ഹേമ മാലിനിയുടെ മണ്ഡലത്തില് കൃഷ്ണ തീം പാര്ക്ക് വരുന്നു
ലക്നൗ: ബോളിവുഡ് നടിയും ബിജെപി എംപിയുമായ ഹേമ മാലിനി തന്റെ മണ്ഡലമായ മധുരയില് ശ്രീഷ്ണന്റെ തീം പാര്ക്ക് പണിയുന്നു. ഇതിനായി 50 ഏക്കര് ഭൂമി അനുവദിക്കാമെന്ന് ഉത്തര്പ്രദേശ് മുഖ്യമന്ത്രി അഖിലേഷ് യാദവ് ഹേമ മാലിനിക്ക് ഉറപ്പു നല്കി. കഴിഞ്ഞദിവസം നടത്തിയ കൂടിക്കാഴ്ചയിലാണ് അഖിലേഷ് യാദവ് ഇക്കാര്യത്തില് സംസ്ഥാന സര്ക്കാര് സഹായം ഉണ്ടാകുമെന്ന് അറിയിച്ചത്.
കൃഷ്ണ ലീല ഉദ്യാന് എന്ന പേരില് 200 കോടി രൂപയുടെ തീം പാര്ക്ക് പദ്ധതിയാണ് വിഭാവനം ചെയ്തിരിക്കുന്നത്. ഡിസ്നി ലാന്ഡിന്റെ നിര്മാതാക്കള് ആയിരിക്കും പാര്ക്കിന്റെ നിര്മാണമെന്ന് ഹേമ മാലിനി അറിയിച്ചു. ശ്രീകൃഷ്ണന്റെ ജീവിതം മുഴുവന് പാര്ക്കില് അനാവരണം ചെയ്യപ്പെടുമെന്നും ഹേമ മാലിനി വ്യക്തമാക്കി.
ഇവ കൂടാതെ പതിവുപോലെ പാര്ക്കുകളിലെ റൈഡുകളും മറ്റു ഉണ്ടാവുകയും ചെയ്യും. മിനി ട്രെയിന്, ഫുഡ് കോര്ട്, വ്യാപാര ശാലകള് മുതലായവയും പാര്ക്കിനകത്തുണ്ടാകും. പാര്ക്കിന്റെ വിശദമായ റിപ്പോര്ട്ട് ഹേമ മാലിനി സംസ്ഥാന മുഖ്യമന്ത്രി അഖിലേഷ് യാദവിനും സ്റ്റേറ്റ് സെക്രട്ടറി അലോക് രഞ്ജനും സമര്പ്പിച്ചുകഴിഞ്ഞു.
പാര്ക്കിന്റെ നിര്മാണത്തിന് കേന്ദ്ര സര്ക്കാരും സഹകരിക്കമെന്നാണ് ഹേമ മാലിനിയുടെ പ്രതീക്ഷ. പ്രധാനമന്ത്രി നരേന്ദ്ര മോദിയോടും കേന്ദ്ര സാംസ്കാരിക വകുപ്പ് മന്ത്രി മഹേഷ് ശര്മയോടും ഇക്കാര്യം ചര്ച്ച ചെയ്തിട്ടുണ്ടെന്നും സഹായ വാഗ്ദാനം ലഭിച്ചെന്നും ഹേമ മാലിനി പറഞ്ഞു. പദ്ധതി പ്രാവര്ത്തികമാവുകയാണെങ്കില് രാജ്യത്തെ ആദ്യത്തെ കൃഷ്ണ തീം പാര്ക്ക് ആയിരിക്കും ഇത്.