുകള്‍ അസാധുവാക്കിയതിനു പിന്നാലെ പുറത്തിറക്കിയ 2000 രൂപ നോട്ട് സ്വന്തമാക്കുന്നതിന്റെ തിരക്കിലാണ് പലരും. 2000 രൂപ സ്വന്തമാക്കുന്നതിന് ചെറുതൊന്നുമല്ല പാട്. എന്നാല്‍ ഇപ്പോഴിതാ കൊട്ടിഘോഷിച്ച് പുറത്തിറക്കിയ 2000ത്തിന്റെ വ്യാജന്‍ പുറത്തിറങ്ങിയിരിക്കുന്നു.

കര്‍ണാടകയിലെ ചിക്ക്മഗലൂരുവിലാണ് 2000 രൂപയുടെ വ്യാജന്‍ പ്രത്യക്ഷപ്പെട്ടിരിക്കുന്നത്. പുതിയ നോട്ടുകളുടെ വ്യാജന്‍ ഇറക്കാന്‍ കഴിയില്ലെന്നും അത്രകണ്ട് കരുതലോടെയാണ് നോട്ടുകള്‍ പുറത്തിക്കിയിരിക്കുന്നതെന്നുമുള്ള വാദമാണ് ഇതോടെ പൊളിഞ്ഞിരിക്കുന്നത്.

പഴയ നോട്ടിലെ സുരക്ഷാ ക്രമീകരണങ്ങള്‍ തന്നെയാണ് പുതിയതിലുള്ളതെന്നും കൂടുതല്‍ സുരക്ഷാ ക്രമീകരണങ്ങള്‍ക്ക് സമയം ലഭിച്ചിരുന്നില്ലെന്നുമുള്ള മുതിര്‍ന്ന സര്‍ക്കാര്‍ ഉദ്യോഗസ്ഥന്റെ വെളിപ്പെടുത്തലിനു പിന്നാലെയാണ് ഈ വാര്‍ത്തയും റിപ്പോര്‍ട്ട് ചെയ്തിരിക്കുന്നത്. പ്രാദേശിക പത്രമാണ് വാര്‍ത്ത റിപ്പോര്‍ട്ട് ചെയ്തിരിക്കുന്നത്.

എപിഎംസി മാര്‍ക്കറ്റിലാണ് 2000ന്റെ വ്യാജന്‍ കണ്ടെത്തിയത്. രണ്ടായിരം രൂപയുടെ അതേ നിറത്തിലും വലിപ്പത്തിലുമുള്ള കളര്‍ ഫോട്ടോസ്റ്റാറ്റുകളാണ് ഇവിടെ കണ്ടെത്തിയിരിക്കുന്നത്. ഇത്തരത്തിലെ വ്യാജ നോട്ടുകള്‍ ഇവിടെ പ്രചരിക്കുന്നതായും വിവരങ്ങളുണ്ട്.നോട്ടിന്റെ രണ്ട് വശത്തിന്റെയും കളര്‍പ്രിന്റ് ഒട്ടിച്ചാണ് വ്യാജന്‍ ഇറക്കിയിരിക്കുന്നത്. സംഭവത്തെ കുറിച്ച് പൊലീസ് അന്വേഷണം ആരംഭിച്ചു.

പുതിയ നോട്ടിറക്കി രണ്ട് ദിവസത്തിനുള്ളിലാണ് വ്യാജന്‍ ഇറങ്ങിയത്. രാജ്യത്ത് പാക് നിര്‍മിത വ്യാജ നോട്ടുകള്‍ പ്രചരിക്കുന്നതിനെ തുടര്‍ന്നാണ് 500, 1000 രൂപ നോട്ടുകള്‍ അസാധുവാക്കിയിരുന്നത്.

English summary

There are reports of a fake Rs 2,000 note appearing in a market in Chikmagalur, Karnataka.