ഹരിയാന വോട്ടെടുപ്പ് 2024 live; വോട്ടെടുപ്പ് അവസാനിച്ചു, 5 മണി വരെ 61 % പോളിം​ഗ് രേഖപ്പെടുത്തി

വാശിയേറിയ പ്രചരണത്തിനൊടുവിൽ ഹരിയാന ഇന്ന് പോളിംഗ് ബൂത്തിലേക്ക്. 10 വർഷങ്ങൾക്ക് ശേഷം കോൺഗ്രസ് അധികാരത്തിലേക്ക് തിരിച്ചുവരുമോ അതോ ബിജെപി മൂന്നാമതും അധികാരത്തുടർച്ച നേടുമോയെന്നാണ് ഉറ്റുനോക്കപ്പെടുന്നത്.ആകെ 90 മണ്ഡലങ്ങളാണ് സംസ്ഥാനത്ത് ഉള്ളത്. 1031 സ്ഥാനാർത്ഥികളാണ് തിരഞ്ഞെടുപ്പ് പോരിന് ഇറങ്ങുന്നത്.

കഴിഞ്ഞ നിയമസഭ തിരഞ്ഞെടുപ്പിൽ 40 സീറ്റുകളിലായിരുന്നു ബിജെപി വിജയം. കോൺഗ്രസിന് 31 സീറ്റുകൾ നേടാനായി. കേവലഭൂരിപക്ഷത്തിന് 45 സീറ്റുകളാണ് ആവശ്യം. ഇതോടെ 10 സീറ്റുകൾ നേടിയ ദുഷ്യന്ത് ചൗട്ടാലയുടെ ജെജെപിയുടെ നിലപാട് നിർണായകമായി. ജെജെപിയുമായി സഖ്യമുണ്ടാക്കി അധികാരം പിടിക്കാൻ കോൺഗ്രസ് ശ്രമങ്ങൾ നടത്തിയെങ്കിലും അകാലിദള്‍ നേതാവ് പ്രകാശ് സിംഗ് ബാദലിനെ മുന്നിൽ നിർത്തി ബിജെപി നടത്തിയ നീക്കത്തിൽ ജെജെപി എൻഡിഎയിൽ എത്തി. ഇത്തവണ പക്ഷേ ജെജെപി ബിജെപിക്കൊപ്പമല്ല, എഎസ്പിക്കൊപ്പം സഖ്യത്തിലാണ് മത്സരിക്കുന്നത്. തനിച്ചാണ് ബിജെപിയുടെ മത്സരം. കോൺഗ്രസും സിപിഎമ്മും സഖ്യത്തിലാണ് പോരാട്ടം.

സംസ്ഥാനത്ത് ഭരണവിരുദ്ധ വികാരം ശക്തമാണ്. ഇത് ഗുണം ചെയ്യുമെന്നാണ് കോൺഗ്രസ് പ്രതീക്ഷ. ജാട്ട് വോട്ടുകളിലും പാർട്ടി കണ്ണുവെയ്ക്കുന്നുണ്ട്. അതേസമയം കോൺഗ്രസിലെ പടലപ്പിണക്കങ്ങളും ജാട്ട് ഇതര വോട്ടുകളും തുണയ്ക്കുമെന്നാണ് ബിജെപിയുടെ കണക്ക് കൂട്ടൽ. ജെജെപി-എസ്-പി സഖ്യത്തിന് 20 സീറ്റുകളിൽ നിർണായക സ്വാധീനമുണ്ട്. കഴിഞ്ഞ തവണത്തെ പോലെ ഇത്തവണയും ജെജെപി കിങ് മേക്കറാകുമോയെന്ന് കാത്തിരുന്ന് കാണേണ്ടി വരും.