വിവാഹം കഴിച്ചില്ലെങ്കിൽ സ്വകാര്യ ചിത്രങ്ങൾ പുറത്ത് വിടുമെന്ന് കാമുകൻ, മുഖത്ത് ആസിഡൊഴിച്ച് യുവതി!

ആഗ്ര: വിവാഹ അഭ്യര്‍ത്ഥനയും പ്രണയ അഭ്യര്‍ത്ഥനയും മറ്റും നിരസിച്ചതിന്റെ പേരില്‍ നിരവധി പെണ്‍കുട്ടികളാണ് രാജ്യത്തിന്റെ പല ഭാഗങ്ങളില്‍ ആസിഡ് ആക്രമണങ്ങള്‍ക്ക് ഇരയായിട്ടുളളത്. ഇതിന് വിപരീതമായി അലിഗഡില്‍ കാമുകന് നേര്‍ക്ക് ആസിഡ് ആക്രമണം നടത്തിയിരിക്കുകയാണ് യുവതി. വിവാഹം കഴിച്ചില്ലെങ്കില്‍ തന്റെ രഹസ്യ ചിത്രങ്ങള്‍ പുറത്ത് വിടുമെന്ന് കാമുകന്‍ ഭീഷണിപ്പെടുത്തിയതിനെ തുടര്‍ന്നാണ് മുഖത്ത് ആസിഡ് ഒഴിച്ചത് എന്നാണ് പെണ്‍കുട്ടിയുടെ മൊഴി.

അതേസമയം ആക്രമിക്കപ്പെട്ട യുവാവിന്റെ വീട്ടുകാര്‍ പറയുന്നത് മറ്റൊന്നാണ്. പെണ്‍കുട്ടി യുവാവിനോട് വിവാഹ അഭ്യര്‍ത്ഥന നടത്തിയെന്നും ഇത് നിരസിച്ചതോടെ ആസിഡ് ആക്രമണം നടത്തുകയായിരുന്നു എന്നുമാണ് വീട്ടുകാരുടെ ആരോപണം. ഇവരുടെ പരാതിയുടെ അടിസ്ഥാനത്തില്‍ യുവതിയെ പോലീസ് അറസ്റ്റ് ചെയ്തു.

അലിഗഡിലെ ജീവന്‍ഗഡിലാണ് പത്തൊന്‍പതുകാരിയായ പെണ്‍കുട്ടിയെ കവാര്‍സി പോലീസ് അറസ്റ്റ് ചെയ്തിരിക്കുന്നത്. ഐപിസി 326 എ വകുപ്പ് ചുമത്തിയാണ് പെണ്‍കുട്ടിക്കെതിരെ കേസെടുത്തിട്ടുളളത്. പെണ്‍കുട്ടി യുവാവുമായി പ്രണയത്തിലായിരുന്നുവെന്നും എന്നാല്‍ ഒരു മാസത്തോളമായി യുവാവ് പെണ്‍കുട്ടിയുമായി അകല്‍ച്ചയില്‍ ആണെന്നും ഇയാളുടെ അമ്മ പറയുന്നു.

വിവാഹം കഴിക്കാന്‍ പെണ്‍കുട്ടി യുവാവിന് മേല്‍ സമ്മര്‍ദ്ദം ചെലുത്തിയിരുന്നുവെന്നും ഫോണില്‍ നിരന്തരം വിളിച്ച് ശല്യം ചെയ്തിരുന്നുവെന്നും യുവാവിന്റെ അമ്മ ആരോപിച്ചു. വീടിനടുത്തുളള കടയ്ക്ക് സമീപം നില്‍ക്കുമ്പോഴാണ് പെണ്‍കുട്ടി കാമുകന്റെ മുഖത്ത് ആസിഡ് ഒഴിച്ചത്. യുവാവ് ജവഹര്‍ലാല്‍ നെഹ്‌റു മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. ഇയാളുടെ കണ്ണിന് ഗുരുതരമായി പരിക്കേറ്റിട്ടുണ്ടെന്ന് ഡോക്ടര്‍മാര്‍ പറയുന്നു.

English summary

Girl arrested for allegedly throwing acid on boyfriend