സ്വർണ വില കുതിച്ചു, പക്ഷെ ഇന്ത്യക്കാരുടെ സ്വർണപ്രേമം കുറഞ്ഞില്ല: വന്തോതില് വാങ്ങിക്കൂട്ടി, കണക്ക്
ഡല്ഹി: കേരളത്തിന് അകത്തും പുറത്തും സ്വർണ വിലയില് സമാനതകളില്ലാത്ത വർധനവാണ് അടുത്ത കാലത്തായി ഉണ്ടായത്. പവന് 54000 എന്ന അപ്രതീക്ഷിത നിരക്കിലേക്കായിരുന്നു സ്വർണം കുതിച്ചത്. സാധാരണക്കാരെ സ്വർണത്തില് നിന്നും പിന്തിരിപ്പിക്കുന്ന തരത്തിലുള്ളതായിരുന്നു ഈ വർധനവ്. എന്നാല് രാജ്യത്തെ മൊത്തം സ്വർണ ആവശ്യകതയില് ഇടിവ് വരുത്താന് ഈ റെക്കോർഡ് വർധനവിന് സാധിച്ചിട്ടില്ലെന്നാണ് റിപ്പോർട്ടുകള് വ്യക്തമാക്കുന്നത്.
രാജ്യത്തെ മൊത്തം സ്വർണ ആവശ്യകതയില് വർധനവ് രേഖപ്പെടുത്തുകയും ചെയ്തിട്ടുണ്ട്. സ്വർണ്ണ ആവശ്യകതയിൽ 8% വാർഷിക വർദ്ധനവാണ് ഇന്ത്യയിലുണ്ടായിരിക്കുന്നത്. മാർച്ച് പാദത്തിൽ ഇന്ത്യയുടെ സ്വർണ ആവശ്യകത 136.6 ടണ്ണിലെത്തി. സ്വർണ്ണ വില റെക്കോർഡ് ഉയരത്തിൽ എത്തിയിട്ടും, ശക്തമായ സാമ്പത്തിക പശ്ചാത്തലാണ് ഈ വർധനവിന് കാരണമെന്നാണ് കണക്ക് വ്യക്തമാക്കുന്നത്. റിസർവ് ബാങ്ക് ഓഫ് ഇന്ത്യയുടെ (ആർ ബി ഐ) സ്വർണം വാങ്ങൽ പ്രക്രിയയും ഈ കണക്കുകളില് സഹായകരമായിട്ടുണ്ട്.
ജനുവരി-മാർച്ച് കാലയളവിൽ, ഇന്ത്യയുടെ സ്വർണ്ണ ആവശ്യകത പ്രതിവർഷം 20% വർദ്ധിച്ച് 75470 കോടി രൂപയിലെത്തി. വാങ്ങുന്ന അളവിലെ വർധനവും ത്രൈമാസ ശരാശരി വിലകളിലെ 11% ഉയർച്ചയുമാണ് ഈ നേട്ടത്തിന് കാരണമായത്. 'ആഭരണങ്ങളും നിക്ഷേപവും ഉൾക്കൊള്ളുന്ന ഇന്ത്യയുടെ മൊത്തത്തിലുള്ള സ്വർണ്ണ ആവശ്യം ഈ വർഷം ജനുവരി-മാർച്ച് മാസങ്ങളിൽ 136.6 ടണ്ണായി ഉയർന്നു. മുൻ വർഷം ഇതേ കാലയളവിൽ 126.3 ടണ്ണിൽ നിന്ന് വർധിച്ചു' എന്നാണ് വേൾഡ് ഗോൾഡ് കൗൺസിൽ പുറത്തിറക്കിയ 'ഗോൾഡ് ഡിമാൻഡ് ട്രെൻഡ്സ് ക്യു 1 2024' എന്ന റിപ്പോർട്ട് വ്യക്തമാക്കുന്നത്.
മുൻ വർഷം ഇതേ കാലയളവിൽ 126.3 ടണ്ണായിരുന്നു ഇന്ത്യയിലെ സ്വർണ ആവശ്യകത. ജ്വല്ലറി മേഖലയില് നിന്നുള്ള ഡിമാൻഡ് 4% വർധിച്ച് 91.9 ടണ്ണിൽ നിന്ന് 95.5 ടണ്ണിലെത്തി മൊത്തത്തിലുള്ള കണക്കില് വലിയ വർധനവ് രേഖപ്പെടുത്തി. കൂടാതെ, കട്ടികള്, നാണയങ്ങൾ എന്നിവയുൾപ്പെടെയുള്ള നിക്ഷേപ ആവശ്യം 19% ഉയർന്ന് 34.4 ടണ്ണിൽ നിന്ന് 41.1 ടണ്ണായി ഉയർന്നു.
വില റെക്കോർഡ് നിരക്കിലേക്ക് എത്തിയിട്ടും ഇന്ത്യയുടെ സ്ഥിരമായ കരുത്തുറ്റ മാക്രോ ഇക്കണോമിക് അന്തരീക്ഷം സ്വർണ്ണാഭരണ ഉപഭോഗത്തിന് അനുകൂലമായി തുടരുന്നുവെന്നാണ് വേൾഡ് ഗോൾഡ് കൗൺസിൽ ഇന്ത്യയുടെ റീജിയണൽ സി ഇ ഒ സച്ചിൻ ജെയിൻ വ്യക്തമാക്കുന്നു. 'മാർച്ചിൽ വില ചരിത്രത്തിലെ ഏറ്റവും ഉയർന്ന നിരക്കിലെത്തിയെങ്കിലുംഇന്ത്യയുടെ തുടർച്ചയായ ശക്തമായ മാക്രോ ഇക്കണോമിക് അന്തരീക്ഷം സ്വർണ്ണാഭരണ ഉപഭോഗത്തിന് സഹായകമായിരുന്നു' സച്ചിൻ ജെയിൻ പറഞ്ഞു.
2023ൽ ആകെ 747.5 ടണ്ണായിരുന്നു സ്വർണത്തിൻ്റെ ആവശ്യം. ഈ വർഷം ഇത് 700-800 ടൺ വരെയാകാൻ സാധ്യതയുണ്ടെന്നും ജെയിൻ കൂട്ടിച്ചേർത്തു. എന്നാല് സ്വർണ വില വലിയ തോതില് കുതിക്കുകയാണെങ്കില് ഇതില് നേരിയ ഇടിവുണ്ടായേക്കാം. എന്നാല് ഭാവിയിലും സ്വർണത്തിന്റെ ആവശ്യകത ഉയരാനാണ് സാധ്യതയെന്നും അദ്ദേഹം പറയുന്നു.
Click it and Unblock the Notifications
Sign in with Google