പീഡനം; തേജ്പാലിന്റെ റിമാന്ഡ് നീട്ടി
പനാജി: തെഹല്ക്ക മുന് എഡിറ്റര് ഇന് ചീഫ് തരുണ് തേജ്പാലിന്റെ പോലീസ് കസ്റ്റഡി നാലുദിവസത്തേക്ക് കൂടി നീട്ടി. സഹപ്രവര്ത്തകയായ ജൂനിയര് ജേര്ണലിസ്റ്റിനെ ലൈംഗികമായി പീഡിപ്പിച്ച കേസില് ചോദ്യം ചെയ്യാനായി തേജ്പാലിനെ 14 ദിവസത്തേക്ക് കസ്റ്റഡിയില് വേണമെന്നായിരുന്നു പോലീസിന്റെ ആവശ്യം. എന്നാല് ഈ ആവശ്യം കോടതി അംഗീകരിച്ചില്ല.
പ്രോസിക്യൂഷന് വാദങ്ങളെ ശരിവെക്കുന്ന തരത്തിലാണ് സെഷന്സ് കോടതി വിധിപ്രസ്താവം നടത്തിയത്. ലിഫ്റ്റില് വെച്ച് രണ്ട് തവണ തേജ്പാല് തന്നെ ലൈംഗികമായി പീഡിപ്പിച്ചു എന്നാണ് തെഹല്ക്കയിലെ മുന് ജീവനക്കാരിയായ പെണ്കുട്ടി പരാതിപ്പെട്ടിരിക്കുന്നത്. സ്ത്രീകള്ക്കെതിരായ അക്രമത്തിന് പുറമേ ബലാത്സംഗക്കേസും തേജ്പാലിനെതിരെ ചുമത്തിയിട്ടുണ്ട്.
കോടതി മുന്കൂര് ജാമ്യാപേക്ഷ തള്ളിയതിനെത്തുടര്ന്ന് അറസ്റ്റിലായ തരുണ് തേജ്പാലിനെ അന്വേഷണ സംഘം ഡി എന് എ, പോട്ടന്സി ടെസ്റ്റുകള്ക്ക് വിധേയനാക്കിയിരുന്നു. പെണ്കുട്ടി പീഡനത്തിനിരയായതായി പറയുന്ന ഹോട്ടിലിലും തേജ്പാലിനെ കൊണ്ടുപോയി തെളിവെടുത്തിരുന്നു. ഇങ്ങനെയൊരു സംഭവമേ ഉണ്ടായിട്ടില്ല എന്ന് നിഷേധിച്ച തേജ്പാല് പെണ്കുട്ടിയുടെ സമ്മതത്തോടെയാണ് തങ്ങള് ബന്ധപ്പെട്ടിരുന്നത് എന്ന് കഴിഞ്ഞദിവസം വാദിച്ചിരുന്നു.
അതേസമയം തെഹല്ക്ക മുന് മാനേജിംഗ് എഡിറ്റര് ഷോമ ചൗധരി പീഡനക്കേസില് ഗോവ കോടതിയിലെത്തി മൊഴി നല്കി. ദില്ലിയില് നിന്നും വെള്ളിയാഴ്ച രാത്രിയോടെ ഗോവയിലെത്തിയ ഷോമ ശനിയാഴ്ച രാവിലെയാണ് പനാജിയിലെ ജുഡീഷ്യല് ഫസ്റ്റ് ക്ലാസ് കോടതില് ഹാജരായത്.