ചന്ദ്രനില് പോയില്ലെങ്കിലെന്താ, നിങ്ങളുടെ പേര് ഇനി ചന്ദ്രനിലുണ്ടാകും! വെറും 500 രൂപ ചിലവില്
വെറും 500 രൂപ മുടക്കിയാല് നിങ്ങളുടെ പേരും ചന്ദ്രനിലെത്തും. ടീം ഇന്ഡസ് എന്ന കമ്പനിയാണ് വാഗ്ദാനം നല്കുന്നത്.
ബംഗളൂരു: ചന്ദ്രനില് പോകണമെന്ന് ആശിക്കാത്തവര് ചുരുക്കമാണ്. എന്നാല് അതിന്റെ ചിലവ് ഓര്ക്കുമ്പോള് കണ്ണുതള്ളിപ്പോകും. അതിനാല് ആഗ്രഹങ്ങളൊക്കെ അങ്ങ് ഉപേക്ഷിക്കും. നിങ്ങള്ക്ക് പോകാന് കഴിഞ്ഞില്ലെങ്കിലും നിങ്ങളുടെ പേര് അങ്ങ് ചന്ദ്രനിലെത്തിക്കാം. അതും വെറും 500 രൂപ ചിലവില്.
ബംഗളൂരുവിലെ ടീം ഇന്ഡസ് ആണ് ഇത്തരത്തിലൊരു ഓഫറുമായി രംഗത്തെത്തിയിരിക്കുന്നത്. കമ്പനിയുടെ ചാന്ദ്ര പര്യവേഷണത്തിന് ജനങ്ങളില് നിന്നും ഫണ്ട് സ്വരൂപിക്കുന്നതിനാണ് ഇത്.
500 രൂപ നല്കുന്നവരുടെ പേര് അലൂമിനിയം ഫലകത്തില് കൊത്തിവയ്ക്കും. പര്യവേഷണ പേടകത്തിനൊപ്പം ഈ ഫലകവും അങ്ങ് ചന്ദ്രനിലെത്തിക്കാമെന്നാണ് കമ്പനിയുടെ വാഗ്ദാനം.
14 ലക്ഷം പേരില് നിന്ന് 70 കോടി രൂപ സമാഹരിക്കാനാണ് കമ്പനി പദ്ധതിയിടുന്നത്. പേര് ചന്ദ്രനിലെത്തിക്കാനുള്ള ഓഫര് അടുത്ത മാസം മുതല് ആരംഭിക്കും.
2018 ജനുവരി 26നാണ് കമ്പനിയുയടെ ചാന്ദ്ര ദൗത്യം. ഇത് വിജയകരമായി പൂര്ത്തിയാക്കിയാല് ചാന്ദ്ര പര്യവേഷണം പൂര്ത്തിയാക്കുന്ന ലോകത്തിലെ ആദ്യ സ്വകാര്യ സ്ഥാപനം എന്ന പ്രശസ്തി ടീം ഇന്ഡസ് സ്വന്തമാക്കും. ഐഐടി ഡല്ഹിയില് നിന്ന് പഠിച്ചിറങ്ങിയ വിദ്യാര്ഥികളുടെ സംരംഭമാണ് ടീം ഇന്ഡസ്