നവി മുംബൈ എയർപോർട്ടിൽ ഫെഡെക്സിൻ്റെ എയർ കാർഗോ ഹബ്ബ് ഒരുങ്ങുന്നു; 2500 കോടി നിക്ഷേപം

By Desk

Updated: Wednesday, February 18, 2026, 19:59 [IST]

ആഗോള ലോജിസ്റ്റിക്സ് ഭീമന്മാരായ ഫെഡെക്സ്, നവി മുംബൈ ഇന്റർനാഷണൽ എയർപോർട്ടിൽ (NMIA) എയർ കാർഗോ ഹബിന് തറക്കല്ലിട്ടു. ഈ പൂർണ്ണ ഓട്ടോമേറ്റഡ് എയർ കാർഗോ ഹബ്ബ് ആണിത്. 2500 കോടിയലധികമാണ് പദ്ധതിക്കായി നിക്ഷേപിക്കുന്നത്. ഇന്ത്യയുടെ ലോജിസ്റ്റിക്സ് അടിസ്ഥാന സൗകര്യങ്ങൾ ശക്തിപ്പെടുത്താനും അന്താരാഷ്ട്ര വ്യാപാര ബന്ധം മെച്ചപ്പെടുത്താനുമാണ് ഈ പദ്ധതി ലക്ഷ്യമിടുന്നത്.

അദാനി എയർപോർട്ട് ഹോൾഡിംഗ്സ് ലിമിറ്റഡുമായി സഹകരിച്ച് 3 ലക്ഷം ചതുരശ്ര അടി വിസ്തൃതിയിലാണ് ഈ കേന്ദ്രം ഒരുങ്ങുന്നത്. ഇന്ത്യയെ തെക്ക് കിഴക്കൻ ഏഷ്യ, പടിഞ്ഞാറൻ ഏഷ്യ, യൂറോപ്പ്, അമേരിക്ക എന്നിവിടങ്ങളുമായി ബന്ധിപ്പിക്കുന്ന പ്രധാന പ്രാദേശിക ചരക്ക് കൈമാറ്റ കേന്ദ്രമാകും ഇത്. തറക്കല്ലിടൽ ചടങ്ങിൽ മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസ്, ഫെഡെക്സ് പ്രസിഡന്റും സിഇഒയുമായ രാജ് സുബ്രമണ്യം, ഫെഡെക്സ് എയർലൈൻ സിഇഒയും സിഒഒ ഇന്റർനാഷണലുമായ റിച്ചാർഡ് സ്മിത്ത്, ഫെഡെക്സ് MEISA പ്രസിഡന്റ് കാമി വിശ്വനാഥൻ, അദാനി എയർപോർട്ട് ഹോൾഡിംഗ്സ് ലിമിറ്റഡ് ഡയറക്ടർ ജീത്ത് അദാനി എന്നിവർ പങ്കെടുത്തു.

പ്രവർത്തനം ആരംഭിക്കുമ്പോൾ ലോജിസ്റ്റിക്സ്, വെയർഹൗസിംഗ്, ഗതാഗതം, അനുബന്ധ മേഖലകളിൽ 6,000-ലധികം നേരിട്ടുള്ളതും അല്ലാത്തതുമായ തൊഴിലവസരങ്ങൾ സൃഷ്ടിക്കപ്പെടുമെന്നാണ് പ്രതീക്ഷ. ഇത് പ്രാദേശിക സമ്പദ്‌വ്യവസ്ഥയെയും തൊഴിൽ വളർച്ചയെയും പിന്തുണയ്ക്കും.

നവി മുംബൈ ഇന്റർനാഷണൽ എയർപോർട്ടിന്റെ ദീർഘകാല കാഴ്ചപ്പാടുകളുമായി ഈ പദ്ധതി യോജിക്കുന്നുണ്ടെന്ന് ജീത്ത് അദാനി പറഞ്ഞു. "സമഗ്രമായ അടിസ്ഥാന സൗകര്യങ്ങളിലൂടെ ഇന്ത്യയുടെ ആഗോള വ്യാപാര മത്സരക്ഷമത ശക്തിപ്പെടുത്താനാണ് എൻഎംഐഎ ലക്ഷ്യമിടുന്നത്," അദ്ദേഹം കൂട്ടിച്ചേർത്തു.

എൻഎംഐഎയുടെ തന്ത്രപരമായ സാമീപ്യം (ജവഹർലാൽ നെഹ്റു പോർട്ട്, വ്യാവസായിക ഇടനാഴികൾ, മൾട്ടിമോഡൽ ഗതാഗത പങ്കാളിത്തം എന്നിവയുമായുള്ള) ഉയർന്ന വളർച്ചാ സാധ്യതയുള്ള കയറ്റുമതി മേഖലകളെ പിന്തുണയ്ക്കും. മഹാരാഷ്ട്രയെ ആഗോള ലോജിസ്റ്റിക്സ് കവാടമെന്ന നിലയിൽ ഇത് ശക്തിപ്പെടുത്തുമെന്നും അദാനി അഭിപ്രായപ്പെട്ടു.

ഇന്ത്യയുടെ ആഗോള വ്യാപാര മത്സരക്ഷമതയ്ക്ക് വിശ്വസനീയവും കാര്യക്ഷമവുമായ ലോജിസ്റ്റിക്സ് അടിസ്ഥാന സൗകര്യങ്ങൾ അത്യന്താപേക്ഷിതമാണെന്ന് കാമി വിശ്വനാഥൻ ഊന്നിപ്പറഞ്ഞു. എൻഎംഐഎയിലെ ഈ ഹബ്, ഫെഡെക്സിന്റെ ആഗോള നെറ്റ്‌വർക്ക് കഴിവുകളെ ഇന്ത്യയിലെ അതിവേഗം വളരുന്ന വ്യാപാര ഇടനാഴിയുമായി സംയോജിപ്പിച്ച് ഉപഭോക്താക്കൾക്ക് വേഗതയും വിശ്വാസ്യതയും കാര്യക്ഷമതയും വർദ്ധിപ്പിക്കുമെന്ന് അവർ വ്യക്തമാക്കി.

ഓട്ടോമേറ്റഡ് സോർട്ടിംഗ് സിസ്റ്റങ്ങൾ, ഡൈമൻഷണൽ സ്കാനിംഗ്, അതിവേഗ സ്ക്രീനിംഗ് സാങ്കേതികവിദ്യ, പ്രത്യേക എയർക്രാഫ്റ്റ് പാർക്കിംഗ് ബേകൾ എന്നിവ ഉൾപ്പെടെയുള്ള അത്യാധുനിക സൗകര്യങ്ങൾ കാർഗോ ഹബിൽ ലഭ്യമാകും. ഇത് ഇൻബൗണ്ട്, ഔട്ട്ബൗണ്ട് ഷിപ്പ്‌മെന്റുകൾ ഒരേസമയം കൈകാര്യം ചെയ്യാൻ സഹായിക്കും. ഇലക്ട്രോണിക്സ്, ഫാർമസ്യൂട്ടിക്കൽസ്, എഞ്ചിനീയറിംഗ് ഉൽപ്പന്നങ്ങൾ, നശിച്ചുപോവുന്ന സാധനങ്ങൾ എന്നിങ്ങനെയുള്ള ഉയർന്ന മൂല്യമുള്ളതും സമയബന്ധിതമായ മേഖലകളിൽ വേഗത്തിലുള്ള ഡെലിവറി സാധ്യമാക്കും.

സൂക്ഷ്മ, ചെറുകിട, ഇടത്തരം സംരംഭങ്ങളുടെ (MSMEs) കയറ്റുമതി-ഇറക്കുമതി ശേഷി വർദ്ധിപ്പിക്കാനും ലോജിസ്റ്റിക്സ് ചെലവുകൾ കുറയ്ക്കാനും കൈമാറ്റ സമയങ്ങൾ കാര്യക്ഷമമാക്കാനും ഈ വികസനം സഹായിക്കുമെന്നാണ് പ്രതീക്ഷ.

എൻഎംഐഎയുടെ കാർഗോ അടിസ്ഥാന സൗകര്യങ്ങൾക്ക് ആരംഭത്തിൽ പ്രതിവർഷം ഏകദേശം 0.5 ദശലക്ഷം മെട്രിക് ടൺ ചരക്കുകൾ കൈകാര്യം ചെയ്യാനാകും. ഘട്ടംഘട്ടമായുള്ള വികസനത്തിലൂടെ പൂർണ്ണ ശേഷിയിൽ ഏകദേശം 3.25 ദശലക്ഷം മെട്രിക് ടൺ ആയി ഇത് വർദ്ധിപ്പിക്കാൻ പദ്ധതിയുണ്ട്. മുംബൈ മെട്രോപൊളിറ്റൻ മേഖലയെ ഒരു പ്രധാന എയർ കാർഗോ, ലോജിസ്റ്റിക്സ് കേന്ദ്രമായി മാറ്റാനുള്ള വിമാനത്താവളത്തിന്റെ തന്ത്രങ്ങൾക്ക് ഇത് പിന്തുണ നൽകും.

കഴിഞ്ഞ മൂന്ന് ദശാബ്ദത്തോളമായി ഇന്ത്യയിൽ പ്രവർത്തിച്ചുവരുന്ന ഫെഡെക്സ്, പുതിയ ഹബ് രാജ്യത്തെ തങ്ങളുടെ സാന്നിധ്യം കൂടുതൽ ശക്തിപ്പെടുത്തുമെന്ന് അറിയിച്ചു. ആഗോള വിതരണ ശൃംഖലകളിലെ സംയോജിത വ്യോമയാന, മൾട്ടിമോഡൽ വ്യാപാര പ്ലാറ്റ്‌ഫോമായി എൻഎംഐഎയുടെ വളർച്ചയെയും ഇത് പിന്തുണയ്ക്കും.