യാത്രക്കാരുടെ മൂക്കിലും ചെവിയിലും രക്തം; മുംബൈയിൽ വിമാനം അടിയന്തിരമായി തിരിച്ചിറക്കി

ദില്ലി: യാത്രക്കാരുടെ മൂക്കിലൂടെയും ചെവിയിലൂടെയും രക്തം വന്നതിനെ തുടർന്ന് മുംബൈ-ജയ്പ്പൂർ ജെറ്റ് എയർവേയ്സ് വിമാനം അടിയന്തിരമായി തിരിച്ചിറക്കി. സാങ്കേതിക വിഭാഗത്തിന് പറ്റിയ അബദ്ധത്തെ തുടർന്ന് വിമാനത്തിനുള്ളിലെ മർദ്ദം കുറഞ്ഞതാണ് രക്തസ്രാവത്തിന് കാരണമായത്.

166 യാത്രക്കാരാണ് വിമാനത്തിൽ ഉണ്ടായിരുന്നത്. ഇതിൽ 30 യാത്രക്കാരുടെ മൂക്കിലൂടെയും ചെവിയിലൂടെയും രക്തം ഒഴുകാൻ തുടങ്ങിയതാണ് പരിഭ്രാന്തി സൃഷ്ടിച്ചത്. ടേക്ക് ഓഫിന്റെ സമയത്ത് വിമാനത്തിനുള്ളിലെ മർദ്ദം നിയന്ത്രിക്കാനുള്ള സംവിധാനം പ്രവർത്തിപ്പിക്കാൻ മറന്നതാണ് കാരണം.

മർദം താഴ്ന്നതിനെ തുടർന്ന് ഓക്സിജൻ മാസ്കുകൾ പുറത്തേക്ക് വന്നതും പരിഭ്രാന്തി സൃഷ്ടിച്ചു. നിരവധി പേർക്ക് കഠിനമായ തലവേദനയും അനുഭവപ്പെട്ടു. ഇതേ തുടർന്ന് വിമാനം മുംബൈയിൽ തിരിച്ചിറക്കി

വിമാനത്താവളത്തിൽ വെച്ച് തന്നെ യാത്രക്കാർക്ക് വൈദ്യസഹായം ലഭ്യമാക്കി. വീഴ്ച വരുത്തിയ ജീവനക്കാർക്കെതിരെ നടപടി സ്വീകരിച്ചിട്ടുണ്ട്. സംഭവത്തെ കുറിച്ച് വിശദമായ അന്വേഷണത്തിന് ഉത്തരവിട്ടതായി ഡയറക്റേറ്റ് ഓഫ് സിവിൽ ഏവിയേഷൻ അറിയിച്ചു.

Panic situation due to technical fault in @jetairways 9W 0697 going from Mumbai to Jaipur. Flt return back to Mumbai after 45 mts. All passengers are safe including me. pic.twitter.com/lnOaFbcaps

— Darshak Hathi (@DarshakHathi) September 20, 2018

വിമാനത്തിനുള്ളിൽ മർദം കുറഞ്ഞതോടെ ശ്വസകോശത്തിലേക്കും രക്തത്തിലേക്കും എത്തുന്ന ഓക്സിജന്റെ അളവ് കുറഞ്ഞതാണ് രക്തസ്രാവത്തിന് കാരണമായത്.

English summary

Jet Flight Returns To Mumbai After Cabin Pressure Loss Causes Nosebleed