തൂക്കം നോക്കി മാത്രം സ്വർണ്ണം എടുക്കരുത്; നഷ്ടം ഒഴിവാക്കാൻ ഈ 6 രഹസ്യങ്ങൾ അറിഞ്ഞിരിക്കണം

പരമ്പരാഗതമായി നമ്മൾ സ്വർണ്ണത്തെ ഒരു നിക്ഷേപമായും തലമുറകളിലേക്ക് കൈമാറേണ്ട ഒരു സമ്പത്തായും ഒക്കെയാണ് കാണുന്നത്. അതുകൊണ്ട് തന്നെ ഈ കാലഘട്ടത്തിൽ, ഓരോ തവണ സ്വർണ്ണം വാങ്ങുമ്പോഴും ഉപഭോക്താക്കൾ വലിയ രീതിയിൽ ആലോചിക്കാറുണ്ട്. എന്നാൽ ഭൂരിഭാഗം ആളുകളും ഇപ്പോഴും കരുതുന്നത് സ്വർണ്ണാഭരണങ്ങളുടെ മൂല്യം നിർണ്ണയിക്കുന്നത് അതിന്റെ തൂക്കം മാത്രമാണെന്നാണ്. എന്നാൽ യഥാർത്ഥത്തിൽ അങ്ങനെയല്ല. തൂക്കത്തിന് അപ്പുറം സ്വർണ്ണത്തിന്റെ മൂല്യം കൂട്ടുന്ന മറ്റ് പല ഘടകങ്ങളും ഉണ്ടെന്ന് ജ്വല്ലറി രംഗത്തെ വിദഗ്ദ്ധർ ചൂണ്ടിക്കാണിക്കുന്നു.

ഇതിനെക്കുറിച്ച് പ്രമുഖ ജ്വല്ലറി ബ്രാൻഡിന്റെ സിഇഒ ആയ അമിത് മോദക് പറയുന്ന ഒരു ലളിതമായ ഉദാഹരണം ഇങ്ങനെയാണ്, "നമ്മൾ വാങ്ങുന്ന 25 ഗ്രാം തൂക്കമുള്ള ഒരു പരമ്പരാഗത മാല ഒരുപക്ഷേ കല്യാണങ്ങൾക്കോ മറ്റ് വലിയ ആഘോഷങ്ങൾക്കോ മാത്രമായിരിക്കും ധരിക്കുക. എന്നാൽ 10 ഗ്രാം തൂക്കമുള്ള ഒരു മോഡേൺ ലോക്കറ്റ് ആഴ്ചയിൽ പലതവണ ഓഫീസിലോ പുറത്തുപോകുമ്പോഴോ ഒക്കെ ഉപയോഗിക്കാൻ സാധിക്കും. ഇവിടെ പ്രായോഗികമായ മൂല്യം ആ ചെറിയ ലോക്കറ്റിനാണ് കൂടുതൽ." ഇന്നത്തെ കാലത്ത് ആളുകൾ സ്വർണ്ണം വാങ്ങുമ്പോൾ തൂക്കത്തിനൊപ്പം അതിന്റെ ഭംഗിയും ഉപയോഗക്ഷമതയും കൂടി നോക്കുന്നുണ്ട്. സ്വർണ്ണം തിരഞ്ഞെടുക്കുമ്പോൾ ശ്രദ്ധിക്കേണ്ട 6 പ്രധാന കാര്യങ്ങൾ താഴെ പറയുന്നവയാണ്.

1. പണിക്കൂലിയും നിർമ്മാണ മികവും

ഒരു ആഭരണത്തിന്റെ യഥാർത്ഥ വില നിശ്ചയിക്കുന്നതിൽ അത് നിർമ്മിക്കാൻ എടുത്ത സമയത്തിനും അധ്വാനത്തിനും വലിയ പങ്കുണ്ട്. കൈകൊണ്ട് കൊത്തുപണികൾ ചെയ്തവ, ഫിലിഗ്രി വർക്കുകൾ, മീനാകാരി ഡിസൈനുകൾ, ടെമ്പിൾ ആർട്ട് എന്നിവയെല്ലാം മണിക്കൂറുകളോളം നീളുന്ന കഠിനാധ്വാനത്തിലൂടെയാണ് ഉണ്ടാക്കുന്നത്. ഒരേ തൂക്കമുള്ള രണ്ട് ആഭരണങ്ങൾ ആണെങ്കിൽ പോലും, അതിലടങ്ങിയിരിക്കുന്ന പണിക്കൂറിന്റെയും കലയുടെയും മികവ് അനുസരിച്ച് അവയുടെ വിപണി മൂല്യത്തിൽ വലിയ വ്യത്യാസമുണ്ടാകും.

2. സ്മാർട്ട് ഡിസൈനുകൾ

ഏത് തരം വസ്ത്രങ്ങൾക്കൊപ്പവും പല സന്ദർഭങ്ങളിലും ഒരേപോലെ അണിയാൻ പറ്റുന്ന ആഭരണങ്ങൾക്കാണ് മൂല്യം കൂടുതൽ. മെലിഞ്ഞ മാലകൾ, ഒന്നിന് മുകളിൽ ഒന്നായി ധരിക്കാൻ പറ്റുന്ന മോതിരങ്ങൾ, ലളിതമായ പെൻഡന്റുകൾ എന്നിവ ഏത് ലുക്കിനൊപ്പവും മാച്ച് ചെയ്യാം. എപ്പോഴും ലോക്കറുകളിൽ സൂക്ഷിച്ചുവെക്കുന്ന കനത്ത ആഭരണങ്ങളേക്കാൾ ഇത്തരം ലൈറ്റ് വെയിറ്റ് കളക്ഷനുകളാണ് ഇന്നത്തെ ട്രെൻഡ്.

3. ഫിനിഷിങ് ക്വാളിറ്റി

ഒരു ആഭരണത്തിന്റെ നിർമ്മാണ നിലവാരം മനസ്സിലാക്കാൻ അതിന്റെ ഫിനിഷിങ് ശ്രദ്ധിച്ചാൽ മതിയാകും. പോളിഷിംഗ്, ആഭരണത്തിന്റെ ഇരുവശങ്ങളിലുമുള്ള കൃത്യത, കൊളുത്തുകളുടെ സുരക്ഷിതത്വം, അരികുകളുടെ മിനുസം എന്നിവയെല്ലാം കൃത്യമായി പരിശോധിക്കണം. മികച്ച ഫിനിഷിങ് ഉള്ള ആഭരണങ്ങൾ കൂടുതൽ കാലം ഈടുനിൽക്കുമെന്ന് മാത്രമല്ല, ധരിക്കുമ്പോൾ നല്ല സുഖം നൽകുകയും ചെയ്യും.

4. ധരിക്കാനുള്ള സൗകര്യം

വലിയ ഭാരമുള്ളതും ശരീരത്തിൽ തറയ്ക്കുന്നതുമായ ആഭരണങ്ങൾ ആളുകൾ സാധാരണയായി ദിവസവും ധരിക്കാൻ ഇഷ്ടപ്പെടാറില്ല. ഭാരം കൃത്യമായി വിഭജിച്ചിട്ടുള്ളതും, ശരീരത്തിന് അസ്വസ്ഥത ഉണ്ടാക്കാത്തതുമായ ഡിസൈനുകളാണ് എപ്പോഴും തിരഞ്ഞെടുക്കേണ്ടത്. എങ്കിൽ മാത്രമേ അവ നമ്മുടെ നിത്യജീവിതത്തിന്റെ ഭാഗമായി മാറ്റാൻ സാധിക്കൂ.

5. പല സന്ദർഭങ്ങളിൽ ഉപയോഗിക്കാനുള്ള കഴിവ്

ഓഫീസ് മീറ്റിംഗുകളിൽ ധരിക്കാൻ പറ്റുന്ന ലളിതമായ ഒരു മാല, വൈകുന്നേരത്തെ പാർട്ടിയിലോ വിശേഷ ദിവസങ്ങളിലോ അല്പം മാറ്റങ്ങൾ വരുത്തി ധരിക്കാൻ സാധിച്ചാൽ അത് വലിയൊരു ലാഭമാണ്. ഒരൊറ്റ പർച്ചേസിലൂടെ പല ആവശ്യങ്ങൾ നടക്കാൻ സഹായിക്കുന്ന ഇത്തരം വേഴ്സറ്റൈൽ ആഭരണങ്ങൾക്കാണ് ഇപ്പോൾ വിപണിയിൽ ആവശ്യക്കാർ ഏറുന്നത്.

6. ദീർഘകാലം നിലനിൽക്കുന്ന നിർമ്മിതി

കാഴ്ചയിലെ ഭംഗിക്ക് പുറമെ, ആഭരണങ്ങളുടെ നിർമ്മിതി ശക്തമായിരിക്കണം. കട്ടിയുള്ള ലിങ്കുകൾ, ഉറപ്പുള്ള കല്ലുകൾ, നല്ല കൊളുത്തുകൾ എന്നിവയുണ്ടെങ്കിൽ ആഭരണങ്ങൾ പെട്ടെന്ന് പൊട്ടിപ്പോകുകയോ കേടുപാടുകൾ വരികയോ ഇല്ല. ഇത് ഭാവിയിൽ വരാവുന്ന റിപ്പയറിങ് ചിലവുകൾ കുറയ്ക്കാൻ സഹായിക്കും.

ഈ ഘടകങ്ങൾക്കെല്ലാം പുറമെ, സ്വർണ്ണം വാങ്ങുമ്പോൾ ഹാൾമാർക്കിങ് ഉണ്ടെന്ന് ഉറപ്പുവരുത്തേണ്ടത് അത്യാവശ്യമാണ്. സ്വർണ്ണത്തിന്റെ പരിശുദ്ധിക്കൊപ്പം അതിന്റെ ഡിസൈനും ഈടുനിൽപ്പും കൂടി വിലയിരുത്തി മാത്രം പണം മുടക്കുക. ആഭരണങ്ങൾ വാങ്ങുമ്പോൾ വെറും റീസെയിൽ വാല്യൂ (തിരിച്ചു വിൽക്കുമ്പോഴുള്ള വില) മാത്രം നോക്കാതെ, നമ്മുടെ ലൈഫ് സ്റ്റൈലിന് ഇണങ്ങുന്നവ തിരഞ്ഞെടുക്കാൻ ശ്രദ്ധിക്കുക.