ചോക്ലേറ്റാണെന്ന് കരുതി പടക്കം കഴിച്ച അഞ്ചു വയസുകാരി മരിച്ചു!

രത്‌നഗിരി: ദീപാവലി ആഘോഷം മഹാരാഷ്ട്രയിലെ ഒരു കുടുംബത്തിന് കണ്ണീര്‍ മഴയായി. ദീപാവലി ആഘോഷിക്കാന്‍ വാങ്ങിച്ച പടക്കമാണ് പിഞ്ചു കുഞ്ഞിന്റെ ജീവനെടുത്തത്. മിഠായി ആണെന്നു കരുതി പെണ്‍കുട്ടി പടക്കമെടുത്ത് വായിലിടുകയായിരുന്നു. പടക്കം വായില്‍ വെക്കുന്നത് കണ്ട കുട്ടിയുടെ അമ്മ ഓടിയെത്തി തട്ടി മാറ്റാന്‍ ശ്രമിക്കുമ്പോഴേക്കും പടക്കം ആ അഞ്ചുവയസുകാരി വിഴുങ്ങിയിരുന്നു.

മഹാരാഷ്ട്ര രത്‌നഗിരി ജില്ലയിലെ ഖേഡിലെ തിസംഗി ഗ്രാമത്തിലാണ് സംഭവം നടന്നത്. ബുധനാഴ്ച ദീപാവലി ആഘോഷങ്ങള്‍ക്കിടയില്‍ കുട്ടി വീട്ടുമുറ്റത്ത് കളിച്ചു കൊണ്ടിരിക്കുകയായിരുന്നു. മുറ്റത്ത് നിന്നു കളിക്കുമ്പോഴാണ് പെണ്‍കുട്ടിക്ക് പടക്കം ലഭിക്കുന്നത്.

കുട്ടിക്ക് അറിയുമോ അതു പടക്കമാണെന്ന്, ചോക്ലേറ്റാണെന്നു കരുതി വായില്‍വെക്കുകയായിരുന്നു. ഉടനെ കുട്ടിയെ തൊട്ടടുത്തുള്ള ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. ഡോക്ടരുടെ പരിശോധനയ്ക്കിടെയാണ് കുട്ടി മരിക്കുന്നത്.

മാതാപിതാക്കളുടെ അശ്രദ്ധയാണ് കുട്ടിയുടെ മരണത്തിന് ഇടയാക്കിയതെന്നും ആരോപണം ഉണ്ട്. ദാമിനി നിഗം എന്ന അഞ്ചു വയസുകാരിയാണ് മരിച്ചതെന്ന് പോലീസ് ഉദ്യോഗസ്ഥര്‍ വ്യക്തമാക്കുന്നു. സംഭവത്തില്‍ പോലീസ് കേസ് രജിസ്റ്റര്‍ ചെയ്തിട്ടുണ്ട്.

English summary

Five years old baby girl died because of eating cracker thinking its chocolate in Maharashtra