ചെന്നൈയിൽ ഇന്ന് സ്വർണ വില ഇടിഞ്ഞു, ആഭരണം വാങ്ങാൻ ഒരുങ്ങുന്നവർക്ക് ആശ്വാസം..നിരക്ക് അറിയാം

ചെന്നൈ: ചെന്നൈയിൽ ഇന്ന് സ്വർണവിലയിൽ ഇടിവ് രേഖപ്പെടുത്തി. 10 ഗ്രാം 24 കാരറ്റ് സ്വർണത്തിന് 2,420 രൂപയുടെ കുറവാണ് ഉണ്ടായത്. ഇതോടെ 10 ഗ്രാം 24 കാരറ്റ് സ്വർണത്തിന്റെ വില 1,57,180 രൂപയായി. കഴിഞ്ഞ ദിവസം 1,59,600 രൂപയായിരുന്നു വില. 10 ഗ്രാം 22 കാരറ്റ് സ്വർണത്തിന്റെ വില 1,46,300 രൂപയാണ്. പവൻ സ്വർണത്തിന് 1,17,040 രൂപയാണ് നിലവിലെ നിരക്ക്.

മേയ് മാസത്തിന്റെ അവസാന ദിവസങ്ങളിൽ സ്വർണവിലയിൽ തുടർച്ചയായ മാറ്റങ്ങളാണ് രേഖപ്പെടുത്തിയത്. 31-ന് 10 ഗ്രാം 24 കാരറ്റ് സ്വർണവില 1,59,600 രൂപയായിരുന്നു. 30-ന് 1,57,800 രൂപയും 29-ന് 1,58,170 രൂപയും 28-ന് 1,59,810 രൂപയും രേഖപ്പെടുത്തിയിരുന്നു. 27-ന് 1,60,680 രൂപയും 26-ന് 1,61,250 രൂപയുമായിരുന്നു വില. 25-ന് 1,60,680 രൂപയും 24-ന് 1,60,690 രൂപയും 23-ന് 1,61,230 രൂപയും 22-ന് 1,61,680 രൂപയുമായിരുന്നു.

മേയ് മാസത്തിൽ 24 കാരറ്റ് സ്വർണത്തിന്റെ ഏറ്റവും ഉയർന്ന വില 15-നാണ് രേഖപ്പെടുത്തിയത്. അന്ന് 10 ഗ്രാമിന് 1,64,190 രൂപയായിരുന്നു വില. ഏറ്റവും കുറഞ്ഞ വില 6-ന് രേഖപ്പെടുത്തിയ 1,50,760 രൂപയാണ്.

അന്താരാഷ്ട്ര വിപണിയിലെ സംഭവവികാസങ്ങളാണ് സ്വർണവിലയെ സ്വാധീനിച്ചിരിക്കുന്നത്. അമേരിക്ക-ഇറാൻ ആണവ ചർച്ചകളുമായി ബന്ധപ്പെട്ട് അമേരിക്കൻ പ്രസിഡന്റ് ഡൊണാൾഡ് ട്രംപ് നടത്തിയ പ്രസ്താവനകൾക്ക് പിന്നാലെ ആഗോള വിപണികളിൽ അനിശ്ചിതത്വം വർധിച്ചു. ഇറാനുമായി സമാധാന കരാർ ഉടൻ അന്തിമമാക്കാൻ അമേരിക്ക തിടുക്കം കാണിക്കില്ലെന്നും ഇറാൻ ആണവായുധം വികസിപ്പിക്കില്ലെന്ന ഉറപ്പ് ലഭിക്കേണ്ടതുണ്ടെന്നും ട്രംപ് വ്യക്തമാക്കിയിരുന്നു. ഇറാൻ ആവശ്യങ്ങൾ അംഗീകരിക്കാത്ത പക്ഷം സംഘർഷാവസ്ഥ വീണ്ടും ഉണ്ടാകാമെന്നും അദ്ദേഹം മുന്നറിയിപ്പ് നൽകിയിട്ടുണ്ട്.

ഇതിന് പിന്നാലെ ഹോർമുസ് കടലിടുക്കിലൂടെയുള്ള എണ്ണവിതരണത്തെക്കുറിച്ചുള്ള ആശങ്കകൾ ഉയർന്നു. ലോകത്തെ ക്രൂഡ് ഓയിൽ ഗതാഗതത്തിന്റെ ഏകദേശം അഞ്ചിലൊന്ന് ഈ കടലിടുക്കിലൂടെയാണ് നടക്കുന്നത്. വിതരണത്തിൽ തടസ്സമുണ്ടാകുമെന്ന ആശങ്കയെ തുടർന്ന് അന്താരാഷ്ട്ര വിപണിയിൽ ക്രൂഡ് ഓയിൽ വില ഉയർന്നു.

ക്രൂഡ് ഓയിൽ വില ഉയർന്നതോടെ യുഎസ് ഡോളറും ശക്തിപ്പെട്ടു. ഡോളറിന്റെ മൂല്യം ഉയരുമ്പോൾ മറ്റ് കറൻസികൾ ഉപയോഗിക്കുന്ന രാജ്യങ്ങളിലെ വാങ്ങുന്നവർക്ക് സ്വർണം കൂടുതൽ ചെലവേറിയതാകും. ഇതോടെ സ്വർണത്തിന് അന്താരാഷ്ട്ര വിപണിയിൽ വിൽപ്പന സമ്മർദം നേരിട്ടതായാണ് വിപണി വിദഗ്ധർ പറയുന്നത്.

അന്താരാഷ്ട്ര വിപണിയിൽ സ്പോട്ട് ഗോൾഡ് വില ഔൺസിന് 4,529 ഡോളറിനടുത്താണ്. മുൻ ദിവസത്തെ അപേക്ഷിച്ച് ഏകദേശം 0.7 ശതമാനം കുറവാണ് രേഖപ്പെടുത്തിയിരിക്കുന്നത്. അതേസമയം വെള്ളിവിലയിൽ വർധനയുണ്ട്.

കേരളത്തിലും സ്വർണവിലയിൽ ഇന്ന് കുറവ് രേഖപ്പെടുത്തി. ഗ്രാമിന് 75 രൂപയും പവന് 600 രൂപയുമാണ് കുറഞ്ഞത്. ഇതോടെ ഒരു ഗ്രാം സ്വർണത്തിന്റെ വില 14,320 രൂപയായപ്പോൾ ഒരു പവൻ സ്വർണത്തിന്റെ വില 1,14,560 രൂപയായി. കഴിഞ്ഞ ദിവസം പവന് 1,15,160 രൂപയായിരുന്നു നിരക്ക്.

വലിയ തോതിലുള്ള ഇടിവല്ലെങ്കിലും സ്വർണം വാങ്ങാൻ പദ്ധതിയിടുന്നവർക്ക് ഇത് നേരിയ ആശ്വാസമാണ് നൽകുന്നത്. അതേസമയം സംസ്ഥാനത്ത് വെള്ളിവിലയിൽ ഇന്ന് മാറ്റമില്ല. ഒരു ഗ്രാം വെള്ളിക്ക് 285 രൂപയും 10 ഗ്രാം വെള്ളിക്ക് 2,850 രൂപയുമാണ് നിലവിലെ വില. അന്താരാഷ്ട്ര വിപണിയിലെ സ്വർണവിലയിലെ ചലനങ്ങൾ, ഡോളറിന്റെ മൂല്യത്തിലുള്ള മാറ്റങ്ങൾ, ക്രൂഡ് ഓയിൽ വിലയിലെ വർധനവ്, പശ്ചിമേഷ്യയിലെ രാഷ്ട്രീയ സാഹചര്യങ്ങൾ എന്നിവയാണ് ആഭ്യന്തര വിപണിയിലെ വിലനിർണയത്തെ പ്രധാനമായും സ്വാധീനിക്കുന്ന ഘടകങ്ങളായി തുടരുന്നത്.