പെട്രോളിന്റേയും ഡീസലിന്റേയും എക്സൈസ് തീരുവ കേന്ദ്രസര്ക്കാര് വര്ധിപ്പിച്ചു
ദില്ലി: പെട്രോളിന്റേയും ഡീസലിന്റേയും വിലയില് എണ്ണക്കമ്പനികള് നേരിയ കുറവ് വരുത്തിയതിന് പിന്നാലെ കേന്ദ്ര സര്ക്കാര് എക്സൈസ് തീരുവ വര്ധിപ്പിച്ചു. പെട്രോളിന് ലിറ്ററിന് 30 പൈസയും ഡീസലിന് ലിറ്ററിന് 1.17 രൂപയുമാണ് തീരുവ വര്ധിപ്പിച്ചത്.
ഇതിലൂടെ സര്ക്കാരിന് 2,500 കോടി രൂപയാണ് അധിക വരുമാനം ലഭിക്കുന്നത്. വികസനത്തിന് പണം കണ്ടെത്തുന്നതിന് വേണ്ടിയാണ് എക്സൈസ് തീരുവ വര്ദ്ധിപ്പിക്കുന്നതെന്നാണ് ധനകാര്യമന്ത്രി അരുണ് ജയ്റ്റ്ലിയുടെ വാദം.
അസംസ്കൃത എണ്ണവില കൂപ്പുകുത്തിയതിനെ തുടര്ന്ന് കഴിഞ്ഞ ദിവസമാണ് പെട്രോളിന് 50 പൈസയും ഡീസലിന് 46 പൈസയും എണ്ണക്കമ്പനികള് കുറച്ചത്. അന്താരാഷ്ട്ര വിപണിയില് ക്രൂഡ് ഓയില് വില ബാരലിന് 34.39 ആയി കുറഞ്ഞിരുന്നു. 11 വര്ഷത്തിനിടെ ആദ്യമായാണ് ക്രൂഡ് ഓയില് വില ഇത്രയും താഴുന്നത്.
ഡോളറുമായുള്ള വിനിമയ നിരക്കില് രൂപയുടെ മൂല്യം കുറഞ്ഞിരിക്കുന്നതാണ് ഇന്ത്യയില് നേരിയ തോതില് മാത്രം പെട്രോള് വിലകുറയാന് കാരണമെന്നാണ് എണ്ണ കമ്പനികളുടെ വാദം.
ആറ് അഴ്ചയ്ക്കിടെ രണ്ടാം തവണയാണ് സര്ക്കാര് എക്സൈസ് തീരുവ വര്ധിപ്പിക്കുന്നത്.