ഐസിസ് ആക്രമണ പദ്ധതി പരാജയപ്പെടുത്തി; പോലീസ് പിടിയിലായത് സഹോദരങ്ങള്!!
ഛോട്ടില മന്ദിറില് സ്ഫോടനം നടത്താന് പദ്ധതിയിട്ടിരുന്നുവെന്നും സൂചനകളുണ്ട്
രാജ്കോട്ട്: ഗുജറാത്തില് ഭീകരാക്രമണം നടത്താന് പദ്ധിതിയിട്ട രണ്ട് ഐസിസ് ഭീകരര് ഭീകരവിരുദ്ധ സേന അറസ്റ്റ് ചെയ്തു. ഗുജറാത്തിലെ രാജ്കോട്ട്, ഭാവ്നഗര് എന്നിവിടങ്ങളില് നിന്നാണ് വസീം, നയീം എന്നീ സഹോദരന്മാര് അറസ്റ്റിലാവുന്നത്. രാജ്കോട്ടിലെ ഛോട്ടില ചാമുണ്ട ജി മാതാ ക്ഷേത്രം സ്ഥിതി ചെയ്യുന്ന ഛോട്ടില മന്ദിറില് സ്ഫോടനം നടത്താന് പദ്ധതിയിട്ടിരുന്നുവെന്നും സൂചനകളുണ്ട്.
ഐസിസ് സ്ഥാപകന് അബൂബക്കര് ബാഗ്ദാദിയുടെ പ്രസംഗങ്ങളും ഓണ്ലൈന് വീഡിയോകളും കണ്ട് ഭീകരവാദത്തിലേയ്ക്ക് ആകൃഷ്ടരായതാണെന്നും നേരിട്ട് ജിഹാദി സംഘടനയോട് ബന്ധമില്ലെന്നുമാണ് അറസ്റ്റിലായ യുവാക്കള് ഭീകരവിരുദ്ധ സേനയോട് വെളിപ്പെടുത്തിയിട്ടുള്ളത്.
ഐസിസില് ആകൃഷ്ടരായി ഇന്ത്യയില് ഭീകരാക്രമണം നടത്താന് പദ്ധതിട്ട കേസില് 67 ഇന്ത്യന് യുവാക്കളാണ് ഇതുവരെ അറസ്റ്റിലായതെന്ന് കേന്ദ്ര ആഭ്യന്തര മന്ത്രി രാജ് നാഥ് സിംഗ് വ്യക്തമാക്കി. എന്നാല് കേന്ദ്ര- സംസ്ഥാന ഇന്റലിജന്സ് ഏജന്സികളുടെ സഹകരണം മൂലം പദ്ധതിയിട്ട ആക്രമണങ്ങള് വിജയകരമായി നടപ്പിലാക്കാന് യുവാക്കള്ക്ക് കഴിഞ്ഞില്ലെന്നും രാജ്നാഥ് സിംഗ് ചൂണ്ടിക്കാണിക്കുന്നു.