കഴിഞ്ഞ അക്ഷയ തൃതീയക്ക് സ്വർണം വാങ്ങിയവർക്ക് ഇന്ന് ലാഭം 57450രൂപ..ഈ കണക്കുകൾ നോക്കൂ

Updated: Thursday, April 16, 2026, 12:38 [IST]

ഇന്ത്യയിൽ സ്വർണ്ണത്തിനും വെള്ളിക്കും വലിയ പ്രാധാന്യമുണ്ട്. കേവലം നിക്ഷേപം എന്നതിനപ്പുറം ഐശ്വര്യത്തിൻ്റേയും സമ്പദ് സമൃദ്ധിയുടേയും പ്രതീകമായാണ് ഇവയെ കണക്കാക്കുന്നത്. അക്ഷയതൃതീയ പോലുള്ള പുണ്യ ദിനങ്ങളിൽ ഈ ലോഹങ്ങൾ വാങ്ങുന്നതും വളരെ പ്രധാന്യത്തോടെയാണ് . ഈ വർഷം ഏപ്രിൽ 19-നാണ് അക്ഷയതൃതീയ.

എന്നാൽ പശ്ചിമേഷ്യയിലെ സംഘർഷങ്ങളും ആഗോള സാമ്പത്തിക മാന്ദ്യവും കാരണം വിലകൾ ചാഞ്ചാടുന്ന ഈ സമയത്ത് അക്ഷയതൃതീയക്ക് സ്വർണ്ണവും വെള്ളിയും വാങ്ങുന്നത് ലാഭകരമാകുമോയെന്നതാണ് ചോദ്യം. കഴിഞ്ഞ അക്ഷയതൃതീയ മുതലുള്ള സ്വർണ്ണത്തിന്റെ പ്രകടനം പരിശോധിച്ചാൽ അതിന് ഉത്തരം ലഭിക്കും.

കഴിഞ്ഞ വർഷം ഏപ്രിൽ 30 നായിരുന്നു അക്ഷയ തൃതീയ. അന്ന് 24 കാരറ്റ് സ്വർണ്ണത്തിന് 10 ഗ്രാമിന് 97,910 ആയിരുന്നു വില. ഇന്ന് 10 ഗ്രാമിന് 1,55,360 കൊടുക്കണം., അതായത് ഒരു വർഷം കൊണ്ട് സ്വർണ്ണവില ഏകദേശം 58.7% കുതിച്ചുയർന്നു. ഇത് സ്വർണ്ണത്തിന്റെ നിക്ഷേപ മൂല്യം അടിവരയിടുന്നു.

വെള്ളിയുടെ പ്രകടനം സ്വർണ്ണത്തേക്കാൾ മികച്ചതായിരുന്നു. കഴിഞ്ഞ അക്ഷയതൃതീയ മുതൽ വെള്ളി അതിശയകരമായ കുതിപ്പാണ് രേഖപ്പെടുത്തിയത്. ഏപ്രിലിൽ ഇതുവരെ വെള്ളി ഏകദേശം 6% നേട്ടമുണ്ടാക്കി സ്വർണ്ണത്തെ മറികടന്നു. മാർച്ചിൽ 15% മുതൽ 16% വരെ ഇടിഞ്ഞ് അതിന്റെ ഏറ്റവും മോശം പ്രതിമാസ പ്രകടനം കാഴ്ചവെച്ചതിന് ശേഷമാണിത്.

കഴിഞ്ഞ അക്ഷയതൃതീയ ദിനത്തിൽ വെള്ളിയുടെ വില ഒരു ലക്ഷം രൂപയായിരുന്നു. നിലവിൽ ഇത് 2.70 ലക്ഷം രൂപയിലെത്തി നിൽക്കുന്നു. അതായത് 170% നേട്ടം.

"അക്ഷയതൃതീയയിലെ സ്വർണ്ണത്തിന്റെ പ്രാധാന്യം ഒരു കാരണവശാലും അവഗണിക്കാൻ കഴിയില്ല. ഈ ദിവസം സാധാരണയായി സ്വർണ്ണവില കൂടുതലായിരിക്കും, എന്നിട്ടും ആളുകൾ സ്വർണ്ണം വാങ്ങാൻ ജ്വല്ലറി കടകളിലേക്ക് ഒഴുകിയെത്തും. അക്ഷയതൃതീയക്ക് മുന്നോടിയായി ജ്വല്ലറി വ്യാപാരികൾ വിവിധ ഉത്സവ ഓഫറുകൾ പ്രഖ്യാപിക്കുമ്പോൾ നിക്ഷേപം ആസൂത്രണം ചെയ്യുന്നത് കൂടുതൽ പ്രയോജനകരമാണ്',കാരറ്റ് ലെയിൻ ബ്ലോഗ് പറഞ്ഞു

യുഎസ്-ഇസ്രായേൽ-ഇറാൻ യുദ്ധം രൂക്ഷമായതിനെത്തുടർന്ന് 24 കാരറ്റ്, 22 കാരറ്റ്, 18 കാരറ്റ് സ്വർണ്ണ വിലകളിൽ ഏകദേശം 14% ഇടിവ് രേഖപ്പെടുത്തിയിരുന്നു. എന്നാൽ ഇപ്പോൾ 2% വർധനവാണ് സ്വർണത്തിൽ രേഖപ്പെടുത്തിയിരിക്കുന്നത്. വില വലിയ തോതിൽ ഇടിഞ്ഞെങ്കിലും ഇപ്പോഴും സ്വർണത്തിന് അനുകൂലമാണ് സാഹചര്യം. ഈ വർഷം തന്നെ സ്വർണം പുതിയ റെക്കോഡുകൾ ഭേദിക്കുമെന്നാണ് പ്രവചനങ്ങളിൽ ഏറെയും. വില പവന് 2 ലക്ഷം വരെ ആകാനുള്ള സാധ്യതയുണ്ടെന്ന വിലയിരുത്തലുകളും ഉണ്ട്.