'വേഗം വരൂ; ഞാന്‍ മൂഡിലാണ്'; അഭിഭാഷകയ്ക്ക് മോശം സന്ദേശം അയച്ച് ഊബര്‍ ഡ്രൈവര്‍: നടപടിയെടുത്ത് കമ്പനി

ദല്‍ഹി: നഗരത്തിലെ തിരക്കേറിയ അവസരങ്ങളില്‍ ജോലിക്കാര്‍ക്ക് ഉള്‍പ്പെടെ ലക്ഷ്യസ്ഥാനത്ത് എത്താന്‍ വലിയ സഹായമാണ് ഊബര്‍ ടാക്‌സികള്‍. സ്വന്തം വാഹനമെടുത്താല്‍ എവിടെ പാര്‍ക്ക് ചെയ്യുമെന്ന ആശങ്കയില്ലാതെ നഗരത്തിലൂടെ സഞ്ചരിക്കാനാണ് പലരും ഊബര്‍ ടാക്‌സികള്‍ ബുക്ക് ചെയ്യുന്നത്.

മികച്ച സേവനം വാഗ്ദാനം ചെയ്യുമ്പോഴും ചിലപ്പോഴെങ്കിലും ഊബര്‍ ടാക്‌സി ഡ്രൈവര്‍മാരുടെ മോശം പെരുമാറ്റം വാര്‍ത്തകളില്‍ ഇടംപിടിക്കാറുണ്ട്. ഇത്തരത്തില്‍ അഭിഭാഷകയായ താന്യ ശര്‍മ്മയ്ക്കുണ്ടായ മോശം അനുഭവം അവര്‍ ലിങ്ക്ഡ് ഇന്‍ എന്ന പ്ലാറ്റ്‌ഫോമില്‍ പങ്കുവെച്ചിരുന്നു. ഈ കുറിപ്പാണ് ഇപ്പോള്‍ ഊബറിന്റെ സുരക്ഷിതത്വത്തെക്കുറിച്ച് വലിയ ചോദ്യങ്ങള്‍ ഉയര്‍ത്തുന്നത്.

ദല്‍ഹിയില്‍ താമസിക്കുന്ന താന്യ ശര്‍മ്മ ഊബര്‍ റൈഡ് ബുക്ക് ചെയ്തതിനു പിന്നാലെ ക്യാബ് ഡ്രൈവറില്‍ നിന്ന് അശ്ലീല സന്ദേശങ്ങള്‍ വരാന്‍ തുടങ്ങി. ഡ്രൈവര്‍ അയച്ച സന്ദേശങ്ങളുടെ സ്‌ക്രീന്‍ ഷോട്ടുകളും താന്യ തന്റെ കുറിപ്പിനൊപ്പം പങ്കുവെച്ചിട്ടുണ്ട്. 'വേഗം വരൂ; ഞാന്‍ മൂഡിലാണ്' എന്ന രീതിയിലുള്ള അശ്ലീല സന്ദേശങ്ങളാണ് ഡ്രൈവര്‍ അയച്ചത്. ഡല്‍ഹി പോലെ ഒരു പ്രദേശത്ത് ഇത്തരം സംഭവങ്ങള്‍ ഉണ്ടാകുന്നതിലുള്ള ആശങ്കയും അവര്‍ പങ്കുവെച്ചു.

'21-ാം നൂറ്റാണ്ടിലാണ് നാം ജീവിക്കുന്നത്, എന്നിട്ടും കാര്യങ്ങള്‍ ഇപ്പോഴും ദയനീയമായി തുടരുന്നു. നഗരത്തിലെ ഏറ്റവും സമ്പന്നമായ മേഖലയില്‍ പട്ടാപ്പകല്‍ നടക്കുമ്പോള്‍ പോലും ഒരു ഓട്ടോ ഡ്രൈവര്‍ക്ക് നിങ്ങളെ ശല്യപ്പെടുത്താന്‍ കഴിയും' - അവര്‍ തന്റെ പോസ്റ്റില്‍ കുറിച്ചു.

ഡ്രൈവറുടെ സന്ദേശങ്ങള്‍ ലഭിച്ച ഉടന്‍ തന്നെ ബുക്കിങ് റദ്ദാക്കിയതായും ഡ്രൈവര്‍ക്കെതിരെ പരാതി നല്‍കിയതായും അവര്‍ വ്യക്തമാക്കി. എന്നാല്‍ ഊബറിന്റെ പ്രതികരണവും താന്യയെ നിരാശപ്പെടുത്തി.

ഊബര്‍ ഇന്ത്യ പരാതി പരിഹരിക്കുന്നത് എങ്ങയെയെന്നാല്‍ ഇരകള്‍ക്ക് ഒരു അനുകമ്പയുള്ള സന്ദേശം അയച്ചിട്ട് അവര്‍ അതങ്ങ് മറക്കും. 24-48 മണിക്കൂറിനുള്ളില്‍ അന്വേഷണം നടത്തി തുടര്‍ നടപടികള്‍ സ്വീകരിക്കുമെന്ന് ഊബര്‍ മറുപടി നല്‍കിയിരുന്നു. നടപടിക്കുള്ള ഈ കാലതാമസത്തെയും അവര്‍ വിമര്‍ശിച്ചു. ഈ 48 മണിക്കൂറിനിടയില്‍ മറ്റ് സ്ത്രീകള്‍ക്കും ഇതേ മോശം അനുഭവം ഉണ്ടായാലോ? എന്റെയും മറ്റ് സ്ത്രീകളുടെയും സുരക്ഷയുടെ ഉത്തരവാദിത്തം ഏറ്റെടുക്കാന്‍ ഊബര്‍ തയാറല്ലേ എന്നും താന്യ ചോദിക്കുന്നു.

താന്യയുടെ പോസ്റ്റിന് ലഭിച്ച മികച്ച പിന്തുണയെതുടര്‍ന്ന് ഊബര്‍ വേഗത്തില്‍ നടപടിയെടുക്കുകയും ഡ്രൈവറെ ഊബര്‍ പ്ലാറ്റ്ഫോമില്‍ നിന്ന് ശാശ്വതമായി വിലക്കുകയും ചെയ്തു. തുടര്‍ന്നുള്ള ഒരു പോസ്റ്റില്‍, എല്ലാവരുടെയും പിന്തുണയ്ക്ക് താന്യ ശര്‍മ്മ നന്ദി പറയുകയും ഡ്രൈവര്‍ക്കെതിരെ ഊബര്‍ നടപടിയെടുത്തിട്ടുണ്ടെന്ന് സ്ഥിരീകരിക്കുകയും ചെയ്തു.

'പിന്തുണച്ചവര്‍ക്കും അവരുടെ അനുഭവങ്ങള്‍ പങ്കുവെച്ചവര്‍ക്കും നന്ദി. ഈ സാഹചര്യത്തില്‍ നിരവധി ആളുകള്‍ എനിക്കൊപ്പമുണ്ടായിരുന്നു. അതിന് എല്ലാവര്‍ക്കും നന്ദി. ഊബര്‍ പ്ലാറ്റ്ഫോമില്‍ നിന്ന് ആ ഡ്രൈവറെ വിലക്കി. അതിനാല്‍ അയാള്‍ക്ക് ഇതേ പ്രവൃത്തി മറ്റൊരാളോട് ചെയ്യാന്‍ കഴിയില്ല. ഇത്തരം പരാതികള്‍ എല്ലാവരും ഗൗരവത്തോടെ ഉന്നയിക്കുക, മറ്റുള്ളവരും അറിയട്ടെ' - അവര്‍ പറഞ്ഞു.