ബച്ചന്റെ പരിപാടിയില് പങ്കെടുക്കാന് ഗീതയ്ക്ക് ക്ഷണം; പരിപാടിക്ക് സല്മാനും
ഇന്ഡോര്: അമിതാഭ് ബച്ചന്റെ ഒരു ടിവി പരിപാടിയില് പങ്കെടുക്കാന് പാക്കിസ്ഥാനില് നിന്നും അടിത്തിടെ ഇന്ത്യയില് തിരിച്ചെത്തിയ ഗീതയ്ക്ക് ക്ഷണം. ആജ് കി രാത് ഹെ സിന്ദഗി എന്ന പരിപാടിയുടെ പ്രൊഡ്യൂസര് ഇന്ഡോര് ഇല്ലാ കളക്ടര് പി. നരഹരിക്ക് ഇതു സംബന്ധിച്ച കത്തയച്ചു. ഗീതയെ മുംബൈയില് നടക്കുന്ന പരിപാടിക്കായി അയക്കണമെന്നാണ് കത്തില് അപേക്ഷിച്ചിരിക്കുന്നത്.
പാക്കിസ്ഥാനില് നിന്നും ഇന്ത്യയില് തിരിച്ചെത്തിയ ഗീത ഇപ്പോള് ഇന്ഡോറില് സര്ക്കാര് സംരക്ഷണയില് കഴിയുകയാണ്. അതുകൊണ്ടുതന്നെ ജില്ലാ കളക്ടറുടെയും സര്ക്കാരിന്റെയും പ്രത്യേക അനുമതി ആവശ്യമാണ്. പ്രൊഡ്യൂസറുടെ കത്തില് കളക്ടര് ഇതുവരെ മറുപടി നല്കിയിട്ടില്ല. നവംബര് 8നും 10നും ഇടയില് ഗീതയ്ക്ക് പരിപാടിയില് പങ്കെടുക്കാം.
പരിപാടിയില് ഗീത പങ്കെടുക്കുകയാണെങ്കില് ബോളിവുഡ് സൂപ്പര്താരം സല്മാന് ഖാനും പരിപാടിയില് എത്തിയേക്കുമെന്നാണ് റിപ്പോര്ട്ട്. സല്മാന് ഖാനെ കാണാന് ആഗ്രഹമുണ്ടെന്ന് ഗീത നേരത്തെ അറിയിച്ചിരുന്നു. ഗീത ഇന്ത്യയിലേക്ക് തിരിച്ചെത്താന് ഇടയായത് സല്മാന്റെ ബജ്രംഗീ ഭായീജാന് എന്ന സിനിമയാണ്. സിനിമയിലെ കഥയുമായി ഏറെ സാമ്യമുള്ളതാണ് വര്ഷങ്ങള്ക്ക് മുന്പ് പാക്കിസ്ഥാനില് അകപ്പെട്ടുപോയ ഗീതയുടെ കഥ.
അതിനിടെ ഇന്ഡോറിലെ രാമരാജ് ഗൗതം എന്നയാളും ഭാര്യ അനാര ദേവിയും ഗീത തങ്ങളുടെ മകളാണെന്ന് അവകാശപ്പെട്ട് ജില്ലാ കളക്ടറെ സമീപിച്ചു. ഗീതയെ നേരിട്ട് കാണാനും അവര് അനുവാദ് ചോദിച്ചിട്ടുണ്ട്. നേരത്തെ ബിഹാറിലുള്ള ഒരു കുടുംബവും ഗീത മകളാണെന്ന് അവകാശപ്പെട്ട് രംഗത്തെത്തിയിരുന്നു. ഇവര്ക്ക് അടുത്തദിവസം തന്നെ ഡിഎന്എ ടെസ്റ്റ് നടത്തുമെന്നാണ് വിവരം.