കിങ്‌മേക്കറാവന്‍ ഒരുങ്ങി കുമരാസ്വാമി: പ്രതാപം വീണ്ടെടുക്കാന്‍ ജെഡിഎസ്, കര്‍ണാടകം ത്രികോണമത്സരത്തിന്!

ബെംഗളൂരു: ഇത്തവണ ജെഡിഎസിന് ഇത് നിലനില്‍പ്പിന്റെ പോരാട്ടമാണ്. കന്നഡ രാഷ്ട്രീയത്തിലെ ആ പ്രതാപകാലം വീണ്ടെടുക്കുമെന്ന പ്രതീക്ഷയിലാണ് പാര്‍ട്ടിയും അമരക്കാരന്‍ എച്ച് ഡി കുമാരസ്വാമിയും. തിരഞ്ഞെടുപ്പ് പ്രചരണങ്ങളിലെല്ലാം ശക്തി തെളിയിക്കാന്‍ കുമാരസ്വാമിയ്ക്കായി. എന്നാല്‍ 2008ലെ വിജയം ആവര്‍ത്തിക്കാതെ നിലനില്‍പ്പില്ലെന്ന് ഈ രാഷ്ട്രിയതന്ത്രഞ്ജന് അറിയാം. ഇക്കുറി ചന്നപ്പട്ടണയിലും രാമനഗരയിലുമാണ് കുമാരസ്വാമി അങ്കത്തിനിറങ്ങുന്നത്.

യാദൃശ്ചികമായായിരുന്നു സിനിമാനിര്‍മ്മാതാവായ കുമാരസ്വാമിയുടെ രാഷ്ട്രീയപ്രവേശം. 1996ല്‍ ബംഗളൂരു റൂറലിലെ കനകപുരയില്‍ നിന്നായിരുന്നു കുമാരസ്വാമിയുടെ കന്നിയങ്കം. അന്ന് വമ്പന്‍ വിജയം നേടിയ കന്നഡിഗരുടെ കുമാരണ്ണയ്ക്ക് പിന്നീട് നിരാശയായിരുന്നു ഫലം. അതുപോലെ തന്നെ കോണ്‍ഗ്രസ്‌- ജെഡിഎസ് സഖ്യത്തിലുണ്ടായിരുന്ന ധരംസിങ് സര്‍ക്കാരിനെ തകിടംമറിച്ച് ജെഡിഎസ് യെദ്യൂരപ്പയുടെ നേതൃത്വത്തിലുള്ള ബിജെപിയുമായി കൂട്ടുചേരുകയും കുമാരസ്വാമി മുഖ്യമന്ത്രി ആയതും ചരിത്രം.

ചുരുങ്ങിയകാലത്തെ ആ മുഖ്യമന്ത്രിപദം കൊണ്ട് ജനപ്രീതി നേടാന്‍ കുമാരസ്വാമിയ്ക്കായി. ഇന്ന് കന്നഡിഗര്‍ക്ക് മണ്ണിന്റെ മകനാണ് അദ്ദേഹം. വൊക്കലിംഗ സമുദായത്തിലും ഗ്രാമീണമേഖലയിലും ജെഡിഎസിനുള്ള സ്വാധീനവും സ്വയം നേടി എടുത്ത ജനപ്രീതിയുമായാണ് കുമാരസ്വാമി ഇത്തവണ അങ്കത്തിനിറങ്ങുന്നത്. സിനിമാതാരങ്ങളെ ഉള്‍പ്പെടുത്തിയുള്ള പ്രചരണം ഫലം കാണുമെന്ന പ്രതീക്ഷയിലാണ് കുമാരസ്വാമി.

English summary

HD Kumaraswami ready to be king maker.