ജിഎസ്ടി നഷ്ടപരിഹാരം: 16 സംസ്ഥാനങ്ങള്‍ക്കും 2 കേന്ദ്രഭരണപ്രദേശങ്ങള്‍ക്കും 6000 കോടി കൈമാറി

ദില്ലി: ജിഎസ്ടി നഷ്ടപരിഹാരത്തിന്റെ ആദ്യഘട്ടമായി കേന്ദ്രം 6,000 കോടി രൂപ വായ്പയെടുത്ത് 16 സംസ്ഥാനങ്ങളിലേക്കും രണ്ട് കേന്ദ്രഭരണ പ്രദേശങ്ങളിലേക്കും കൈമാറി. മഹാരാഷ്ട്ര, ഗുജറാത്ത്, ബീഹാര്‍, അസം, ദില്ലി, ജമ്മു കശ്മീര്‍, ആന്ധ്രാപ്രദേശ്, ഗോവ, ഹരിയാന, ഹിമാചല്‍ പ്രദേശ്, കര്‍ണടക, മധ്യപ്രദേശ്, മേഘാലയ, ഒഡീഷ, തമിഴ്‌നാട്, ത്രിപുര, ഉത്തര്‍പ്രദേശ്, ഉത്തരാഖണ്ഡ് എന്നി സംസ്ഥാനങ്ങളിലാണ് പണം കൈമാറിയതെന്ന് ധനമന്ത്രാലയം അറിയിച്ചു. ജിഎസ്ടി നഷ്ടപരിഹാര തുക വായ്പയെടുത്ത് എത്രയും പെട്ടെന്ന് നല്‍കാന്‍ പ്രതിപക്ഷം ഭരിക്കുന്ന സംസ്ഥാനങ്ങള്‍ ആവശ്യപ്പെട്ടിരുന്നു.

സംസ്ഥാനങ്ങള്‍ക്ക് തുക നല്‍കുന്നതിനായി കേന്ദ്രം 1.10 ലക്ഷം രൂപയാണ് വായ്പയെടുത്തിരിക്കുന്നത്. കേന്ദ്രത്തിന്റെ ധനക്കമ്മിയെ ബാധിക്കാത്ത രീതിയിലാണ് വായ്പ എടുക്കുന്നതെന്ന് ധനമന്ത്രാലയം നേരത്തെ വ്യക്തമാക്കിയിരുന്നു. 5.19 ശതമാനം പലിശ നിരിക്കിലാണ് കേന്ദ്രം ഇപ്പോള്‍ വായ്പ എടുത്തിരിക്കുന്നത്. മൂന്ന് മുതല്‍ അഞ്ച് വര്‍ഷ കാലാവധിയിലാണ് വായ്പയെടുക്കുന്നത്.

അതേസമയം, ജിഎസ്ടി നഷ്ടപരിഹാരം നികത്തുന്നതിന് വായ്പയെടുക്കാന്‍ 21 സംസ്ഥാനങ്ങളും രണ്ട് കേന്ദ്രഭരണ പ്രദേശങ്ങളും വ്യക്തമാക്കിയിരുന്നു. കേരളം, പുതുച്ചേരി ഉള്‍പ്പടെയുള്ള സംസ്ഥാനങ്ങളാണ് കേന്ദ്രം വായ്പയെടുക്കണമെന്ന കാര്യത്തില്‍ ഉറച്ചുനിന്നത്. 2020-2021 കാലയളവിലെ ജിഎസ്ടി നഷ്ടപരിഹാര വിതരണത്തിലെ കുറവ് പരിഹരിക്കുന്നതിനാണ് സര്‍ക്കാര്‍ ഇപ്പോള്‍ പ്രത്യേക വായ്പ ജാലകം ആവിഷ്‌കരിച്ചത്.

English summary

GST compensation: central government transfers Rs 6,000 crore to 16 states and 2 Union Territories