കൂട്ടബലാത്സംഗത്തിന് ഇരയായ പെൺകുട്ടിയുടെ പിതാവ് വാഹനാപകടത്തിൽ കൊല്ലപ്പെട്ടു;പരാതി നൽകിയ പിന്നാലെ,ദുരൂഹത

ലഖ്നൗ; കൂട്ടബലാത്സംഗത്തിന് ഇരയായ 13 കാരിയുടെ പിതാവ് വാഹനാപകടത്തിൽ കൊല്ലപ്പെട്ടു. സംഭവത്തിൽ പരാതി നൽകിയതിന് പിന്നാലെയാണ് അപകടം.ഉത്തർപ്രദേശിലെ കാൺപൂറിലാണ് സംഭവം. ചൊവ്വാഴ്ച രാവിലെ മകളെ ആശുപത്രിയിൽ വൈദ്യപരിശോധനയ്ക്ക് കൊണ്ടുപോയപ്പോഴാണ് അപകടം നടന്നത്. പ്രതികളാണ് അപകടത്തിന് പിന്നിലെന്നും സംഭവത്തില്‍ ദുരൂഹത ഉണ്ടെന്നും പെൺകുട്ടിയുടെ കുടുംബം ആരോപിച്ചു.

കഴിഞ്ഞ ദിവസമാണ് പെൺകുട്ടിയുടെ പിതാവ് പോലീസിൽ പരാതി നൽകിയത്. സംഭവം പോലീസിൽ അറിയിച്ചാൽ ഗുരുതരമായ പ്രത്യാഘാതമുണ്ടാകുമെന്ന് പ്രതിയുടെ സഹോദരൻ ഭീഷണിപ്പെടുത്തിയെന്നും ഇദ്ദേഹം ആരോപിച്ചിരുന്നു. ഗ്രാമത്തിൽ തന്നെയുള്ള
ഗോലു യാദവ്, ദീപു യാദവ് എന്നിവരാണ് പെൺകുട്ടിയെ തട്ടിക്കൊണ്ട് പോയി ബലാത്സംഗം ചെയ്തതെന്നാണ് ഇരയുടെ കുടുംബം പോലീസിൽ നൽകിയ പരാതിയിൽ പറയുന്നത്..പരാതിയിൽ ഇരുവർക്കുമെതിരെ പോലീസ് കേസെടുത്തിരുന്നു.

കേസിലെ പ്രതികളുടെ പിതാവ് യുപി പോലീസിലെ എസ്ഐയാണ്. പ്രതിയുടെ ബന്ധുക്കൾ ഉന്നത ബന്ധമുള്ളവരാണെന്നും അപകടത്തിന് പിന്നിൽ ദുരൂഹത ഉണ്ടെന്നും ബന്ധുക്കൾ ആരോപിച്ചു. അതേസമയം കേസിലെ മുഖ്യപ്രതിയെ അറസ്റ്റ് ചെയ്തതായി പോലീസ് അറിയിച്ചു. പെൺകുട്ടിയുടെ പിതാവിന്റെ അപകടത്തെ കുറിച്ച് അന്വേഷണം ആരംഭിച്ചതായും പോലീസ് അറിയിച്ചു.

English summary

Father of a gang-raped girl has been killed in a car accident