ഞങ്ങളെ ആളാ.. നോക്കണേ..; തന്നെക്കുറിച്ച് മോദി ധോണിയോട് പറഞ്ഞത് വെളിപ്പെടുത്തി ജഡേജ

Updated: Tuesday, November 22, 2022, 12:47 [IST]

ജാംനഗര്‍: ഗുജറാത്ത് നിയമസഭാ തെരഞ്ഞെടുപ്പില്‍ ജാംനഗറര്‍ നോര്‍ത്തില്‍ ബി ജെ പി സ്ഥാനാര്‍ത്ഥിയായി റിവാബ ജഡേജയെ പ്രഖ്യാപിച്ചത് മുതല്‍ പ്രചരണത്തിനായി ക്രിക്കറ്റ് താരവും ഭര്‍ത്താവുമായ രവീന്ദ്ര ജഡേജ എത്തുമോ എന്നാണ് ആരാധകര്‍ ഉറ്റുനോക്കുന്നത്. കഴിഞ്ഞ ദിവസം കാത്തിരിപ്പിന് വിരാമമിട്ട് കൊണ്ട് രവീന്ദ്ര ജഡേജ റിവാബയ്ക്ക് വേണ്ടി വോട്ട് തേടിയെത്തിയിരുന്നു.

ജംനഗര്‍ വിമാനത്താവളത്തില്‍ നേരിട്ടെത്തി കേന്ദ്ര ആഭ്യന്തര മന്ത്രി അമിത് ഷാ ഇരുവരേയും നേരില്‍ കണ്ടിരുന്നു. റിവാബയെ സ്ഥാനാര്‍ത്ഥിയാക്കിയതില്‍ പ്രധാനമന്ത്രി നരേന്ദ്രമോദിക്കും അമിത് ഷായ്ക്കും രവീന്ദ്ര ജഡേജ നേരത്തേ തന്നെ നന്ദി അറിയിച്ചിരുന്നു. ഇപ്പോഴിതാ നരേന്ദ്ര മോദിയെ കുറിച്ച് രവീന്ദ്ര ജഡേജ നടത്തിയ പരാമര്‍ശമാണ് ചര്‍ച്ചയാകുന്നത്.

2010 ല്‍ അഹമ്മദാബാദില്‍ നടന്ന ഒരു മത്സരത്തിനിടെ അന്നത്തെ ഇന്ത്യന്‍ ക്യാപ്റ്റന്‍ എം എസ് ധോണിക്ക് ടീമംഗങ്ങളെ പരിചയപ്പെടുത്തുന്നതിനിടെ തന്നെ പരിചയപ്പെടുത്തിയപ്പോഴത്തെ നരേന്ദ്ര മോദിയുടെ പ്രതികരണത്തെ കുറിച്ചാണ് രവീന്ദ്ര ജഡേജ പറയുന്നത്. അന്ന് ഗുജറാത്ത് മുഖ്യമന്ത്രിയായിരുന്നു നരേന്ദ്രമോദി. രവീന്ദ്ര ജഡേജയുടെ വാക്കുകള്‍ ഇപ്രകാരമാണ്. 2010 ല്‍ അഹമ്മദാബാദില്‍ വച്ചാണ് ഞാന്‍ നരേന്ദ്ര മോദിയെ ആദ്യമായി കാണുന്നത്.

അന്ന് അദ്ദേഹം ഗുജറാത്ത് മുഖ്യമന്ത്രിയായിരുന്നു. ഞങ്ങള്‍ക്ക് ദക്ഷിണാഫ്രിക്കയ്ക്കെതിരെ മൊട്ടേര സ്റ്റേഡിയത്തില്‍ ഒരു മത്സരം ഉണ്ടായിരുന്നു. അന്ന് ഞങ്ങളുടെ ക്യാപ്റ്റനായിരുന്ന മഹി ഭായ് (ധോണി) എന്നെ അദ്ദേഹത്തിന് പരിചയപ്പെടുത്തി. അതിന് മറുപടിയായി മോദി, ധോണിയോട് പറഞ്ഞത് ഇപ്രകാരമായിരുന്നു. 'അവന്‍ ഞങ്ങളുടെ കുട്ടിയാണ്, അവനെ നന്നായി നോക്കണം' എന്നായിരുന്നു അത്. ചിരിച്ചു കൊണ്ടായിരുന്നു മോദി ഇക്കാര്യം പറഞ്ഞത് എന്നും രവീന്ദ്ര ജഡേജ അനുസ്മരിച്ചു.

ഇത്രയും വലിയ ആള്‍ എന്നെ ഞങ്ങളുടെ ആളാണ് എന്ന് പറഞ്ഞത് കേട്ടപ്പോള്‍ സന്തോഷം തോന്നി എന്നും രവീന്ദ്ര ജഡേജ കൂട്ടിച്ചേര്‍ത്തു. അണ്ടര്‍ 19 ലോകകപ്പ് വിജയത്തിന് ഒരു വര്‍ഷത്തിന് ശേഷം 2009-ലാണ് ജഡേജ തന്റെ ഇന്ത്യന്‍ അരങ്ങേറ്റം കുറിക്കുന്നത്. പിന്നീട് ഇന്ത്യയുടെ മൂന്ന് ഫോര്‍മാറ്റിലും അവിഭാജ്യമായ ഔള്‍റൗണ്ടറാകാന്‍ രവീന്ദ്ര ജഡേജയ്ക്കായി. അതേസമയം ധര്‍മ്മേന്ദ്ര എം ജഡേജയെ മാറ്റിയാണ് ജംനഗറില്‍ റിവാബ ജഡേജയെ ബി ജെ പി പരിഗണിച്ചത്.

2020 ലാണ് റിവാബ ജഡേജ ബി ജെ പിയില്‍ അംഗത്വമെടുത്തത്. 2016 ലായിരുന്നു റിവാബയുടേയും രവീന്ദ്ര ജഡേജയുടേയും വിവാഹം. മെക്കാനിക്കല്‍ എഞ്ചിനീയറിങിലെ ബിരുദധാരിയായ റിവാബ കോണ്‍ഗ്രസിലെ മുതിര്‍ന്ന നേതാവ് ഹരി സിംഗ് സോളങ്കിയുടെ ബന്ധുവുമാണ്. ബി ജെ പിയില്‍ അംഗത്വമെടുക്കുന്നതിന് മുമ്പ് വലതുപക്ഷ സംഘടനയായ കര്‍ണിസേനയുടെ വനിത വിഭാഗം മേധാവിയായിരുന്നു.