സ്വര്ണത്തെ ഇനി പിടിച്ചാല് കിട്ടില്ല.. ട്രംപും താരിഫും മാത്രമല്ല കാരണം, എല്ലാ വഴികളും വില കൂടുന്നതിലേക്ക്
ചരിത്രത്തിലാദ്യമായി സ്വര്ണ വില ഔണ്സിന് 3000 ഡോളര് കവിഞ്ഞിരിക്കുകയാണ്. ആഗോള സെന്ട്രല് ബാങ്കുകളുടെ ശക്തമായ സ്വര്ണം വാങ്ങലാണ് ഈ കുതിച്ചുചാട്ടത്തിന് കാരണമെന്നാണ് ബ്ലൂംബെര്ഗ് റിപ്പോര്ട്ടില് പറയുന്നത്. 2022-ല് റഷ്യ ഉക്രെയ്ന് അധിനിവേശത്തിനുശേഷം കരുതല് ശേഖരം വൈവിധ്യവത്കരിക്കുന്നതിനും യുഎസ് ഡോളറിനെ ആശ്രയിക്കുന്നത് കുറയ്ക്കുന്നതിനുമായി സെന്ട്രല് ബാങ്കുകള് സ്വര്ണത്തിലേക്ക് കൂടുതല് തിരിഞ്ഞിട്ടുണ്ട്.
സാമ്പത്തിക ആയുധമായി ഡോളറിന്റെ ഉപയോഗം ചൈന, ഇന്ത്യ, പോളണ്ട്, തുര്ക്കി തുടങ്ങിയ രാജ്യങ്ങളെ അവരുടെ സ്വര്ണ്ണ നിക്ഷേപം ശക്തിപ്പെടുത്താന് പ്രേരിപ്പിച്ചു. കഴിഞ്ഞ രണ്ട് വര്ഷത്തിനുള്ളില് സെന്ട്രല് ബാങ്ക് സ്വര്ണ്ണ വാങ്ങല് ഇരട്ടിയായി. ഇത് പ്രക്ഷുബ്ധമായ സമയങ്ങളില് വിശ്വസനീയമായ മൂല്യശേഖരം എന്ന നിലയില് മഞ്ഞ ലോഹത്തിന്റെ പദവി ശക്തിപ്പെടുത്തി. സ്വര്ണ വില കൂടാനുള്ള കാരണങ്ങള് എന്തൊക്കെയാണ് എന്ന് നോക്കാം.
സാമ്പത്തിക ദുര്ബലതയും പണപ്പെരുപ്പവും
തുടര്ച്ചയായ സാമ്പത്തിക അനിശ്ചിതത്വങ്ങളും ഉയര്ന്ന പണപ്പെരുപ്പ നിരക്കുകളും കാരണം സ്വര്ണത്തിന്റെ ആകര്ഷണം വര്ധിച്ചിട്ടുണ്ട്. പണപ്പെരുപ്പത്തിനും സാമ്പത്തിക മാന്ദ്യത്തിനും എതിരായ ഒരു സംരക്ഷണമായി സ്വര്ണം നിലകൊള്ളുന്നു. ആഗോള വിപണികള് ദുര്ബലമായ സാമ്പത്തിക സാഹചര്യങ്ങളുമായും വരാനിരിക്കുന്ന മാന്ദ്യത്തെക്കുറിച്ചുള്ള ഭയങ്ങളുമായും മല്ലിടുമ്പോള് നിക്ഷേപകര് സുരക്ഷിതത്വം തേടി സ്വര്ണത്തിലേക്ക് തിരിയുന്നു. ദുര്ബലമായ സാമ്പത്തിക വളര്ച്ച, ഭൗമരാഷ്ട്രീയ സംഘര്ഷങ്ങള്, വര്ധിച്ചുവരുന്ന ചെലവുകള് എന്നിവ സുരക്ഷിത താവളമെന്ന നിലയില് സ്വര്ണത്തിന്റെ സ്ഥാനം ശക്തിപ്പെടുത്തി.
യുഎസ് വ്യാപാര നയങ്ങളുടെ സ്വാധീനം
അമേരിക്കന് പ്രസിഡന്റ് ഡൊണാള്ഡ് ട്രംപ് ഭരണകൂടത്തിന്റെ ആക്രമണാത്മക വ്യാപാര നയങ്ങള് അനിശ്ചിതത്വത്തിന്റെ ആലയിലേക്ക് എണ്ണയൊഴിക്കുകയാണ് ചെയ്തത്. കാനഡ, മെക്സിക്കോ, യൂറോപ്യന് യൂണിയന്, ചൈന എന്നിവയുള്പ്പെടെ സഖ്യകക്ഷികള്ക്കും തന്ത്രപ്രധാന എതിരാളികള്ക്കും മേലുള്ള തീരുവ ചുമത്തല് ആഗോള വ്യാപാര സംഘര്ഷങ്ങള് വര്ധിപ്പിച്ചു.
പ്രവചനാതീതമായ വ്യാപാര അന്തരീക്ഷത്തില് നിന്നുള്ള സാധ്യമായ പ്രത്യാഘാതങ്ങളെക്കുറിച്ച് ജാഗ്രത പുലര്ത്തുന്ന നിക്ഷേപകര് സ്വാഭാവികമായും ഒരു സുരക്ഷാ മാര്ഗമായി സ്വര്ണത്തിലേക്ക് തിരിഞ്ഞു. ന്യൂയോര്ക്കിലെ കോമെക്സ് ഫ്യൂച്ചേഴ്സ് എക്സ്ചേഞ്ചിലേക്ക് 23 ദശലക്ഷം ഔണ്സിലധികം സ്വര്ണമാണ് എത്തിയത് എന്നത് ഈ ആശങ്ക അടിവരയിടുന്നു.
നിക്ഷേപക വികാരം
നിക്ഷേപക വികാരം ഒരു നിര്ണായക ഘടകമാണ്. സ്വര്ണത്തിന്മേല് ലഭിക്കുന്ന ഈ നേട്ടം നഷ്ടപ്പെടുത്താന് പലരും ആഗ്രഹിക്കുന്നില്ല. ഉയര്ന്ന അനിശ്ചിതത്വത്തിന്റെ സമയത്ത് സ്വര്ണ വില കുതിച്ചുയരുന്നതായാണ് മുന്കാല പ്രവണതകളും സൂചിപ്പിക്കുന്നത്.
Click it and Unblock the Notifications
Sign in with Google