ഗുജറാത്ത് തദ്ദേശ തിരഞ്ഞെടുപ്പ്: വൻ മുന്നേറ്റവുമായി ബിജെപി.. കിതച്ച് കോൺഗ്രസ്

അഹമ്മദാബാദ്; ഗുജറാത്ത് തദ്ദേശ തിരഞ്ഞെടുപ്പിൽ വൻ മുന്നേറ്റവുമായി ബിജെപി. ആദ്യ ഫല സൂചനകൾ പുറത്തുവരുമ്പോൾ കോൺഗ്രസിനെ ബഹുദൂരം പിന്നിലാക്കി കൊണ്ടാണ് ബിജെപിയുടെ കുതിപ്പ്. 81 മുനിസിപ്പാലിറ്റികളിൽ 54 ഇടത്തും ബിജെപപിയാണ് മുന്നേറുന്നത്. വെറും രണ്ട് ഇടത്ത് മാത്രമാണ് കോൺഗ്രസ് ലീഡ് ചെയ്യുന്നത്. ആം ആദ്മി പാർട്ടി ഒരിടത്തും മുന്നിലാണ്.

ജില്ലാ പഞ്ചായത്തുകളിൽ 12 ഇടത്ത് ബിജെപി മുന്നിലാണ്. 231 താലൂക്ക് പഞ്ചായത്തുകളിൽ 51 ഇടത്ത് ബിജെപി ലീഡ് ചെയ്യുമ്പോൾ കോൺഗ്രസ് ഏഴടത്താണ് ലീഡ് ചെയ്യുന്നത്. 81 നഗരസഭകളിലേക്കും, 31 ജില്ലാ പഞ്ചായത്തുകളിലേക്കും 231 താലൂക്ക് പഞ്ചായത്തുകളിലേക്കുമായി 8235 സീറ്റുകളിലാണ് തെരഞ്ഞെടുപ്പ് നടന്നത്.ഫെബ്രുവരി 28നു നടന്ന തെരഞ്ഞെടുപ്പിൽ 60.26 ശതമാനം പേരാണ് വോട്ടുരേഖപ്പെടുത്തിയത്.

ബിജെപിയെയും കോൺഗ്രസിനെയും കൂടാതെ ആം ആദ്‌മി പാർടിയും അസറുദ്ദീൻ ഒവൈസിയുടെ എഐഎംഐഎമ്മും ഇത്തവണ മത്സര രംഗത്തുണ്ട്‌.നേരത്തേ കോർപറേഷനിലേക്ക് നടതന്ന തിരഞ്ഞെടുപ്പിൽ അട്ടിമറി മുന്നേറ്റമായിരുന്നു ബിജെപി നേടിയത്. ആകെയുള്ള 576 സീറ്റുകളില്‍ ബിജെപിക്ക് 474 ഉം നേടാൻ ബിജെപിക്ക് കഴിഞ്ഞു. 51 ഇടത്താണ് കോൺഗ്രസ് ജയിച്ചത്. സൂറത്തിൽ ആം ആദ്മിക്ക് വിജയിക്കാൻ സാധിച്ചിരുന്നു. നാല് സീറ്റുകളിലാണ് ആംആദ്മി ജയിച്ചത്. അഹമ്മദാബാദിൽ നാല് സീറ്റുകളിൽ ഒവൈസിയുടെ എഐഎംഐഎമ്മിനും വിജയിക്കാൻ സാധിച്ചിരുന്നു. 2015 ല്‍ ബിജെപി 391 ഇടത്തും കോണ്‍ഗ്രസ് 174 ഇടത്തുമായിരുന്നു വിജയിച്ചത്.

English summary

Gujarat local body elections: BJP leads in most of the seats