പഴയ സ്വര്ണം മാറ്റി പുതിയത് വാങ്ങുമ്പോഴും നികുതി കൊടുക്കണോ? എക്സ്ചേഞ്ച് ചെയ്യുന്നവര് അറിയാന്
സ്വര്ണത്തിന് വില കൂടിയതോടെ പൊന്ന് വാങ്ങുന്ന രീതിയില് മാറ്റം വന്നിട്ടുണ്ട്. പുതിയ സ്വര്ണം വാങ്ങിക്കുമ്പോള് കാശ് കൊടുക്കുന്നതിന് പകരം പഴയ ആഭരണം കൊടുത്ത് എക്സ്ചേഞ്ച് ചെയ്യുന്ന രീതിയാണ് പലരും അവലംബിക്കുന്നത്. എന്നാല് പഴയ സ്വര്ണാഭരണങ്ങള് വാങ്ങിയ വിലയേക്കാള് ഉയര്ന്ന തുകയ്ക്ക് വില്ക്കുമ്പോള് 'ക്യാപിറ്റല് ഗെയിന്സ് ടാക്സ്' (മൂലധന നേട്ട നികുതി) ബാധ്യത ഉണ്ടായേക്കാം.
വില്പനയിലൂടെ ലഭിക്കുന്ന തുക ഉപയോഗിച്ച് പുതിയ സ്വര്ണാഭരണങ്ങള് വാങ്ങിയാല് നികുതി ബാധ്യത കുറയ്ക്കാനോ പൂര്ണമായും ഒഴിവാക്കാനോ കഴിയുമെന്ന് ചില നികുതിദായകര് കരുതിയേക്കാം. ആദായനികുതി വകുപ്പ് സ്വര്ണത്തെ ഒരു 'ക്യാപിറ്റല് അസറ്റ്' (മൂലധന ആസ്തി) ആയാണ് കണക്കാക്കുന്നത്. അതിനാല് അതിന്റെ വില്പനയിലൂടെ ലഭിക്കുന്ന ലാഭത്തിന് നികുതി ബാധകമാണ്.
വില്പനയിലൂടെ ലഭിക്കുന്ന ആകെ തുകയിലല്ല, മറിച്ച് അതില് നിന്നുണ്ടാകുന്ന ലാഭത്തിന്മേല് മാത്രമാണ് നികുതി കണക്കാക്കുന്നത്. ആദായനികുതി നിയമത്തിലെ സെക്ഷന് 2(14) പ്രകാരം, ആഭരണങ്ങളെ 'വ്യക്തിഗത ഉപയോഗത്തിനുള്ള വസ്തുക്കള്' എന്ന നിര്വചനത്തില് നിന്ന് ഒഴിവാക്കിയിരിക്കുന്നു. സ്വര്ണം, വെള്ളി, പ്ലാറ്റിനം അല്ലെങ്കില് മറ്റ് വിലപിടിപ്പുള്ള ലോഹങ്ങള് എന്നിവയില് നിര്മ്മിച്ച ആഭരണങ്ങളെ നിയമം ഇതില് പ്രത്യേകം ഉള്പ്പെടുത്തിയിട്ടുണ്ട്.
ലളിതമായി പറഞ്ഞാല്, വസ്ത്രങ്ങള്, ഫര്ണിച്ചറുകള് തുടങ്ങിയ മറ്റ് ചില ചലനസ്വത്തുക്കളില് നിന്ന് വ്യത്യസ്തമായി, വ്യക്തിഗത ആവശ്യങ്ങള്ക്കായി സൂക്ഷിച്ചിരുന്ന ആഭരണങ്ങള് വില്ക്കുമ്പോള് ലഭിക്കുന്ന ലാഭത്തിനും നികുതി ബാധകമാകുമെന്ന് നിയമം വ്യക്തമാക്കുന്നു. പഴയ സ്വര്ണാഭരണങ്ങള് വിറ്റ് ലഭിക്കുന്ന മൂലധന നേട്ടം പുതിയ ആഭരണങ്ങള് വാങ്ങുന്നതുകൊണ്ട് മാത്രം നികുതിരഹിതമാകുന്നില്ല.
കാരണം, നികുതി സംബന്ധമായ കാര്യങ്ങളില് പഴയ ആഭരണങ്ങളുടെ വില്പനയോ കൈമാറ്റമോ പുതിയവയുടെ വാങ്ങലോ വെവ്വേറെ ഇടപാടുകളായാണ് കണക്കാക്കുന്നത്. ആഭരണങ്ങള് പാരമ്പര്യമായി ലഭിച്ചതോ സമ്മാനമായി കിട്ടിയതോ ആണെങ്കില്, ആദായനികുതി നിയമങ്ങള് പ്രകാരം മൂലധന നേട്ടം കണക്കാക്കുമ്പോള് മുന് ഉടമയുടെ വാങ്ങല് വിലയും കൈവശം വെച്ചിരുന്ന കാലയളവും പരിഗണിച്ചേക്കാം.
ഉദാഹരണത്തിന്, നിങ്ങള് 2 ലക്ഷം രൂപയ്ക്ക് ഒരു സ്വര്ണാഭരണം വാങ്ങുകയും പിന്നീട് അത് 4 ലക്ഷം രൂപ മൂല്യമുള്ള പുതിയ ആഭരണത്തിന് പകരം മാറ്റിയെടുക്കുകയും ചെയ്താല്, അതില് നിന്നുണ്ടാകുന്ന 2 ലക്ഷം രൂപയുടെ നേട്ടത്തിന് നികുതി ബാധകമായേക്കാം. സ്വര്ണാഭരണങ്ങളില് നിന്നുള്ള ലാഭത്തിന് നികുതി ചുമത്തുന്ന നിരക്ക്, നിങ്ങള് അവ എത്ര കാലം കൈവശം വെച്ചു എന്നതിനെ ആശ്രയിച്ചിരിക്കും.
24 മാസത്തിന് ശേഷമാണ് വില്പന നടത്തുന്നതെങ്കില്, അതില് നിന്നുള്ള ലാഭം 'ദീര്ഘകാല മൂലധന നേട്ടം' ആയി കണക്കാക്കുകയും, വാങ്ങല് വിലയില് 'കോസ്റ്റ് ഇന്ഫ്ലേഷന് ഇന്ഡക്സ്' ബാധകമാക്കാതെ 12.50% എന്ന സ്ഥിര നിരക്കില് നികുതി ഈടാക്കുകയും ചെയ്യുന്നു. 24 മാസത്തിനുള്ളിലാണ് വില്പന നടത്തുന്നതെങ്കില്, ലാഭം 'ഹ്രസ്വകാല മൂലധന നേട്ടം' ആയി കണക്കാക്കുകയും, നിങ്ങള്ക്ക് ബാധകമായ സ്ലാബ് നിരക്കില് നികുതി ചുമത്തുകയും ചെയ്യുന്നു.
വിവാഹവേളയിലോ നിശ്ചിത ബന്ധുക്കളില് നിന്നോ ലഭിക്കുന്ന ആഭരണങ്ങള് അവ ലഭിക്കുന്ന സമയത്ത് പൂര്ണമായും നികുതിരഹിതമാണ്. അനന്തരാവകാശമായി ലഭിക്കുന്ന ആസ്തികളുടെ കാര്യത്തിലും ഇതേ നിയമം തന്നെയാണ് ബാധകമാകുക. എന്നാല്, സുഹൃത്തുക്കള് പോലുള്ള മറ്റുള്ളവരില് നിന്ന് ലഭിക്കുന്ന സമ്മാനങ്ങളുടെ കാര്യത്തില് നികുതിദായകര് ഒരു കാര്യം പ്രത്യേകം ശ്രദ്ധിക്കേണ്ടതുണ്ട്.
ഒരു സാമ്പത്തിക വര്ഷത്തില് നിങ്ങള്ക്ക് ലഭിക്കുന്ന എല്ലാത്തരം സമ്മാനങ്ങളുടെയും ആകെ മൂല്യം 50,000 രൂപയില് കൂടാത്ത പക്ഷം മാത്രമേ അവയ്ക്ക് നികുതിയിളവ് ലഭിക്കുകയുള്ളൂ. സ്വര്ണം വില്ക്കുന്നതിലൂടെ ദീര്ഘകാല മൂലധന നേട്ടം ഉണ്ടായാല്, ആദായനികുതി നിയമത്തിലെ സെക്ഷന് 54എ പ്രകാരം നിങ്ങള്ക്ക് നികുതിയിളവ് നേടാം. ഇതിനായി, വില്പനയിലൂടെ ലഭിച്ച തുക ഉപയോഗിച്ച് നിശ്ചിത കാലയളവിനുള്ളില് ഒരു വീട് വാങ്ങുകയോ നിര്മ്മിക്കുകയോ ചെയ്യേണ്ടതുണ്ട്.
വില്പനയിലൂടെ ലഭിച്ച മുഴുവന് തുകയും ഇതിനായി നിക്ഷേപിക്കുന്നില്ലെങ്കില്, അതിനനുസൃതമായി നികുതിയിളവിന്റെ അളവും കുറയുന്നതാണ്. സ്വര്ണം വില്ക്കുന്ന തീയതിയില് നിങ്ങള്ക്ക് ഒന്നിലധികം വീടുകള് സ്വന്തമായി ഇല്ലാത്ത സാഹചര്യത്തില് മാത്രമേ ഈ നികുതിയിളവ് ലഭിക്കുകയുള്ളൂ.
Click it and Unblock the Notifications
Sign in with Google