സ്വര്ണം അത്ര സുരക്ഷിതമല്ല... പിടിമുറുക്കി ഡോളര്; പലിശ തരാത്ത പൊന്നിനെ കൈവിടുന്നോ?
പശ്ചിമേഷ്യയില് ഭൗമരാഷ്ട്രീയ സംഘര്ഷങ്ങളും യുദ്ധഭീതിയും അഭൂതപൂര്വ്വമായ രീതിയില് വര്ധിക്കുമ്പോഴും സുരക്ഷിത നിക്ഷേപമെന്ന നിലയില് സ്വര്ണത്തിനുള്ള തിളക്കം മങ്ങുന്നു. സാധാരണയായി ആഗോളതലത്തില് തര്ക്കങ്ങളോ യുദ്ധങ്ങളോ ഉണ്ടാകുമ്പോള് നിക്ഷേപകര് ഏറ്റവും സുരക്ഷിതമായ ആശ്രയമായി കാണുന്നത് സ്വര്ണത്തെയാണ്.
എന്നാല് യുഎസും ഇറാനും തമ്മിലുള്ള നേരിട്ടുള്ള സൈനിക നീക്കങ്ങള് വിപണിയെ കലുഷിതമാക്കിയിട്ടും ആഗോളതലത്തില് സ്വര്ണവിലയില് വില്പന സമ്മര്ദ്ദം തുടരുന്ന വിചിത്രമായ കാഴ്ചയ്ക്കാണ് സാമ്പത്തിക ലോകം സാക്ഷ്യം വഹിച്ചത്. യുഎസും ഇറാനും സമാധാന കരാറിലെത്തിയിട്ടും സ്വര്ണത്തിന് തിരികെ കയറാനായിട്ടില്ല. രാജ്യാന്തര വിപണിയില് സ്പോട്ട് ഗോള്ഡ് വില ഔണ്സിന് 4,060 ഡോളറിന് അടുത്താണ് ഇപ്പോള് വ്യാപാരം നടത്തുന്നത്.
യു.എസ് ഗോള്ഡ് ഫ്യൂച്ചേഴ്സിലും സമാനമായ ഇടിവ് രേഖപ്പെടുത്തിയിട്ടുണ്ട്. കഴിഞ്ഞ നാല് മാസമായി ആഗോളതലത്തില് സ്വര്ണവില ഇടിവിന്റെ പാതയിലാണ് സഞ്ചരിക്കുന്നത്. ഒരു മാസത്തിനിടെ മാത്രം സ്വര്ണത്തിന് പത്ത് ശതമാനത്തിലധികം മൂല്യനഷ്ടം സംഭവിച്ചു കഴിഞ്ഞു എന്നത് നിക്ഷേപകരെ ആശങ്കപ്പെടുത്തുന്ന പ്രധാന കാര്യമാണ്. ഇത് സമീപകാലത്തെ ഏറ്റവും വലിയ വില്പന സമ്മര്ദ്ദങ്ങളിലൊന്നാണ്.
ഭൗമരാഷ്ട്രീയ അസ്ഥിരതകളേക്കാള് ഭാവിയെക്കുറിച്ചുള്ള സാമ്പത്തിക പ്രത്യാഘാതങ്ങളിലേക്കാണ് നിക്ഷേപകര് ഇപ്പോള് കൂടുതല് ശ്രദ്ധ കേന്ദ്രീകരിക്കുന്നത്. കഴിഞ്ഞ ആഴ്ചാവസാനം കുവൈത്തിലെയും ബഹ്റൈനിലെയും യുഎസ് സൈനിക താവളങ്ങള്ക്ക് നേരെ ഇറാന് നടത്തിയ ഡ്രോണ്, മിസൈല് ആക്രമണങ്ങള്ക്ക് പിന്നാലെ അന്താരാഷ്ട്ര വിപണിയില് അസംസ്കൃത എണ്ണ അഥവാ ക്രൂഡ് ഓയില് വില കുത്തനെ ഉയരുകയുണ്ടായി.
എണ്ണവിലയിലെ ഈ വലിയ കുതിപ്പ് ആഗോളതലത്തില് പണപ്പെരുപ്പ ഭീതി വീണ്ടും ശക്തമാക്കാന് കാരണമായിട്ടുണ്ട്. സ്വര്ണത്തെ സാധാരണയായി ദീര്ഘകാല പണപ്പെരുപ്പത്തിനെതിരെയുള്ള മികച്ച പ്രതിരോധമായിട്ടാണ് നിക്ഷേപകര് കണക്കാക്കുന്നത്. എന്നാല് പണപ്പെരുപ്പം കുറയാതെ ദീര്ഘകാലം നിലനില്ക്കുമെന്ന ആശങ്ക ശക്തമാകുമ്പോള്, യുഎസ് ഫെഡറല് റിസര്വ് ഉള്പ്പെടെയുള്ള ആഗോള കേന്ദ്ര ബാങ്കുകള് പലിശനിരക്കുകള് ദീര്ഘകാലത്തേക്ക് ഉയര്ന്ന നിലയില് തന്നെ നിലനിര്ത്താന് നിര്ബന്ധിതരാകും.
ഇത്തരത്തില് കേന്ദ്ര ബാങ്കുകള് പലിശനിരക്ക് ഉയര്ത്തുന്നത് സ്വര്ണത്തോടുള്ള ആകര്ഷണീയത ഗണ്യമായി കുറയ്ക്കാന് കാരണമാകുന്നു. പലിശയോ മറ്റ് ലാഭവിഹിതങ്ങളോ നല്കാത്ത ഒരു നിക്ഷേപ മാര്ഗമായതുകൊണ്ട് തന്നെ ഉയര്ന്ന പലിശനിരക്കുള്ള സാമ്പത്തിക സാഹചര്യങ്ങളില് സ്വര്ണത്തില് പണം മുടക്കാന് വന്കിട നിക്ഷേപകര് മടിക്കുന്നു. പലിശനിരക്ക് ഉയരുമ്പോള് സ്വാഭാവികമായും യുഎസ് ബോണ്ട് യീല്ഡും ഡോളറിന്റെ മൂല്യവും ശക്തമായി വര്ധിക്കും.
ഇത് സ്വര്ണവിലയെ താഴേയ്ക്ക് നയിക്കുന്ന പ്രധാന ഘടകങ്ങളിലൊന്നാണ്. തന്മൂലം ഭൗമരാഷ്ട്രീയ സംഘര്ഷങ്ങളേക്കാള് പലിശനിരക്കിലെ മാറ്റങ്ങളാണ് ഇപ്പോള് വിപണിയുടെ ഗതി തീരുമാനിക്കുന്നത്. യുഎസും ഇറാനും തമ്മില് വീണ്ടും മിസൈല് ആക്രമണങ്ങള് ഉണ്ടായത് ക്രൂഡ് ഓയില് വില വരും ദിവസങ്ങളില് എങ്ങോട്ട് പോകുമെന്ന ആശങ്ക വര്ധിപ്പിക്കുന്നുണ്ട് എന്ന് കെസിഎം ട്രേഡിലെ ചീഫ് മാര്ക്കറ്റ് അനലിസ്റ്റായ ടിം വാട്ടറര് പറയുന്നു.
ഇത് ആഗോള പണപ്പെരുപ്പത്തെയും പലിശനിരക്ക് കുറയ്ക്കുന്നത് സംബന്ധിച്ച കേന്ദ്ര ബാങ്കുകളുടെ തീരുമാനങ്ങളെയും കൂടുതല് സങ്കീര്ണ്ണമാക്കും. കൂടുതല് കര്ശനമായ ധനനയത്തിലേക്ക് യുഎസ് കടക്കുമെന്ന സൂചനകള് വിപണിയെ സ്വാധീനിക്കുന്നുണ്ട്. ഫെഡറല് റിസര്വ് ഈ വര്ഷം പലിശനിരക്കുകള് മൂന്ന് തവണയെങ്കിലും വര്ധിപ്പിച്ചേക്കുമെന്നാണ് വിപണിയില് നിന്നുള്ള പുതിയ സൂചനകള് വ്യക്തമാക്കുന്നത്.
ഡിസംബറോടെ പലിശ നിരക്കില് വീണ്ടുമൊരു വര്ധനവ് ഉണ്ടാകാനുള്ള സാധ്യത 80 ശതമാനത്തോളമാണെന്ന് സിഎംഇ ഫെഡ് വാച്ച് കണക്കുകള് വ്യക്തമാക്കുന്നു. പലിശനിരക്കുകള് ദീര്ഘകാലത്തേക്ക് ഉയര്ന്ന നിലയില് തുടരുമെന്ന് ഉറപ്പാകുന്നതോടെ നിക്ഷേപകര് സ്വര്ണത്തില് നിന്നും പണം പിന്വലിച്ച് യുഎസ് ബോണ്ടുകളിലേക്ക് മാറ്റുകയാണ് ചെയ്യുന്നത്.
അടുത്തിടെ പുറത്തുവന്ന യു.എസിലെ പണപ്പെരുപ്പ കണക്കുകളും ഫെഡറല് റിസര്വിന്റെ കര്ശന നിലപാടുകളും വിപണിയുടെ ആശങ്കകളെ ശരിവെയ്ക്കുന്നതായിരുന്നു. പണപ്പെരുപ്പത്തിന്റെ തോത് ലക്ഷ്യമിട്ട രീതിയില് കുറയാത്ത പശ്ചാത്തലത്തില് പലിശനിരക്കുകള് കുറയ്ക്കുന്നതിനെക്കുറിച്ച് ചിന്തിക്കാന് പോലും സാമ്പത്തിക വിദഗ്ധര് തയ്യാറാകുന്നില്ല. ഈ പശ്ചാത്തലത്തില് ഈ വാരം പുറത്തുവരാനിരിക്കുന്ന യുഎസ് തൊഴില് റിപ്പോര്ട്ടും മറ്റ് ഔദ്യോഗിക വിവരങ്ങളുമാണ് നിക്ഷേപകര് ഇപ്പോള് ഉറ്റുനോക്കുന്നത്.
ഇത്രയധികം വിപരീത ഘടകങ്ങള് ഉണ്ടായ സാഹചര്യത്തിലും ഔണ്സിന് 4,000 ഡോളര് എന്ന സുപ്രധാന പ്രതിരോധ പരിധിക്ക് മുകളില് സ്വര്ണവില നിലനില്ക്കുന്നത് വിപണിയിലെ ശക്തമായ വാങ്ങല് താല്പര്യത്തെയാണ് കാണിക്കുന്നത്. വില താഴേക്ക് പോകുമ്പോഴൊക്കെ വലിയ തോതില് പുതിയ വാങ്ങലുകാര് വിപണിയിലേക്ക് എത്തുന്നുണ്ട്. പശ്ചിമേഷ്യന് പ്രതിസന്ധികളോട് സ്വര്ണം ഇപ്പോള് കൂടുതല് പ്രതിരോധശേഷി കൈവരിച്ചിട്ടുണ്ടെന്നാണ് പല പ്രമുഖ വിപണി നിരീക്ഷകരും അവകാശപ്പെടുന്നത്.
എങ്കിലും സ്വര്ണ്ണത്തിന്റെ ദീര്ഘകാല വളര്ച്ചാ സാധ്യതകള് ഇനിയും മങ്ങിയിട്ടില്ലെന്നാണ് വലിയൊരു വിഭാഗം നിരീക്ഷകര് പ്രവചിക്കുന്നത്. വരും മാസങ്ങളില് പശ്ചിമേഷ്യയിലെ സൈനിക സംഘര്ഷങ്ങളില് കാര്യമായ കുറവുണ്ടാകുകയും ക്രൂഡ് ഓയില് വില സാധാരണ നിലയിലേക്ക് താഴുകയും ചെയ്താല് ആഗോള പണപ്പെരുപ്പ സമ്മര്ദ്ദത്തിന് അയവുണ്ടാകും. ഇത് പലിശനിരക്കുകള് ഘട്ടംഘട്ടമായി കുറയ്ക്കുന്നതിലേക്ക് ഫെഡറല് റിസര്വിനെ നയിക്കാന് കാരണമായേക്കാം.
അത്തരമൊരു അനുകൂല സാഹചര്യം സൃഷ്ടിക്കപ്പെട്ടാല് ഈ വര്ഷം അവസാനത്തോടെ സ്വര്ണവില കുതിച്ചുയരാന് സാധ്യതയുണ്ട്. പശ്ചിമേഷ്യയില് സമാധാനം പുനഃസ്ഥാപിക്കപ്പെടുകയും യു.എസ് ഡോളര് ദുര്ബലപ്പെടുകയും ചെയ്താല് സ്വര്ണവില ഔണ്സിന് 5,000 ഡോളര് എന്ന പുതിയ ചരിത്ര നാഴികക്കല്ലിലേക്ക് എത്തിയേക്കാമെന്നും ടിം വാട്ടറര് ചൂണ്ടിക്കാണിക്കുന്നു
Click it and Unblock the Notifications
Sign in with Google