ഗുജറാത്തില് ഡ്യൂട്ടിയ്ക്കിടെ ബാര് നര്ത്തകിയ്ക്കൊപ്പം പൊലീസുകാരന്റെ ഡാന്സ്
സൂറത്ത്: ഡ്യൂട്ടിയ്ക്കിടെ ബാര് നര്ത്തകിയ്ക്കൊപ്പം നൃത്തം ചെയ്ത സബ് ഇന്സ്പെക്ടര്ക്കെതിരെ നടപടിയ്ക്ക് സാധ്യത. ഗുജറാത്ത് സൂറത്തിലെ ഒരു പൊലീസുകാരനാണ് നൃത്തം ചെയ്തതിന്റെ പേരില് നടപടി നേരിടേണ്ടി വരുന്നത്. ബാര് ഡാന്സര്ക്കൊപ്പമുള്ള പൊലീസുകാരന്റെ നൃത്തം ഒരാഴ്ചയായി വാട്ട്സ് ആപ്പിലൂടെ പ്രചരിയ്ക്കുകയാണ്. മൂന്ന് മാസങ്ങള്ക്ക് മുമ്പായിരുന്നു സംഭവമെങ്കിലും വീഡിയോ പുറത്ത് വന്നതിന് ശേഷമാണ് നടപടിയ്ക്കുള്ള കളമൊരുങ്ങുന്നത് .
മുന്പ് ഡ്യൂട്ടിയ്ക്കിടെ ഉത്തര് പ്രദേശില് പൊലീസുകാരന് നര്ത്തകിയെ തോക്ക് ചൂണ്ടി ഡാന്സ് ചെയ്യിപ്പിച്ചത് വാര്ത്തയായിരുന്നു. സെപ്റ്റംബറിലാണ് സൂറത്തിലെ എസ്ഐ ആയ ഡിസി സോലാന്കി ഔദ്യോഗിക കൃത്യനിര്വഹണത്തിനിടെ ബാര് ഡാന്സര്ക്കൊപ്പം സ്വയം മറന്ന് നൃത്തം ചെയ്തത്.
വിശ്വകര്മ പൂജ ഡ്യൂട്ടിയ്ക്ക് നിയോഗിച്ചതായിരുന്നു സോലാന്കിയെ. എന്നാല് ഡ്യൂട്ടിയ്ക്കിടെ, നൃത്തം ചെയ്യുകയായിരുന്ന ബാര് ഡാന്സര്ക്ക് നേരെ എസ്ഐ നോട്ടുകെട്ടുകള് വാരി എറിഞ്ഞു. പണം വാരി വിതറിയതിന് തൊട്ടുപിന്നാലെ തന്നെ ഡാന്സര്ക്കൊപ്പം ചുവട് വയ്ക്കാനും തുടങ്ങി. എന്തായാലും എസ്ഐയുടെ നൃത്തം വാട്ട്സ് ആപ്പിലൂടെ പ്രചരിച്ചു. ദൃശ്യങ്ങള് ഒരാഴ്ച മുമ്പാണ് പ്രചരിയ്ക്കാന് തുടങ്ങിയത്. സംഭവത്തില് പൊലീസുകാരനെതിരായ പ്രാഥമിക അന്വേഷണം പൂര്ത്തിയായതായി ജെ എം ബലോച് എന്ന പൊലീസുകാരന് പറഞ്ഞു.