ലാലുവിന്റെ ഷൂ ലേസ് കെട്ടാന് മുന് എംഎല്എ; വീഡിയോ വൈറലാകുന്നു
പാറ്റ്ന: മുന് ബിഹാര് മുഖ്യമന്ത്രിയും പാര്ട്ടി പ്രസിഡന്റുമായ ലാലു പ്രസാദ് യാദവിന്റെ ഷൂ ലേസ് ഒരു എംഎല്എ കെട്ടിക്കൊടുക്കുന്നതിന്റെ ദൃശ്യങ്ങള് സോഷ്യല് മീഡിയയില് വൈറലാകുന്നു. ബിഹാറിലെ ചമ്പാരന് ജില്ലയില് ഒരു പ്രതിമ അനാഛാദന ചടങ്ങിന് എത്തിയപ്പോഴായിരുന്നു മുന് എംഎല്എ അന്വര് അഹമ്മദ് ഷൂ ലേസ് കെട്ടിക്കൊടുത്തത്.
സംഭവം പ്രാദേശിക ചാനല് പുറത്തുവിട്ടതോടെ സോഷ്യല് മീഡിയകളിലും ദൃശ്യമാധ്യമങ്ങളിലും ഇത് ചര്ച്ചയായി. മുതിര്ന്ന നേതാക്കളുടെ കാല്ക്കീഴില് ഇരിക്കുന്ന മറ്റൊരു നേതാവ് പാര്ട്ടിക്ക് അപമാനമാണെന്ന് ചിലര് സോഷ്യല് മീഡിയയിലൂടെ പ്രതികരിച്ചു. നേരത്തെ പോലീസ് ഉദ്യോഗസ്ഥന്മാര് അടക്കം ഇത്തരം ജോലി ചെയ്തത് ചിലര് ചൂണ്ടിക്കാട്ടുകയും ചെയ്തു.
എന്നാല് തീര്ത്തും അനാവശ്യമായ വിവാദമാണിതെന്നായിരുന്നു ലാലു പ്രസാദ് യാദവിന്റെ പ്രതികരണം. താന് തിരക്കിലായതിനാല് സമയനഷ്ടം ഒഴിവാക്കാന് അന്വര് അഹമ്മദ് ഷൂസിന്റെ ലേസ് മുറുക്കുക മാത്രമാണ് ചെയ്തതെന്ന് ലാലു പ്രസാദ് വിശദീകരിച്ചു. ലാലു പ്രസാദിന്റെ വിശദീകരണം ശരിവെച്ച് അന്വര് അഹമ്മദും മാധ്യമങ്ങളുടെ അനാവശ്യ ഇടപെടലിനെ വിമര്ശിച്ച് രംഗത്തെത്തി.
തിരക്കിനിടയില് ലാലു പ്രസാദ് യാദവിനെപോലെ ഒരു നേതാവിന് വേണ്ടി സഹായം ചെയ്യുന്നതില് എന്താണ് തെറ്റെന്ന് അദ്ദേഹം ചോദിച്ചു. ആരും ചെയ്തുപോകുന്ന ഒരു കാര്യം മാത്രമേ ഞാന് ചെയ്തിട്ടുള്ളു. അതിന്റെ പേരില് മാധ്യമങ്ങള് ഇത്രയ്ക്ക് ബഹളമുണ്ടാക്കേണ്ട കാര്യമില്ലെന്നും അദ്ദേഹം പ്രതികരിച്ചു.