'സ്വർണ്ണ വില 2 ലക്ഷം രൂപ': അഞ്ച് വർഷം കഴിഞ്ഞാല്‍ സംഭവിക്കാന്‍ പോകുന്നത്; കുത്തനെ കയറും

Updated: Wednesday, September 24, 2025, 8:07 [IST]

കഴിഞ്ഞ അഞ്ച് വർഷത്തെ സ്വർണവിലയുടെ ഗ്രാഫ് പരിശോധിക്കുമ്പോൾ, കോവിഡ്-19 മഹാമാരി, റഷ്യ-ഉക്രെയ്ൻ യുദ്ധം, അമേരിക്കയുടെ ആഗോള തീരുവ, ഭൗമരാഷ്ട്രീയ പ്രശ്നങ്ങൾ എന്നിവ സ്വർണവിലയില്‍ വലിയ തോതില്‍ സ്വാധീനം ചെലുത്തിയിട്ടുണ്ട്. ഇന്ത്യയിലെ ഓഹരി വിപണിയിലെ പ്രധാന സൂചികയായ നിഫ്റ്റി 50-ന്റെ കഴിഞ്ഞ ഒരു വർഷത്തെ വരുമാനം വളരെ കുറവാണ്. ഓഹരി വിപണി മികച്ച വരുമാനം നൽകാത്ത കാലഘട്ടങ്ങളിൽ നിക്ഷേപകർ സ്വർണത്തിലേക്ക് തിരിയുന്നു. ഇതും സ്വർണത്തിന്റെ ഡിമാൻഡും വിലയും വർധിപ്പിക്കുന്നു.

2025 സെപ്റ്റംബർ 21-ലെ വാല്യു റിസർച്ചിന്റെ കണക്കുകൾ പ്രകാരം, സ്വർണ ഇ ടി എഫുകള്‍ (Exchange Traded Funds) കഴിഞ്ഞ ഒരു വർഷത്തിനിടെ 47% വരെ വരുമാനം നൽകിയിട്ടുണ്ട്. സ്വർണ ഇ ടി എഫുകളിലെ നിക്ഷേപം വർധിക്കുന്നത് സ്വർണവില ഉയരാൻ ഒരു പ്രധാന ഘടകമാകുമെന്നാണ് വിദഗ്ധർ അഭിപ്രായപ്പെടുന്നത്. 2005-ൽ 10 ഗ്രാമിന് 7000 രൂപയായിരുന്ന സ്വർണവില 2010-ൽ 18500 രൂപയായും, 2015-ൽ 26300 രൂപയായും, 2025 സെപ്റ്റംബർ 18-ന് 110000 രൂപയായും മാറി. അതോടൊപ്പം തന്നെ 2024 ഓഗസ്റ്റിനെ അപേക്ഷിച്ച് 2025-ൽ സ്വർണ ഇ ടി എഫുകള്‍ 36 ശതമാനം വരെ കുതിപ്പുണ്ടാക്കി.

സ്വർണവിലയെ സ്വാധീനിക്കുന്ന ഘടകങ്ങൾ

ആഗോള ഇ ടി എഫുകളിലെ നിക്ഷേപം: യുഎസ്-ലെ സ്വർണ ETF-കൾ 215 ബില്യൺ ഡോളറിന്റെ ആസ്തി മാനേജ്മെന്റിന്റെ (AUM) റെക്കോർഡ് സൃഷ്ടിച്ചിട്ടുണ്ട്. ഇത് കൂടുതൽ നിക്ഷേപം ആകർഷിക്കാൻ സാധ്യതയുണ്ട്.

യുഎസ് ഫെഡറൽ റിസർവിന്റെ പലിശനിരക്ക്: ട്രിവേഷിന്റെ അഭിപ്രായത്തിൽ, ഫെഡ് പലിശനിരക്ക് കുറച്ചാൽ ഡോളർ ദുർബലമാകുകയും, അത് സ്വർണവില 15-20% വർധിക്കാൻ ഇടയാക്കുകയും ചെയ്യും.

കേന്ദ്ര ബാങ്കുകളുടെ സ്വർണ വാങ്ങൽ: ജിയോപൊളിറ്റിക്കൽ പിരിമുറുക്കങ്ങൾ, ഡോളറിന്റെ വില, പണപ്പെരുപ്പം, നിക്ഷേപ പോർട്ട്ഫോളിയോകളുടെ പരിണാമം എന്നിവ സ്വർണവിലയെ സ്വാധീനിക്കും.

ആഗോള സാമ്പത്തിക അനിശ്ചിതത്വം: അമേരിക്കൻ സമ്പദ്‌വ്യവസ്ഥ അടുത്ത 1-2 വർഷത്തിനുള്ളിൽ മന്ദഗതിയിലോ സ്റ്റാഗ്ഫ്ലേഷനിലോ (Stagflation) പ്രവേശിച്ചാൽ, സ്വർണത്തിന്റെ സുരക്ഷിത നിക്ഷേപ ആകർഷണം വർധിക്കും. ഇത് സ്വർണ്ണ വിലയെ വീണ്ടും ഉയർത്തും.

5 വർഷത്തിനുള്ളിൽ 2 ലക്ഷം രൂപയിലെത്തുമോ?

ആനന്ദ് രാഠി ഷെയർ ആൻഡ് സ്റ്റോക്ക് ബ്രോക്കേഴ്സിന്റെ എവിപി മനീഷ് ശർമ്മ വിലയിരുത്തൽ പ്രകാരം, 2026-ന്റെ മധ്യത്തോടെ ആഗോള വിപണിയിൽ സ്വർണവില ഔൺസിന് 4000 ഡോളർ കടക്കും, ഇത് ഇന്ത്യയിൽ 10 ഗ്രാമിന് 118000-120000 രൂപ എന്ന രീതിയില്‍ പ്രതിഫലിക്കും. 2-5 വർഷ കാലയളവിൽ, ആഗോള വില 5,000 ഡോളറിലെത്തിയാൽ, ഇന്ത്യയിൽ 1,50,000-1,70,000 രൂപ വരെ എത്താം. എന്നാൽ, 2 ലക്ഷം രൂപ എന്ന ലക്ഷ്യം നേടാൻ അധിക ഭൗമരാഷ്ട്രീയ പ്രതിസന്ധികളോ, ആഗോള ഡിമാൻഡിലെ വൻ വർധനയോ ആവശ്യമാണെന്നും അദ്ദേഹം പറയുന്നു.