പ്രായപൂര്ത്തിയാകാത്ത മകളെയും അമ്മയെയും പീഡിപ്പിച്ചു: കേസെടുത്തത് 18 പേര്ക്കെതിരെ, പോലീസുകാരും!!
ചണ്ഡിഗഡ്: 16കാരിയായ മകളെയും അമ്മയെയും പീഡിപ്പിച്ച കേസില് 18 പേര്ക്കെതിരെ കേസ്. ഏഴ് പോലീസ് ഉദ്യോഗസ്ഥരുള്പ്പെടെ 18 പേര്ക്കെതിരെയാണ് പോലീസ് കേസെടുത്തിട്ടുള്ളത്. എഎസ്ഐ റാങ്കിലുള്ള ഉദ്യോഗസ്ഥനാണ് മുഖ്യ കുറ്റവാളിയെന്നാണ് പീഡനത്തിനിരയായ ഇരുവരും ആരോപിക്കുന്നത്. വീട്ടില് വെച്ച് കഴിഞ്ഞ മാസമായിരുന്നു സംഭവം. ഒക്ടോബര് മൂന്നിനാണ് സംഭവത്തില് പോലീസ് കേസെടുത്ത് അന്വേഷണം ആരംഭിച്ചത്.
പെണ്കുട്ടിയുടെ പരാതിയില് 18 പേര്ക്കെതിരെ കേസെടുത്ത ശേഷം ഇവര്ക്ക് വേണ്ടി അന്വേഷണം ആരംഭിച്ചിട്ടുണ്ട്. ഹെഡ് കോണ്സ്റ്റബിള്, കോണ്സ്റ്റബിള് റാങ്കിലുള്ള ഉദ്യോഗസ്ഥരും ആരോപണവിധേയരാണ്. പീഡനത്തിന് പുറമേ ഇന്ത്യന് ശിക്ഷാ നിയമത്തിലെ ക്രിമിനല് ഗൂഡാലോചനാക്കുറ്റം, മോശം പെരുമാറ്റം, പോക്സോയിലെ വിവിധ വകുപ്പുകള് എന്നിവ പ്രകാരമാണ് പ്രതികള്ക്കെതിരെ കേസെടുത്തിട്ടുള്ളത്. കൈതല് പോലീസ് സൂപ്രണ്ട് ആസ്ത മോദിയാണ് ഇക്കാര്യം വ്യക്തമാക്കിയത്.
കേസ് അന്വേഷിക്കാന് പ്രത്യേക അന്വേഷണ സംഘത്തെ നിയമിച്ചതായി സൂപ്രണ്ട് വ്യക്തമാക്കി. ഡിഎസ്പി റാങ്കിലുള്ള ഉദ്യോഗസ്ഥനാണ് സംഘത്തിന്റെ ചുമതല. മൂന്ന് മാസം മുമ്പ് ഹരിയാണയില് പിതാവ് പീഡിപ്പിച്ചെന്ന പരാതിയുമായി പ്രായപൂര്ത്തിയാവാത്ത പെണ്കുട്ടി പരാതി നല്കിയിരുന്നു. എന്നാല് പെണ്കുട്ടി പിന്നീട് ആരോപണത്തില് നിന്ന് പിന്നോട്ട് പോകുകയായിരുന്നുവെന്നാണ് പോലീസ് പറയുന്നത്.