സ്വർണം ബാങ്ക് ലോക്കറിൽ നിന്ന് നഷ്ടപ്പെട്ടാൽ എന്ത് ചെയ്യും? ബാങ്കുകൾക്ക് ബാധ്യതയില്ല? സൂക്ഷിക്കാം ഇങ്ങനെ

Updated: Monday, January 26, 2026, 16:06 [IST]

സ്വർണ്ണവില ഉയരുന്നതിനനുസരിച്ച് സുരക്ഷയെ കുറിച്ചുള്ള ആശങ്കകളും വർദ്ധിക്കുകയാണ്. തങ്ങളുടെ സ്വർണ്ണം സുരക്ഷിതമാക്കാൻ പലരും ബാങ്ക് ലോക്കറുകൾ തിരഞ്ഞെടുക്കുന്നത്. എന്നാൽ, ലോക്കറിൽ സൂക്ഷിക്കുന്ന സ്വർണ്ണം നഷ്ടപ്പെട്ടാൽ ബാങ്കിന്റെ ബാധ്യത വളരെ പരിമിതമാണ് എന്നതാണ് പ്രധാന പ്രശ്നം.

ഈ വിഷയത്തിൽ റിസർവ് ബാങ്ക് ഓഫ് ഇന്ത്യയുടെ (ആർബിഐ) മാർഗ്ഗനിർദ്ദേശങ്ങൾക്ക് വലിയ പ്രാധാന്യമുണ്ട്. ബാങ്ക് ലോക്കറുകളിലെ ഇൻഷുറൻസ് പരിരക്ഷയുടെ പരിമിതികളെക്കുറിച്ചും സ്വർണ്ണം സുരക്ഷിതമാക്കാനുള്ള ബദൽ മാർഗ്ഗങ്ങളെക്കുറിച്ചും വിശദമായി നോക്കാം.

ആർബിഐടെ നിയമപ്രകാരം, "ലോക്കറിൽ സൂക്ഷിച്ച സാധനങ്ങൾ' നഷ്ടപ്പെട്ടാൽ തങ്ങൾക്ക് ബാധ്യതയില്ലെന്ന് ബാങ്കുകൾക്ക് അവകാശപ്പെടാൻ കഴിയില്ല. തീപിടുത്തം, മോഷണം, കവർച്ച, കെട്ടിടം തകരൽ, അല്ലെങ്കിൽ ജീവനക്കാരുടെ തട്ടിപ്പ് എന്നിവ മൂലമുണ്ടാകുന്ന നഷ്ടങ്ങൾക്ക് ബാങ്കിന്റെ ബാധ്യത നിലവിലുള്ള സേഫ് ഡെപ്പോസിറ്റ് ലോക്കറിന്റെ വാർഷിക വാടകയുടെ നൂറിരട്ടിക്ക് തുല്യമായ തുകയായിരിക്കും. ഉദാഹരണത്തിന് ഒരു ലോക്കറിന്റെ വാർഷിക വാടക 2,000 ആണെങ്കിൽ, ബാങ്കിന്റെ പരമാവധി ബാധ്യത 2,00,000 മാത്രമായിരിക്കും. നിലവിലെ സ്വർണ്ണവിലയനുസരിച്ച്, ഈ തുകയ്ക്ക് 16 ഗ്രാം സ്വർണ്ണം പോലും ലഭിക്കില്ല. പ്രായോഗിക ബുദ്ധിമുട്ടുകൾ കാരണം ലോക്കറിലെ സ്വർണ്ണത്തിന് പൂർണ്ണ ഇൻഷുറൻസ് പരിരക്ഷ നൽകാൻ ബാങ്കുകൾക്ക് സാധിക്കില്ല.

ബാങ്ക് ലോക്കറിൽ സൂക്ഷിക്കുന്ന സ്വർണ്ണത്തിന് സുരക്ഷ ഉറപ്പാക്കാൻ സ്വതന്ത്രമായ ഇൻഷുറൻസ് പോളിസികൾ പരിഗണിക്കാവുന്നതാണ്. ജനറൽ ഇൻഷുറൻസ് കമ്പനികൾ സാധാരണയായി മോഷണം, കവർച്ച, തീപിടുത്തം, പ്രകൃതി ദുരന്തങ്ങൾ എന്നിവ മൂലമുണ്ടാകുന്ന നഷ്ടങ്ങൾക്ക് പരിരക്ഷ നൽകാറുണ്ട്. മറ്റൊരു മികച്ച പരിഹാരമാണ് ഗോൾഡ് ഓവർഡ്രാഫ്റ്റ് (Gold OD) സൗകര്യം. ഇത് സ്വർണ്ണം സുരക്ഷിതമായി സൂക്ഷിക്കാൻ സഹായിക്കുന്നതിനൊപ്പം, ആവശ്യമുള്ളപ്പോൾ പണം ലഭ്യമാക്കാനും ഉപകരിക്കുന്നു. സ്വർണ്ണാഭരണങ്ങൾ ഈടായി നൽകുമ്പോൾ ഒരു നിശ്ചിത ഓവർഡ്രാഫ്റ്റ് പരിധി ലഭിക്കുന്ന ക്രെഡിറ്റ് സംവിധാനമാണിത്.

5 ലക്ഷത്തിന് മുകളിലുള്ള വായ്പകൾക്ക് സ്വർണ്ണത്തിന്റെ കമ്പോളവിലയുടെ ഏകദേശം 75% വരെ ബാങ്ക് ഓവർഡ്രാഫ്റ്റ് പരിധിയായി വാഗ്ദാനം ചെയ്യുന്നു. ഈടായി നൽകുന്ന സ്വർണ്ണത്തിന്റെ പൂർണ്ണ ബാധ്യത ബാങ്കിനാണ്. സ്വർണ്ണത്തിന് കേടുപാടുകൾ സംഭവിക്കുകയോ നഷ്ടപ്പെടുകയോ ചെയ്താൽ, നിലവിലുള്ള കമ്പോളവിലയനുസരിച്ചുള്ള നഷ്ടപരിഹാരം ബാങ്ക് നൽകാൻ ബാധ്യസ്ഥരാണ്.

ഗോൾഡ് ഓവർഡ്രാഫ്റ്റ് സൗകര്യത്തിന് നിരവധി സവിശേഷതകളുമുണ്ട്: പിൻവലിക്കുന്ന തുകയ്ക്ക് മാത്രം പലിശ, സ്വർണ്ണം വിൽക്കാതെ പണലഭ്യത, ആകർഷകമായ പലിശ നിരക്കുകൾ, നിശ്ചിത EMI ഇല്ലാത്തതിനാൽ തിരിച്ചടവിനുള്ള സ്വാതന്ത്ര്യം, എളുപ്പത്തിൽ പുതുക്കാനുള്ള ഓപ്ഷനുകൾ എന്നിവ ഇതിൽപ്പെടുന്നു. സുരക്ഷയും പണലഭ്യതയും ഒരേസമയം വാഗ്ദാനം ചെയ്യുന്ന ഗോൾഡ് ഓവർഡ്രാഫ്റ്റ് സൗകര്യം, പരമ്പരാഗത ബാങ്ക് ലോക്കർ സൗകര്യത്തിന് ഒരു മികച്ച ബദലായി മാറിയിരിക്കുന്നു. എന്നാൽ, അന്തിമമായ തിരഞ്ഞെടുപ്പ് ഉപഭോക്താവിന്റെ സാമ്പത്തിക ആവശ്യങ്ങളെയും അപകടസാധ്യതകൾ സഹിക്കാനുള്ള ശേഷിയെയും ആശ്രയിച്ചിരിക്കും.