സ്വർണ വില വീണ്ടും കുതിച്ചു: ചെന്നൈയിൽ ഇന്ന് ഒരു പവന് വില ഇത്ര.. വെള്ളി വിലയും ഉയർന്നു
തുടർച്ചയായ ഇടിവിന് പിന്നാലെ വീണ്ടും കുതിച്ച് സ്വർണം. തുടർച്ചയായ രണ്ടാം ദിവസമാണ് ചെന്നൈയിൽ സ്വർണ വില ഉയരുന്നത്. ആഗോള വിപണിയിൽ സ്വർണ വില ഉയർന്നതാണ് ചെന്നൈയിലും ഇന്ന് വില ഉയരാൻ കാരണമായത്. യുഎസ്–ഇറാൻ സംഘർഷം അവസാനിക്കുമെന്ന പ്രതീക്ഷകളും സമാധാന ചർച്ചകളുമായി ബന്ധപ്പെട്ട അനുകൂല സൂചനകളുമാണ് ഇന്ന് സ്വർണത്തിന് കരുത്തായത്.
ചെന്നൈ വിപണിയിൽ ഇന്ന് ഒരു പവൻ സ്വർണ്ണത്തിന് 480 രൂപയുടെ വർദ്ധനവാണ് രേഖപ്പെടുത്തിയത്. ഇതോടെ ഒരു പവൻ സ്വർണ്ണത്തിന്റെ വില 1,10,880 രൂപയായി ഉയർന്നു. ഗ്രാമിന് 60 രൂപ കൂടി 13,860 രൂപയിലാണ് വ്യാപാരം നടക്കുന്നത്. വെള്ളി വിലയും ഗ്രാമിന് 5 രൂപ ഉയർന്ന് 270 രൂപയിലെത്തി.
കഴിഞ്ഞ ദിവസങ്ങളിൽ തുടർച്ചയായി ഇടിഞ്ഞിരുന്ന സ്വർണ്ണവിലയിൽ ഉണ്ടായ ഈ പെട്ടെന്നുള്ള തിരിച്ചുകയറ്റം വിപണിയെ വീണ്ടും ചൂടുപിടിപ്പിച്ചിരിക്കുകയാണ്. അടുത്തിടെ ഒരു പവൻ വില 1,08,000 രൂപ വരെ താഴ്ന്നിരുന്നെങ്കിലും ഇപ്പോൾ വീണ്ടും 1,10,000 രൂപയ്ക്ക് മുകളിലേക്ക് എത്തി.
ആഗോള വിപണിയിൽ ക്രൂഡോയിൽ വില കുത്തനെ ഇടിഞ്ഞതും ഡോളർ സൂചിക തളർന്നതും സ്വർണവില ഉയരാൻ വഴിയൊരുക്കി. യുഎസ്–ഇറാൻ സമാധാന ചർച്ചകളെ തുടർന്ന് ക്രൂഡോയിൽ ബാരലിന് 84–88 ഡോളർ നിരക്കിലേക്ക് താഴ്ന്നു. ഇതോടെ പണപ്പെരുപ്പം ഉയരുമെന്ന ആശങ്കകളും പലിശഭാരം കൂടുമെന്ന ഭീതിയും താൽക്കാലികമായി ശമിച്ചതോടെ നിക്ഷേപകർ വീണ്ടും സ്വർണത്തിലേക്ക് തിരിഞ്ഞു.
തുടർന്ന് രാജ്യാന്തര വിപണിയിൽ സ്വർണം ഇന്ന് വലിയ കുതിപ്പാണ് നടത്തിയത്.ഔൺസിന് 4,210.9 ഡോളർ നിലവാരത്തിലേക്ക് വില എത്തി. ഏകദേശം 112.88 ഡോളറിന്റെ വർദ്ധനവാണ് രേഖപ്പെടുത്തിയത്.നിലവിലെ ആഗോള സാഹചര്യങ്ങൾ നോക്കുമ്പോൾ വിപണിയിൽ വലിയ ചാഞ്ചാട്ടം തുടരുമെന്നാണ് വിദഗ്ധരുടെ പൊതുവായ വിലയിരുത്തൽ. യുഎസ്–ഇറാൻ സംഘർഷവുമായി ബന്ധപ്പെട്ട അനിശ്ചിതത്വങ്ങൾ, സമാധാന ചർച്ചകളുടെ പുരോഗതി, ഡോളർ സൂചികയിലെ മാറ്റങ്ങൾ, ക്രൂഡോയിൽ വിലയിലെ ചാഞ്ചാട്ടങ്ങൾ എന്നിവയെല്ലാം സ്വർണവിലയെ നേരിട്ട് സ്വാധീനിക്കുന്ന ഘടകങ്ങളാണ്.
ഇപ്പോൾ സംഘർഷം ശമിക്കുമെന്ന പ്രതീക്ഷ ശക്തമായതിനാൽ ക്രൂഡോയിൽ വില താഴ്ന്നതും ഡോളർ തളർന്നതും സ്വർണത്തിന് താൽക്കാലികമായി പിന്തുണ നൽകിയിട്ടുണ്ട്. അതുകൊണ്ടുതന്നെ അടുത്ത ദിവസങ്ങളിൽ സ്വർണവില വീണ്ടും ഉയരാനുള്ള സാധ്യതയും അതേസമയം ലാഭമെടുപ്പ് (profit booking) മൂലം ചെറിയ ഇടിവുകൾ സംഭവിക്കാനുള്ള സാധ്യതയും ഒരുപോലെ നിലനിൽക്കുന്നുണ്ട്. അതായത് വിപണി ഒരു ദിശയിൽ സ്ഥിരത കാണിക്കാതെ കയറ്റിറക്കങ്ങൾ ആവർത്തിക്കുന്ന അവസ്ഥയിലായിരിക്കും. അതേസമയം ദീർഘകാലാടിസ്ഥാനത്തിൽ ആഗോള സാമ്പത്തിക അനിശ്ചിതത്വം തുടരുന്നിടത്തോളം സ്വർണം സുരക്ഷിത നിക്ഷേപമെന്ന നിലയിൽ ശക്തമായ പിന്തുണ നിലനിർത്താൻ സാധ്യതയുണ്ട്. ഈ വർഷം അവസാനത്തോടെ സ്വർണം ഔണ്സിന് 6000 ഡോളർ വരെ ആകാനുള്ള സാധ്യത ഉണ്ടെന്നാണ് ജെപി മോർഗൻ പോലുള്ള സാമ്പത്തിക സ്ഥാപനങ്ങൾ പ്രവചിക്കുന്നത്.
Click it and Unblock the Notifications
Sign in with Google